網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年9月18日 星期三

獨家偷拍 鋪路引退 繼承廈門地產王國 林峯吳千語教堂試婚




觀禮初期心不在焉的千語 BB,要林峯出手呵番先有笑容!

封面

獨家偷拍 鋪路引退 繼承廈門地產王國 林峯吳千語教堂試婚

林峯自從與吳千語拍拖後,轉性戒蒲戒玩,又送貴袋又豪 trip,連開工都要帶埋 BB先安樂。

33歲大個仔,係時候諗吓將來,去年林峯已經自爆有意退出娛樂圈,返廈門幫手打理市值超過 20億的地產王國。

據知與 TVB只剩 1年合約的林峯,遲遲未肯動筆簽新約,就算當住經理人面前舊事重提,林峯都直言有可能唔再續約,全面接手家族生意。肯放低明星身份轉型從商,除了來自家庭壓力、更大原因是希望盡快成家立室。上週六( 14日),林峯同千語 BB出席黃百鳴兒子黃子桓婚禮,下午本刊獨家直擊教堂現場,林峯和吳千語十足預演行禮。對住 BB,林峯真係無力抵擋。

其他影片

上週五( 13日),林峯出席活動時非常風騷,雖然否認自己開工作室的傳聞,但卻直認未必一定續約 TVB,他對本刊記者說︰「我仲有 1年約,但𠵱家樂小姐都未搵我喎,可能公司唔需要我喇!我未必會續約!其實屋企人一直都想我返去幫手,始終我都係大仔,都唔能夠唔理屋企生意。我暫時未計劃出年嘅工作,下一步係點,要同屋企人商量,我都想平衡番我嘅生活,唔想淨係日拍夜拍!」

互掃手仔

見 BB開始受氹,林峯再出招引女友笑, BB仲主動捉住林峯隻手,睇吓 chok峯甜到呢!

捉實

新郎新娘交換戒指時,林峯即捉實 BB隻手,好似好感動!

食糖

BB遞咗粒香口膠畀男友,但唔肯當眾親手餵。

禮成後,林峯同 BB望實一對新人(箭嘴示)離場,唔通幻想緊自己好快都會經歷呢幕?

對女友非常細心的林峯,出入都扶實 BB條腰。

新娘做了吳千語經理人多年,兩人感情好好,當晚忍唔住要錫錫祝福。而林峯拍過由新郎黃子桓編劇的《忠烈楊家將》,兩 pair人都好熟!

拉林峯觀禮

林峯口講唔想日拍夜拍,當然係指拍劇,但係拍拖,一日 24小時都唔夠佢用,愛得癡纏的林峯,要抽更多時間陪住得 19歲的千語 BB。上週六( 14日),黃百鳴兒子黃子桓迎娶吳千語經理人鄭嘉敏,與新娘是好姊妹的吳千語,當然睇中機會拉林峯入教堂,預演行禮。

睇見好姊妹成功嫁入豪門, BB化行妝、執到正一正,為免喧賓奪主,林峯只應承出席晚宴,而下午在九龍城浸信會教堂舉行的儀式, BB原本單人出席,但最後都雙雙現身。西裝骨骨的林峯,豪不避忌孖住 BB坐第一行,行禮過程中,林峯睇得相當投入,台上新郎新娘交換戒指時,林峯即時拖實 BB,又出手輕撫女友手臂。

由朝對到晚,去完婚宴都要一齊走。當晚林峯叫司機先去 BB住的金櫻閣兜了一圈,再直駛林峯半山寓所。

20億大少爺

含住金鎖匙出世的林峯,父親林華國係首富,有「廈門李嘉誠」之稱。林家在廈門經營房產、建材及工程,市內唔少商場同屋苑亦由林家發展,公司亦持有多塊地皮,資產保守估計約有 20億!

林峯與家人感情極好,前年林峯嫲嫲過世,即刻請假出席,相當孝順!

