掃呢頁CODE去手機

2013年5月1日 星期三

發財立品 肥姐紀念騷鬥揸旗 曾志偉禁陳淑芬抽水




真面目

發財立品 肥姐紀念騷鬥揸旗 曾志偉禁陳淑芬抽水

沈殿霞不經不覺已離開 5年,圈中一班好友將於 6月 1日肥肥 68歲冥壽舉行「開心果永遠欣想你」演唱會,據知曾志偉及陳淑芬均有興趣做搞手,爭住紀念肥姐。

不過陳淑芬早前搞張國榮紀念騷搞到一鑊粥,被指發了 2千萬死人財,又被何守信狂轟中飽私囊。冇曬公信力,據知陳淑芬今次冇得獨攬肥姐騷,除了要與志偉合辦,更加冇得過河濕腳,志偉堅決將門票收入全數捐出作慈善用途,而被阿叻陳百祥踢爆有 7層工廈揸手的陳淑芬想再借「商業」用途發財,睇怕冇咁易!

6月 1日在紅館舉行的「開心果永遠欣想你」演唱會,將會由一班嘉賓演唱以肥姐入行時與汪明荃、王愛明和張德蘭合組的「四朵金花」名曲,現時暫定有肥姐契仔張學友、欣宜、任賢齊、周華健及三位「金花」等出席。

曾志偉、汪明荃、欣宜及學友一人一樽開心果,偏偏陳淑芬冇份,得個睇字!

曾志偉

我唔想今次搞到 Leslie嗰次咁麻煩,所以會將收入扣除成本後捐曬去福幼會!

張學友

我哋啲歌手今次全部係義唱,其實都係出心啫,唔使諗太多!

陳淑芬

傳媒抹黑我話我袋咗 2千萬,根本成個活動(哥哥紀念騷)嘅製作費好高,邊有咁多錢落袋吖!

欣宜表示今次只會以表演嘉賓身份參與紀念騷,對海報(右圖)設計及票價等冇畀過意見。網上圖片

陳淑芬與肥姐十分友好,曾受托照顧欣宜,但現時欣宜早已獨立,甚少與陳淑芬聯絡。路透社圖片

難得哥哥的情人唐唐畀面出席紀念活動,但所有收入竟然全部落入陳淑芬個袋,陳後來仲話:「講明係商業活動,冇講過係慈善騷。」《蘋果日報》圖片

鬥吹雞
分薄話事權

何守信早前炮轟有人發死人財,矛頭直指陳淑芬,但陳否認抽水,仲話唔會對號入座。《蘋果日報》圖片

今次票價分別為$680、$380及$280,門票收入估計已超過 500萬。大嚿肥豬肉自然多人吼,據知紀念騷原本由陳淑芬獨攬主辦權,但現時要與其他單位合辦,除了陳的天星娛樂,其他娛樂公司包括星煥、寰亞等亦有份參與,明顯分薄陳淑芬的話事權。

冇得話事,原因是曾志偉怕有人再借機抽水影響肥姐聲譽,決定自己搞埋一份,更講明會將收入捐去福幼會(由曾志偉於 94年成立、專門幫助國內兒童的非牟利慈善團體)。「最初陳淑芬好想自己一個搞曬,但志偉知道後大力反對,佢唔想整到好似哥哥紀念騷翻版咁俾人話發死人財,所以講到明要一齊搞,而且所有收入都會捐出去,確保冇人可以從中掠水。」知情人士透露。

欣宜:志偉睇數好放心

週一( 29日)肥姐紀念騷舉行記招,一班嘉賓包括張學友、汪明荃全部畀面現身,據知今次的表演嘉賓如任賢齊、周華健等,大多由志偉吹雞,反而金牌經理人陳淑芬只能叫到學友同草蜢撐場。

對於志偉、陳淑芬搶住揸數,身為肥姐女兒的欣宜表示與兩人情同父母,但言語間卻表達出對志偉更信任,「今次有爸爸媽媽(志偉及陳淑芬)一齊搞,我只係表演嘉賓,負責唱歌,其他冇參與,不過有志偉哥睇住盤數,我都好放心!」邊個係人邊個係鬼,真係呃唔到欣宜㗎!

拉闊紀念陳百強

今年係陳百強逝世 20周年,有財務公司以陳的名曲〈等〉做廣告歌(下圖),高登近期又力推希望有人搞紀念騷,據知商台將會以拉闊形式搞一場,嘉賓暫定邀請到楊千嬅、梁詠琪、林一峰及梁漢文。不過商台冇公布點樣處理門票收入,唔知會當係慈善騷定商業活動呢?

採訪、撰文、攝影:娛樂組


鍾意就快D Share啦!