掃呢頁CODE去手機

2013年6月7日 星期五

割價揮低阿佘 周麗淇陰招搶劇




今年 now與「華策影視」決定開拍《大漢賢後衞子夫》時,曾向佘詩曼度期與傾價,結果傾唔掂數,造就周麗淇搶角得米。

娛聞樂

割價揮低阿佘 周麗淇陰招搶劇

為爭取免費電視牌照,電視台各出奇謀。眼見王維基的 HKTV積極撬無綫人才拍劇,最近 now TV亦與內地「華策影視」合作,開拍 30集大型古裝劇《大漢賢後衞子夫》,由劉家豪及梅小青夫妻檔監製,主角除內地演員王洛丹,還有無綫福將周麗淇及林峯。

據知最初 now屬意佘詩曼做女主角,不過阿佘大咬開 24萬人民幣一集,在雙方仍就價錢拉鋸的同時,周麗淇即暗地裏向劉家豪自薦做女主角,開價僅 10萬人民幣,片酬足足平阿佘一半有多,最終雙方達成交易。

《 FACE》圖片

now TV在 3月的影視展上,大鑼大鼓力穀籌備開拍的自家劇《大漢賢後衞子夫》,當時梅小青表示:「會搵合作過、喜歡的演員做主角。」外間就揣測她會起用愛將佘詩曼。事後佘詩曼亦承認:「雙方係有初步傾過。」不過《大》劇上周在橫店開鏡,除演「衞子夫」的內地演員王洛丹現身,佘詩曼卻全程冇影,原來已換上周麗淇。

阿佘抬高價

收視不俗

05年,監製劉家豪(左一)首次起用周麗淇拍《秀才遇着兵》,她亦憑此劇得到台慶「飛躍進步女藝員」獎,劉可說是她的伯樂。

《蘋果日報》圖片

據知內地「華策影視」 2月開始聯絡多位演員,起初佘詩曼對劇本好有興趣,加上她與梅小青「做慣做熟」,基本上已經口頭答應演出,只欠價錢以及檔期。據行內人士透露:「阿佘拍內地劇,本身收開 20萬人民幣一集,今次佢經理人向華策開到 24萬,仲話阿佘 5月尾生日要放假兩星期去旅行。套劇原先諗住 5月開機,梗係就唔到佢啦。當時阿佘同華策拉鋸咗成幾星期都未有進展。」

周麗淇減價求拍

其實不少演員知道梅小青同劉家豪這對金牌監製開劇,都有自動請纓演出。正當佘詩曼嘆慢板時,她的過氣情敵周麗淇已經向劉家豪「示好」。「 8年前, Niki同家豪哥喺《秀才遇着兵》合作過,佢知道阿佘仲未應承,即刻放風話有興趣,就算價錢減少少都冇問題。家豪哥就叫華策出面同 Niki公司接觸。 Niki之前收開 12萬人仔一集,今次 10萬都照殺。華策見佢咁易話為,就撲槌用佢,搵佢做平陽公主個角色。」

本周日( 2日),周麗淇出席新劇《好心作怪》宣傳活動,對於傾得成拍《大漢賢後衞子夫》,她笑說:「我不嬲都好揀擇,之前有套內地電影酬勞唔錯,我都推咗,因為要去長沙拍。不過《大》劇係大製作,加上我好鍾意個劇本,所以就應承,酬勞方面都好可觀。」不過當記者指該劇原本找佘詩曼演出,她即面有難色說:「吓!又講呢啲,我冇聽過(劉家豪)搵佢拍,你哋講啫。我好早收到通知要拍㗎啦。」說罷便轉身走人,似乎不願再提死敵。

塵埃落定

上周周麗淇赴橫店試造型,還風騷與監製劉家豪及梅小青合照,不過途中她卻遇上車禍,相當黑仔。

中港合拍

今次內地演員王洛丹擔當女主角,與林峯、周麗淇有不少對手戲。上周五( 31日)開鏡當日,她亦有跟梅小青合照。

首度合作

周麗淇及林峯未合作過拍劇,但兩人同屬歌手,曾有不少同台的機會。

攜手攞獎

佘詩曼與林峯合作過多次, 10年更分別憑《公主嫁到》及《談情說案》得到「我最喜愛的電視女/男角色」。可惜今次殺出個周麗淇,令兩人無緣合作。

《蘋果日報》圖片

監製認搵阿佘

聞周封嘴

記者亦問過梅小青,她則承認曾找過佘詩曼:「係阿佘嗰邊覆番個期話唔得。(係咪價錢唔啱?)唔係。(咁周麗淇係咪首選?)其實個劇本都不停轉人,我哋心儀過好多演員, Niki係其中之一。(咁 Niki係咪取代阿佘?)唔係……我哋都有搵過陳妍希,不過佢個期唔得。其實我覺得 Niki好適合平陽公主呢個角色。」

阿佘內地贏盡 Niki
新仇舊恨

周麗淇與佘詩曼先後與鄭嘉穎傳過緋聞,多年來兩位過氣情敵亦多次碰頭,屢傳不和,可謂寃家路窄。

姣佘撬牆腳

03年,鄭嘉穎與周麗淇拍劇集《翡翠戀曲》撻着。可惜 08年有指佘詩曼介入兩人五年情,輸家周麗淇欲哭無淚。

婚宴引爆怒火

11年 12月 Toby梁靖琪擺婚宴,竟同時邀鄭嘉穎、周麗淇及佘詩曼。有指鄭嘉穎以短訊撩周麗淇,其間更走埋她的身邊傾偈,佘詩曼相當不滿。豈料翌日兩女在無綫化妝間相遇,佘更當眾怒啤周。

傳出搜身事件

兩人在化妝間狹路相逢,之後就傳出周麗淇拍劇時唔見銀包,發火要在場工作人員全部搜身的新聞。事後她否認有其事,仲話:「我唔知係咪得罪人。」有傳幕後黑手是佘詩曼,指她借幕後把口爆周麗淇惡行。



鍾意就快D Share啦!