張松枝：無綫12年冇加人工
張松枝（36歲）
年資：19年
曾演劇集：《離島特警》演沈天佑、《回到三國》演趙子龍
港版半澤直樹角色：渡真利忍
有「禦用二世祖」之稱的張松枝，在無綫工作了18年，看著一個大家庭因制度變成冰冷沒感情的公司，為追尋夢想，張松枝放棄穩定收入過檔香港電視，得知港視未獲發牌即時失去方向，高呼還我一個電視夢！
「喺無綫18年，後生時好有衝勁，就算有唔開心、困難都好易過，因為有夢想，嗰時公司都似大家庭，但去到中段開始有改變，同同事有啲疏離，感覺有啲鬥爭，做得冇咁開心，去到尾段，政策上改變令我唔係咁接受。
做咗12年都冇加我人工，每次傾續約都話政策係咁，我哋係小演員，根本控制唔到，生活上，人工唔多要慳住用，有時好彩爆到騷，之後幾個月咪可以寬鬆少少，如果冇就要慳，畀埋家用，所剩無幾。
發唔到牌好灰
喺無綫拍劇好多時廠景接外景，外景接廠景，試過只得15分鐘休息，好彩有兩場冇咪可以瞓耐啲囉，拍《回到三國》最辛苦，天氣熱又要著盔甲，打兩嚇已經濕曬，又脫水，冇曬體力，有次差啲休克。
加入港視，老闆王維基同我哋講方向、製作、未來會點，聽到覺得自己有個新希望，家人初時都擔心，如果喺無綫有穩定人工，但我太太講：『如果你唔出去博，你會唔開心。』知道發唔到牌，我可以用震驚嚟形容，好灰，點會咁㗎！可以唔發牌但又冇解釋，個人冇曬方向，乜都可以發生，唔係預計之內，我太太話：『老公，你放心，船到橋頭自然直。』佢安慰番我，家人支持令我冇咁失落。
我仲有8個月就約滿港視，之後條路點行，到時再諗，我會睇王生頭，雖然發牌轉機好渺茫，但我都要講，希望政府可以畀番個夢想我！」
■張松枝（右）獲豬肉檔的波哥支持，令他感到很開心。攝影：陳順禎
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！
|
鍾意就快D Share啦！
|
|
|