阿葛買車如衣服，肚餓反而無要求，食個麵包搞掂。
探熱針
大玩具 貪抵玩 葛民輝百萬買蓮花跑車
圈中愛玩車，郭富城、張智霖、餘文樂十對手唔夠數，葛民輝也是其中代表，名下七人車、 MINI Cooper、寶馬左擁右抱，早前他再豪擲百萬，購入較冷門的蓮花（ Lotus）開篷跑車 Elise Sc，還特意為大玩具使多十萬，噴成他情有獨鍾的啞黑色。
新車仍在扮靚中，阿葛外出，如常出動價值六十萬的貴版 MINI Cooper（ Cooper S JCW），日前他到九龍城買麵包，隨手將舊愛 double park在馬路，違例偷雞，阿葛九秒九買完閃人！
似揸賽車
名下有四部車的葛民輝，早前再花過百萬購入蓮花（ Lotus） Elise Sc，其實早在○四年，他亦曾以四十四萬購入同一款車，當時阿葛講過，「個 seat位幾難坐，亦都唔係想像中好揸。」
事隔九年，阿葛兩個月前以近百萬，再度購入最新款的 Elise Sc開篷跑車。「 Lotus喺香港一向都唔算大熱，不過愛車嘅人就一定會鍾意，揸起上嚟好似揸緊小型賽車，好有揸（法）拉利感覺，水位（車價）又平（法）拉利一半，幾抵玩！」一名車行職員說。
十萬改色
極愛啞黑色的阿葛，新車落地後，第一時間送入位於九龍灣的車房，改裝換色。記者上星期在車房，發現阿葛的新玩具已經噴上第一層色，並準備數日後再上色多一次。
「一般新車出廠、改裝，半年內要打稅，而家佢（阿葛）架車改完色，只要肯忍手幾個月唔揸，半年期一到，就可以慳番唔使俾稅，但佢要噴啞黑色，噴油費十萬就走唔甩！」
瘦身荷包脹
現年四十七歲的葛民輝，○八年為林海峰《是但噏求其大合唱 Part II》做演唱會嘉賓時，心臟病發一度昏迷入院。去年軟硬孖住草蜢再開騷，阿葛終於「的起心肝」搣走三十九磅肥肉，將大肚腩變朱古力腹肌。
人瘦咗，但荷包絕對有脹無縮，廣告、配音 keep住密密做，阿葛的收入可觀，花過百萬買玩具，濕碎！
|
鍾意就快D Share啦！
|
|
|
