無綫急曬冷 擺 Bosco杏兒上枱

醒目胡杏兒 mark實馬國明吹吓水，而另一邊嘅徐子珊就同王祖藍研究電話，得番黃宗澤一個無人理，惟有扮無嘢，四圍眼望望。

媽咪姐

無綫急曬冷　擺 Bosco杏兒上枱

以往一台獨大嘅無綫，呢排收視創新低，重頭劇《金枝貳》平均只得 19點收視，演員及幕後人員又內訌！為咗挽回聲勢，周三（ 22日）無綫以取得下年「世界盃」播映權為名，特別安排全台三百個藝員一齊返公司拍短片，仲講明話會停廠配合。之不過，好多當家小生花旦好似陳豪、楊怡、謝天華、陳法拉、鍾嘉欣、陳茵媺等都無到，咁又點叫做齊人先？但大台總算人多，嗌口號時都夠大聲嘅。

杏兒同 Bosco俾公司安排企埋一齊，雖然媽咪姐無讀過啲咩行為心理學，但見到一個玩手指，另一個掹衫，就知佢哋周身都唔聚財囉。

睇勻全場，最引人注意嘅，就只有胡杏兒同黃宗澤（ Bosco）呢對過氣情侶。未埋位時，杏兒仲好大方講會企喺 Bosco隔籬，但係到真正企埋一齊嘅時候就好避忌，全程只係同馬國明咬耳仔咋，眼尾都唔望一下前男友。話無嘢？你信唔信吖？反正媽咪姐就不信鳥！而新加入無綫嘅黃翠如、洪永城同陸浩明等「有線幫」唔單止被力捧，翠如 BB仲企喺第二排㖭！不過，最值得向大家「報喜」嘅係，媽咪姐聽到殼王陳國強喺錄影廠揸住咪同大班藝員講，希望未來開劇時至少有八成劇本，唔再「飛紙仔」。嘩，係真嘅話，「如妃」就唔使再咁勞氣！我哋班 C9仔又唔使睇極都唔明編劇想噏乜咯！善哉。善哉。

無綫急 call藝人曬冷，但林峯、吳卓羲等都北上拍劇，趕唔切返。好彩，點都仲 call到幾百人入廠影呢張大合照，仲造就咗蕭正楠、王祖藍首次企上第一排。不過呢，呢套紅男綠女制服，就真係娘咗啲囉。

上年仲齊人

上年 7月殼王嗌曬冷，仲有陳豪同嘉欣 BB等一班一線撐場，今年就只有胡杏兒同黃宗澤現身。而且上年因為着私夥衫，點都有啲美腿睇吓，媽咪姐強烈要求下年都要着短裙仔呀。

陳敏之同胡定欣喺 TVB都捱咗好多年，呢幾年先叫有少少起色，做吓「女二」，但黃翠如（圈）新加入拍劇就坐正做女主角，排位時又可以企埋第二排。兩位姐仔仲笑得出，果然好戲！

落難 BB

呢排俾人翻舊賬嘅翠如 BB，一講番當年 17歲喺《鏗鏘集》大講對六四嘅睇法時，即刻眼濕濕，好委屈咁話：「人長大咗，睇法都已經唔同。」阿女，乜是非黑白唔係愈大愈明嘅咩？

黃宗澤拍宣傳片時全程「被封嘴」，好彩一拍完，有唯唯（梁烈唯）「送上門」，個嘴無用咁耐，終於可以鬱吓！又可以俾人影吓，證明自己都有朋友唔係孤獨精。

鍾意就快D Share啦！

下一篇 》