盛傳有餡
陳茵媺月初拍完《單戀雙城》後返港，男友陳豪接機時，有指她刻意用袋遮有餡肚，之後更急推無綫有打鬥場面的古裝劇《寒山潛龍》。《蘋果日報》圖片
滾熱辣
陳茵媺急返加探病母 陳豪閃婚沖喜
44歲城中筍盤陳豪與 32歲港姐冠軍陳茵媺拍拖兩年，屢傳婚訊。最近，陳茵媺突以「屋企有事」為由推劇，更急急腳飛返老家多倫多。坊間眾說紛紜，更指她有孕返加國安胎。
不過本刊收到消息，陳茵媺急住走，全因得知移居多倫多的母親身體抱恙，因此匆忙返家探望，而日內陳豪亦會抽空赴加國探準外母。據知此行陳豪還會向陳母提親，望以婚事為準外母沖喜。
陳茵媺原定與馬國明、李詩韻下月中拍古裝新劇《寒山潛龍》。上周她忽然罕有向無綫推劇，就連熱播中的新劇《情越海岸線》宣傳亦缺席，原來她已於上周靜雞雞飛返多倫多。
陳母曾入院
據知，陳茵媺已有兩年沒有返加拿大探父母，但陳母向來身體麻麻。剛從大馬拍完外景的陳茵媺，知道母親健康出現問題，而且病情不輕，因此即時向監製推劇。
據知情人士透露：「 Aimee（陳茵媺）每個星期都會打長途電話俾父母報平安。早兩星期，原本佢搵爹哋幫手翻譯新劇劇本，點知爹哋同佢講，媽咪近排身體好差，仲曾經入過院。 Aimee一向都好錫媽咪，佢驚媽咪有事，所以好急同公司請假，返加拿大陪媽咪。」
承認會閃婚
事實上，陳豪一向有計劃將來，剛以 3,300萬買入 2,460呎大埔比華利山獨立屋，更打算年尾開咖啡店，明年初迎娶陳茵媺過門，讓她做老闆娘。不過得知女友媽咪身體狀況唔理想，所以早前與女友商量，決定提前今年內舉行婚禮。
知情人透露：「年初阿 Mo（陳豪）已經同 Aimee求咗婚，但未落實婚期。阿 Mo知伯母身體唔舒服，咪提議早啲註冊，圓咗外父外母心願。嚟緊佢搞掂手頭上嘅工作，就會飛去多倫多會合 Aimee，同佢父母傾酒席同禮金。」
據悉兩人會先註冊，再在加拿大及香港兩邊擺酒。日前陳豪矢口否認女友有餡，但就對記者表示自己唔排除閃婚。「我係好傳統嘅人，一切要循序漸進，結婚之後先會有小朋友。（會唔會閃婚？）我依家努力緊！」
為賺錢擔起頭家，近日有傳陳豪明年年初約滿無綫後，便北上搵人仔。對此陳豪直言：「係同公司傾緊續約條件，想拍電影同返內地拍劇，見識吓出面嘅世界。」
買大屋築愛巢
陳豪月初被傳媒影到秘密到中環 IFC的恒基總部買樓，最後更拍板以 3,300萬港元購入大埔比華利山別墅，比市價低兩成，用作新婚愛巢之用。
收山做少奶
據知明年在港開咖啡店的他，曾想過與無綫轉合作形式，方便打理生意。有幕後人員表示：「阿 Mo出年約滿，佢想一年只拍一套劇，聽講無綫都應承咗俾佢減產，至於 Aimee就遲阿 Mo幾個月約滿。阿 Mo叫女友全力打理新舖，等舖頭上軌道先再決定入番呢行。」
對於閃婚為陳母沖喜和打算約滿收山，至本刊截稿為止，仍未聯絡到陳茵媺回應。陳豪原定周三（ 22日）出席無綫曬冷騷，但最後亦沒有現身。
月初跳跳紮
坊間盛傳陳茵媺懷有豪 B，因此要飛返加國安胎，但本刊月初到大馬採訪，眼見着住小背心的她擒高擒低拍新劇。而記者周三（ 22日）訪問無綫製作資源部總監樂易玲時，她亦指陳茵媺雖然推劇，但已向公司承諾，若其間有賺錢活動，都會返港亮相。種種跡象顯示，豪嫂有餡機會不大。
|
鍾意就快D Share啦！
|
|
|
