2013年5月17日 星期五

千語箍煲成功 林峯曬熊抱照證未分




微信煙韌照曝光

近日吳千語𠱁掂林峯,兩人和好如初。原本在微信戶口沒有放照片的林峯,亦隨即放上兩人攬到實兼笑容一致的煙韌照,以行動向所有朋友力證情不變。

娛聞樂

千語箍煲成功 林峯曬熊抱照證未分

愛得異常高調及癡纏的林峯和吳千語,早前因男方要返內地拍劇,獨留在港的千語 BB被拍到竟然到另一男子家中過夜,激到林峯生蝦咁跳一度冷戰。

當大家以為呢場「風雨」還在持續時,那邊廂林峯已經被千語 BB𠱁番掂。本刊發現,近日林峯首度將二人頭貼頭攬到實的親密照放上微信,以行動力證情不變之餘,亦阻止一切狂蜂浪蝶埋 BB身。唔單止咁,密照還揭露了千語 BB平日對林峯的肉麻暱稱,大家睇完實在好難唔打個冷震。

年齡相隔 14年的「峯語戀」,自今年 2月林峯大方公開戀情後,一個月內他們先後去過三次旅行,早前林峯又對住鏡頭大講 7次好愛千語 BB。可惜日前他只是離港一段短時間,就被人乘虛而入,感情即亮紅燈。

林峯和吳千語拍拖不足半年,愛得異常高調,經常被拍得孖住拍拖。上月兩人就被影到跟穀德昭、黃子恒等人到銅鑼灣 CEO唱 K至淩晨四時。

微信求饒

雖然事後千語 BB已發相澄清當晚與她飯敍的型男是雜誌編輯,林峯依然打爛了醋埕。平日林峯最愛高調探班曬恩愛,但上星期千語 BB到澳門跳 Bungee Jump,林峯原本請假一日打算飛去探班,最後依然決定玩失蹤,搞到千語 BB失望至極,她惟有全程以微信跟林峯「耍冧」。「阿峯咁愛千語,梗係衰心軟啦。千語喺澳門一有時間就用微信 call阿峯,猛話自己對阿峯一條心,又話阿峯突然唔嚟澳門,搞到佢冇膽跳 Bungee Jump㖭。阿峯諗番都有啲心痛,結果好快同千語和好如初。」一名密友透露。

連環 call𠱁男友

上星期,吳千語趁林峯北上拍劇,跟大班朋友唱 K劈酒,事後更直上男友人雜誌編輯 Jimmy屋企,因而與林峯冷戰。事後在澳門拍特輯的她心不在焉,不用埋位時,經常以手機發短訊及微信,相信是爭取時間跟林峯解畫。

緋聞情人狂𥄫

宣示主權

本周二( 14日),吳千語被問到林峯放煙韌照到微信,即時冧笑,表示知情,更直言與林峯關係一直好好及好開心。

為了杜絕千語 BB身邊男性朋友再乘虛而入,近日林峯在自己的微信戶口上,放上一張他雙手攬住千語 BB頭貼頭的煙韌照,旁邊更加了一句肉麻字句,當中更揭露千語叫男友做「林豬豬( L Pig)」。換句話說,所有玩得埋的好友都知道他們打風都打唔甩。密友續說:「阿峯放呢張相之前,都有先知會女友,千語 BB亦深明其用意,最後亦贊成男友做法。」

對於林峯放相到微信宣示主權,千語在周二( 14日)出席活動時亦承認早知情:「我知!我前幾日見到相,係佢上次返港時食飯影嘅,當時仲有一班朋友。(佢忽然放相,係咪驚再有男人埋你身?仲有肉麻暱稱同語句喎。)我哋依家感情,可以話俾大家知,我哋好開心,一路都好穩定。」睇嚟兩人經歷過一場小風波,感情更進一步。

「瘋」戀千語

2月三度蜜遊

林峯遭踢爆秘戀 19歲吳千語,以往對戀情三緘其口的他,忽然在錄影《勁歌》時,賜女友名份,更講明:「我要保護對方,要做男人應該做嘅事!」不久林峯即帶千語 BB戀戰咗繩和東京,回港後二人再飛米蘭,有指林峯這三次旅行豪使 50萬。

林峯先後與李彩華和潘霜霜拍拖,但兩女都被收到密密實。縱使遭傳媒踢爆,林峯為保形象,都會極速斬纜,甚少上身。唯獨對着千語 BB,花弗的他突然轉性,不但公開戀情,還經常將 BB掛口邊。林峯情聖上身,難怪有指辣㷫一直錫他的樂易玲。

3月下禁啜令

林峯和 BB愛得癡纏,但三月林峯要到橫店拍劇,坦言拍拖以來,第一次長時間分開,覺得不習慣。對於女友將來有機會拍接吻戲,林峯即緊張地說:「就算係工作需要,都最好唔好啦!」隔空向 BB下禁啜令。

《蘋果日報》圖片

4月七愛 BB

林峯上《勁歌》原本講明唔再講戀情,但忽然自爆俾女友滿分,更說:「知道大家好關心我哋,今次係最後一次,我真係好愛、好愛、好愛、好愛、好愛、好愛、好愛 BB。有 7個『好愛』,總之一切在心中。」可是骨痹宣言一出,女友即時俾人叫做「吳七愛」,愛你變成玩你。



鍾意就快D Share啦!
Related Posts Plugin for WordPress, Blogger...