早前林峯的餅印細佬大學畢業,林峯特登帶埋千語 BB飛去美國觀禮。

林家在廈門相當有地位,唔少樓盤都係由佢哋發展。《忽然 1周》圖片

BB唔耐煩

極少接戲的吳千語,榮升峯嫂後狂出騷,身價更由 1萬暴升至 8萬。

可能受到現場溫馨氣氛感染,林峯不時傻笑,但見林峯只係識得笑,冇咩行動, BB開始唔太耐煩,仲面黑黑,要男友又呵番先識笑, BB仲喺手袋拎咗粒香口膠餵林峯食添!

直到下午五時儀式完結,林峯同 BB第一時間由後門上七人車,到尖沙咀一間髮型屋 set頭換飲衫,直到晚上八時才攬住腰到洲際酒店出席婚宴。

當晚要上台唱歌的林峯,專程揀了陶喆的〈愛很簡單〉,既可以送畀一對新人、又可以當眾再向 BB示愛,一舉兩得!由於在場有唔少圈外人出席婚宴,林峯全晚不斷被要求合照,心情大靚的林峯來者不拒,仲慈父上身,抱住陌生人個小朋友唔肯放,仲叫人幫佢同兩位「 BB」影相,恨做老豆恨到出曬面!兩人盡興至 11點,林峯和吳千語繼續連體孖住走,本刊上前問他幾時與 BB結婚,心情靚絕的林公子,連笑「哈哈」十聲,冇答都明曬!

淡出幕前

明知自己年紀唔細,加上同千語關係穩定,中曬 BB降的林峯開始厭倦藝人生活,希望盡快組織家庭。據知林峯有結婚計劃外,婚後希望減少工作,但以現時工作量,要減產的可能性近乎零,唯一辦法就係淡出娛樂圈。

早在去年,林峯已提過有機會引退,一試 fans反應,但隨住在內地劇接劇,事件好快不了了之。但林峯上週忽然再強調,有機會下年接手家族的 20億地產王國,又講明台慶有冇獎都唔重要,放曬聲氣想唔撈!對於愛將萌退意,樂易玲急到破例畀佢公開戀情,樂易玲說︰「佢拍咁多劇、又要做巡迴演唱,好辛苦,都要畀時間佢去旅行、拍吓拖先!」咁又係, TVB一線小生買少見少,梗係要買林大少怕啦!

13/9未必會續約!(真實對白)

林峯上週五出席活動,被問到同 TVB仲有幾耐約時,一臉唔在乎,要問身邊的經理人先知原來得番一年約。

畀佢拍吓拖先!(真實對白)

林峯對上一套 TVB劇已係 12年的《雷霆掃毒》,雖然年底會拍多套無綫劇,但樂易玲似乎冇信心留得住林峯。

抱 B唔放

婚宴期間,林峯攬實個小朋友唔放,千語 BB仲出手撩玩,睇嚟佢兩個都好想快啲生番個喎!

冧唱情歌

雖然要頻頻睇貓紙,但林峯勝在夠投入,不斷望住台下嘅 BB唱「 I love you,無法不愛你……」

好飲得

有傳 Paco有意簽林峯,當晚兩人見面有講有笑,林峯仲介紹埋女友畀對方認識,千語 BB即舉杯飲!好劈得吓喎!

峯語冧 BB

1月 年頭紅館開騷時,林峯對住台下的吳千語唱新歌〈 BB〉,「 BB不想太直接表示, BB這麼唱為了婉轉告知我多麼愛護你。」

4月 錄影《勁歌金曲》時,林峯連講 7次愛 BB,「我好愛好愛好愛好愛好愛好愛好愛 BB!」

8月 有指 BB激喊林峯,兩人即發表聯合聲明澄清,「我倆的關係並未受種種不實報道影響,彼此更一直互相勉勵!」



鍾意就快D Share啦!