掃呢頁CODE去手機

2013年9月21日 星期六

《巨輪》嚟喇!鍾嘉欣齋咀 陳展鵬搶鏡




媽咪姐

《巨輪》嚟喇!鍾嘉欣齋咀 陳展鵬搶鏡

歐陽震華同關詠荷嗰套唔特別好睇,又唔太難睇嘅《情逆三世緣》無聲無息播完,接住播出嘅係跨年代劇《巨輪》,個個主角由廿幾歲演到五十幾歲。早前有傳無綫為捧鍾嘉欣做視後,特登將原來係台慶劇嘅《巨輪》提前推出,幫佢造勢。不過計媽咪姐話,查實係捧陳展鵬(煎 pan)呢隻黑馬至真!

阿哥,啲靚女俾你溝曬啦!(設計對白)

細佬,你老實咪發達囉!(設計對白)

媽咪姐八到今次飾演警察嘅煎 pan,為人急功近利,有份正職都唔心足,仲想搵大錢,同名媛貝安琪打得火熱,搞到女友鍾嘉欣傷心欲絕。最賤嘅係佢炒燶孖展,竟然諗到綁架親細佬蕭正楠同嘉欣 BB攞錢。奸到咁出位,隨時跟住 Sam哥同 Caption Cool,榮升師奶殺手喎!

嘉欣 BB 千金愛上窮警察

嘉欣 BB錫身,只限咀嘴,之不過,劇中飾演富家女設計師嘅佢,餐餐做人質,要喺十幾層樓工廈外,同救佢嘅窮警察陳展鵬吊足成日,又事必要喊,都咪話唔辛苦!

有次嘉欣 BB經過金舖,咁啱遇到劫案,被挾持做人質。陳展鵬又咁啱負責呢單案,飛身兼開槍,終於救咗嘉欣 BB。

英雄救美條橋係有啲娘,但浪漫嘛!自此嘉欣 BB順理成章愛上煎 pan,不過豪門二奶、阿媽謝雪心就唔多 like,兩母女更不時起爭執。

最冧!

學嘉欣 BB話齋,佢同展鵬只有咀戲,仲咀得好斯文㖭!佢亦唔會為攞視後,而放棄底線拍牀上戲。各位宅男請放心!

陳展鵬 貪錢搭上貝安琪

之前做開律師醫生正人君子嘅煎 pan,今次做壞男人,為求攞着數,瞞住正印鍾嘉欣,搭上市公司 CEO個女貝安琪,車輪咀不停!佢都話呢次係拍劇以嚟最激。咦,挑戰好咀得嘅馬明喎!

最 hot

陳展鵬有個嘉欣 BB做女友,暗啞底亦貪名媛貝安琪有唔少股票貼士,而同佢發展出曖昧關係,仲喺泳池火辣肉搏,最後兩人搞上咗。不過拍呢場戲時得 13度,咀得㷫,但凍到癲!

呢幕浴室偷情戲,意識都幾大膽㗎!之後梗係俾嘉欣 BB知道,又使出佢最拿手嘅喊戲。各位觀眾拎定紙巾啦!

做警察嘅煎 pan,同小混混張繼聰識於微時,一直互惠互利。佢即係半個黑警囉!

學校造勢

陳展鵬、蕭正楠同一眾劇中演員排隊入佢哋二人嘅母校聖紀文小學做宣傳,講劇中嘅香港情懷,受到學生師妹熱烈歡迎。完全係「衣錦還鄉」 feel呀!

鍾嘉欣同李亞男喺劇中飾演豪門姊妹,周三( 18日)出席宣傳活動時,就「自動波」當眾咀嘴。

蕭正楠 忠忠直直賣糖食

蕭正楠係就係俾陳展鵬搶曬鏡,但佢扮演嘅澳門窮小子,其實係套劇嘅贊助商,澳門鉅記老細嘅投射,所以有大把相關廣告拍,有錢賺又吸人氣,都 good㗎!

蕭正楠係陳展鵬同母異父嘅細佬,喺澳門長大。佢由車仔檔賣花生糖起家,仲有個好幫得手、暗戀佢嘅死黨田蕊妮。可惜蕭正楠心繫嘉欣 BB,最後阿田亦嫁咗俾暗戀佢嘅阮兆祥。

陳展鵬雖然係大奸角,但其實衰唔曬!佢喺香港搵到錢,就借錢俾蕭正楠喺澳門開舖,仲愈做愈大,阿媽李司棋好安慰。

綁架爭女一鑊熟

除咗火辣片段,兄弟情仇、警匪大戰呢啲經典嘢, TVB又點會漏咗你呢!今次最搏命嗰個,梗係煎 pan,做完警察又要做綁匪,追趕跑跳吊做齊。最後,就梗係邪不能勝正啦!你睇緊嘅係 TVB。

陳展鵬恃住有貝安琪俾貼士,沉淪股海,最終遇上金融風暴,一鋪清袋兼負債纍纍。佢原本想跳樓,不過最後走咗去綁架細佬同女友,仲從後攬實嘉欣 BB,嚇到佢死死吓!

雖然蕭正楠俾煎 pan用槍指頭要錢,但佢始終感激呢個大佬,唔想報警。

後尾好在蕭正楠諗到計仔,救自己同嘉欣 BB離開。嘉欣 BB對煎 pan死心,蕭正楠又對佢咁有心……結局係點?賣個關子先,唔係邊有 mood追劇。



鍾意就快D Share啦!