掃呢頁CODE去手機

2013年10月4日 星期五

共用髮型師 新劇預留角色 志偉特別照顧陳華鑫




安排靚位

上月 19日,《超級無敵獎門人之終極篇》錄影,志偉刻意安排擔當禮物小姐的陳華鑫企個靚位,無形中增加對方出鏡率。

娛樂喧

共用髮型師 新劇預留角色 志偉特別照顧陳華鑫

曾志偉向來愛提攜後輩,對女後輩當然加多幾錢肉緊。本刊收到消息,最近志偉對上屆落選港姐 Gloria(陳華鑫)極力「照顧」,她除了被安排在《超級無敵獎門人之終極篇》做「禮物小姐」外,亦有份參演由志偉一手籌劃的劇集《 M CLUB》,早前仲升呢做埋《廠出新天地》節目主持。

被重用的陳華鑫,就連排場都升呢。 8月 19日晚《獎門人》錄影前,志偉的專用髮型師阿 Ray,竟親自幫她整頭。錄影期間陳又不時與志偉交頭接耳,看來二人關係密切。

上屆落選港姐陳華鑫( Gloria),加入無綫不足一年,剛於今年無綫藝員訓練班畢業。樣子甜美的她入行資歷尚淺,但現時在無綫竟然身兼至少三個節目,忙到甩轆。

據知陳華鑫受力捧,全因與曾志偉有特別關係。知情者透露:「 Gloria入行前已經識志偉,因為佢爸爸同志偉係朋友,去年參選港姐志偉事前已經知道,仲講明會幫手照顧佢。雖然 Gloria落選,但好快就有嘢做,志偉同啲監製開曬口,叫大家俾多啲機會呢個女仔。今次《獎門人》都安排佢做禮物小姐啦!雖然行行企企,但有志偉睇住,冇人敢蝦佢。不過志偉唔想太高調,唔會公開講呢個係世姪女。有時收工去消夜,都刻意唔叫 Gloria,費事俾記者影到!」

8月 19日晚《獎門人》節目錄影前,曾志偉及錢嘉樂等人都在一廠化妝 set頭準備錄影,陳華鑫當時亦在一廠門外準備。此時志偉的專用髮型師阿 Ray從化妝間走出去找陳華鑫,仔細檢視她的髮型,並細心整理,之後再返回化妝間幫曾志偉 set頭。

陳華鑫去年參選港姐,身材嬌小,聲音亦嬌嗲。

周一晚( 30日),志偉唔肯回應係咪特別照顧陳華鑫,只係笑住掂行掂過,金剛反而笑住代答。

獎門人向來鍾意照顧新人!(真實對白)

錄影有交流

到正式錄影,陳華鑫站在曾志偉旁邊負責「數銀紙」,其間兩人不時交頭接耳,看似非常熟絡,不過當看見在場記者拍照,兩人又即時停止對話。

陳華鑫有高層關照其實有跡可尋,去年選港姐兩度遭淘汰但又兩度「復活」,當時已傳她被高層欽點。上月初,記者見陳華鑫在無綫西餐廳與訓練班導師鄭丹瑞撐枱腳,兩人午飯一粒鐘有傾有講,其間旦哥更出手觸及陳華鑫的喉嚨仔。原來唔止志偉,就連旦哥亦好錫住這位藝壇初哥。

周一( 30日)晚《獎門人》錄影前,記者問曾志偉是否認識陳華鑫爸爸?是否特別照顧世姪女,所以安排她在 TVB內的工作?曾志偉對記者的提問全都充耳不聞,半句都沒有回應,只笑住急急腳行入化妝間。

停不了的交流

以往志偉同禮物小姐都係一句起兩句止,但他與陳華鑫明顯很熟絡,錄影期間多次有講有笑,甚有交流。

做主持

剛剛訓練班畢業,陳華鑫便與林欣彤、周奕瑋合作主持《廠出新天地》,機會咁多,難怪被指有高層照住。

拍重頭劇

在志偉有份監製的無綫新劇《 M CLUB》內,陳華鑫飾演學生妹,雖然戲份唔算好多,但總算有對白。

專人服侍

為志偉整頭多年的髮型師 Ray,每次《獎門人》錄影都一定出現。他除了要貼身服侍志偉外,亦被發現要照顧埋新人陳華鑫,其他禮物先生與禮物小姐就冇呢個特權囉!

與旦哥撐枱腳

早前陳華鑫被本刊影到在無綫西餐廳與鄭丹瑞撐枱腳,其間旦哥仲出手摸她的喉嚨教她發音。之後錄影《獎門人》旦哥又來探班,可見呢位妹妹仔深得前輩歡心。

志偉舊愛將

落選港姐岑寶兒當年亦被志偉安排做《獎門人》的揸𨋢小姐,因為經常傻吓傻吓發夢遊魂,被獎門人改花名叫「阿夢」,仲帶挈佢出席商業活動,被指受到志偉特別照顧。近年阿夢轉投有線主持《怪談》,成日話自己撞鬼,被封「惡夢」。

陳華鑫:志偉好照顧我!

至於陳華鑫,對於自己「被照顧」,她緊張地回應:「獎門人(曾志偉)對個個都咁照顧,當然都好照顧我啦!佢好 nice㗎。(志偉安排好多 job你做,係咪識你爸爸?)我唔知喎!唔好意思,我要做嘢,拜拜!」身為世叔伯的曾志偉,照顧世姪女其實都好理所當然。

富爸爸背後撐腰

為方便返將軍澳電視城,陳華鑫獨自租住西貢南圍村屋,每日以的士出入。

24歲的陳華鑫, 12年參加香港小姐,雖然未能晉身準決賽,在倫敦首回合被淘汰。但落選後順理成章加入無綫入讀藝訓班,跟鄭丹瑞學演戲,並於今年 6月畢業。

據知陳華鑫家底富貴,經常有 Benz接送,陳爸爸本身做珠寶玉器生意多年,在廣東道擁有地舖。此外陳爸爸亦認識無綫多位高層,與曾志偉最為相熟。陳華鑫入行後由屯門搬出來自住,現時以萬五元租住西貢南圍村屋。



鍾意就快D Share啦!