掃呢頁CODE去手機

2013年6月5日 星期三

中年發威 中途轉肌 張家輝私藏大隻佬寫真




45歲張家輝竟然操到郭富城身形,而且曝光前冇人發現,難怪批相一出街即刻成為焦點。

真面目

中年發威 中途轉肌 張家輝私藏大隻佬寫真

大隻男如羅仲謙一向受歡迎,近期連 45歲張家輝都秘密加入戰團,用咗 1年時間,由化骨龍變肌男。

去年拍《大追捕》開始操肌的家輝,今年在林超賢執導的新戲《激戰》飾演過氣拳王,為角色練得一身倒三角蝴蝶肌,比同劇的彭於晏、安志傑更有睇頭。巨肌得來不易,家輝又講明只此一次兼唔會刻意 keep,當然要趁未走樣影低留念。據知,除了幫月刊影的一輯圖片外,家輝自己亦私藏幾張爆肌相,穀肌穀到荷爾蒙失調咁大犧牲,呢刻唔影等幾時?

早前出席活動時,張家輝自爆老婆對自己一身朱古力肌反應冷淡,他說︰「老婆其實冇乜感覺,係有時我操得太勁,佢會話我啲肌肉好似爆炸緊!」

彭於晏喺《激戰》中飾演過氣富二代,要搵過氣拳王家輝將佢訓練成新一代拳王。

家輝上週出席《中國合夥人》首映,面部多番幾分肉,着住西裝真係睇唔出佢副靚 body!

戒鹽油糖

結婚 9年的老婆關詠荷唔識欣賞,反而家輝非常自戀,除了為雜誌拍了一輯大隻相,又私下吩咐朋友幫手影低一身蝴蝶肌,留住最美一刻。

為了配合 8月尾在港上映的《激戰》中拳王角色,家輝向健身教練 Michael求救,日操夜操下終於穀爆肌。訓練初期要戒鹽油糖及澱粉質,只吃白烚雞肉、魚;中段每日食 20至 30隻蛋白,直到拍攝前幾日,齋食白飯令肌肉膨脹,最痛苦係要脫水等身體收乾水分,每次飲水只可濕濕嘴角。

經導演林超賢介紹,彭於晏與家輝一樣搵 Michael幫手操肌。

張家輝(右)與彭於晏(左)喺《激戰》中扮演兩師徒,論肌味,家輝與 31歲於晏弟弟有得揮。

小便起泡

咪以為節食就練得成巨肌,家輝接受雜誌訪問時,話操得太盡搞到荷爾蒙失調,當時小便有成吋厚的泡沫,要沖幾次水先沖得走,又試過成個人乾到全日唔使去廁所,夾硬去都係得幾滴啡色液體,又會突然狂爆瘡,聽落都恐怖。

操到喊驚,家輝講明唔會有下次,據知有導演搵家輝增肥拍戲,但被家輝一口拒絕。剛剛拍完陳木勝新片《掃毒》,家輝即將為自己首次自導自演的鬼片《盂蘭神功》埋位,雖然收一份人工做兩份工作,不過可以話曬事,起碼唔使再虐待自己啦!

老公專心拍戲,關詠荷就專心湊女,上週五( 31日)陪住 7歲餅印女往灣仔學長笛。早前張氏一家更由貝沙灣搬去月租 11萬跑馬地逸廬。

星級魔鬼教練

幫張家輝操到李小龍身形的魔鬼教練 Michael(郭迪佳),原來亦係李嘉欣、彭於晏、吳君如的私人教練。早前吳君如喺《康熙來了》自爆介紹過 Michael畀陳妍希做男友,不過兩人唔過電,只做了妍希 BB的健身教練。

Michael 09年曾在灣仔開設 Vim Sports Academy,去年 7月結業,不過手上咁多明星客仔,肯定唔憂做!

Michael外表溫文,但其實相當嚴厲,連家輝都話差啲因為太辛苦而同對方反面。記者上週六曾致電他,但他卻不願透露地獄式訓練家輝的詳情。

李嘉欣

吳君如

陳妍希

藤條變巨肌

'84得棚骨

初入警察訓練學堂時唔夠 100磅,手腳幼過藤條,似非法入境者多過警察。

'99豬腩肉

《千王之王 2000》入面,家輝除衫跳鋼管舞,全身白雪雪又鬆泡泡,完全冇 shape。

'01穀唔起

拍《走投有路》時,家輝開始做運動,雖然未算好結實,起碼收番個肚腩仔。

'12筋肉人

為《大追捕》監躉角色操肌,激減 10磅,更因操練過度搞到一日暈三次。



鍾意就快D Share啦!