網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年5月1日 星期三

長唱長有 食足 Laughing Gor老本 4年 謝天華 25萬快閃冧女




真面目

長唱長有 食足 Laughing Gor老本 4年 謝天華 25萬快閃冧女

藝人鍾意北上搵真銀,但拍劇最短都要留低幾個月,點都唔夠去酒吧登台快手速食易賺。

前週四( 18日), 45歲謝天華到廣州一間大型酒吧表演,全程有三個保鑣貼身保護,又有中港七人車接送,短短 45分鐘唱 4首歌,即執走 25萬人仔!其間大批女粉絲依然叫天華做「 Laughing Gor」,反而新劇《女警愛作戰》的角色「藍一一」冇人噏得出,估唔到 Laughing條水可以食足 4年!

自從 3月尾同張兆輝、徐子珊拍完 TVB劇《神槍狙擊 2013》,謝天華暫時未有劇開,可以專心登台搵快錢。前週四( 18日)晚,謝天華乘七人車到廣州一間大型酒吧登台,一落車已有三名保鑣跟身,雖然有大批粉絲企門口歡迎,但天華係咁意行去門口影一幅相就匆匆入場。

天華出場前,酒吧安排幾個金髮性感女跳舞暖場,不過觀眾一心睇天華,對鬼妹反應冷淡。

女粉絲搶住同天華握手,有人舉牌支持偶像,不過「 I Love You」寫咗「 I Love Yuo」,笑死人咩!

開騷前,天華同拎住佢張靚仔海報的索女合照。當晚有紅星睇,入場券要 100蚊人仔。

天華一落車即有大漢幫手開路,確保冇狂迷埋到身。

連環講爛 gag

《女警愛作戰》的口碑收視都唔差,可惜內地觀眾淨係記得「 Laughing Gor」。

有豐富登台經驗、舞蹈員出身又組過跳舞組合「風火海」嘅謝天華,一上到台立即搞氣氛,唱完《潛行狙擊》插曲〈獨行〉後,開始同觀眾吹水,「近年我去過好多地方登台,長沙武漢上海杭州都去過,唔知點解成日都嚟唔到廣州,我仲諗係咪廣州啲朋友唔掛住我呢?」聽到觀眾大叫「掛住」,天華更加得戚,用肉麻腔講:「我今晚撞聾,聽得唔清楚添!」粉絲再擘大喉嚨嗌,天華先收貨。

愈講愈興奮,天華繼續搞爛 gag,「嚟到廣州,即係講廣東話得啦,有冇人聽唔明先?聽唔明嘅話,我都係講番廣東話咋!」

走音照拍手

講幾句已冧到台下女粉絲迷曬,天華之後一口氣唱三隻歌,包括〈聽海〉、〈愛的初體驗〉和〈友情歲月〉。風火海出身的天華可能太耐冇練歌,不時走音同唔夠氣,好在夜場夠嘈唔多覺,加上天華唱到除埋外套咁投入,唱得差粉絲都收貨冇噓爆。

天華 09年做「 Laughing Gor」彈起,早前又同鄭嘉穎拍了內地劇《英雄》,在國內受歡迎程度絕對唔輸畀一班視帝。據知天華現時的登台價由 25萬人仔起跳,視乎時間同地點再調整。今次上廣州一轉唱 45分鐘, 25萬即袋袋平安,好過捱眼瞓拍劇喎!

視帝最高價

登台錢易搵,但唔同級數價錢唔同,三屆視帝如黎耀祥起碼收 30萬人仔先有得傾,相反生完女後愈撈愈黴的楊思琦, 1萬人仔搞掂!

黎耀祥 30萬

以往靠黐住朱咪咪先有騷,今時今日貴為三屆視帝,騷價暴升至 30萬 1場。圖片

蕭正 20萬

雖然未係一線小生,但蕭正楠勝在唱得,劇多知名度夠,騷價升至 20萬。

滕麗名 7萬

好耐冇新劇的滕麗名,食住 N年前《陀槍師姐》條水,都收到 7萬。圖片

楊思琦 1萬

未婚生女形象插水,楊思琦騷價由 3萬跌至 1萬,兼要去品流較複雜的夜場。《忽然 1周》圖片

採訪、撰文、攝影:娛樂組


鍾意就快D Share啦!