網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年10月4日 星期五

進擊的堺雅人




亞熱帶

進擊的堺雅人

瘋魔日本,更成為日本電視劇收視神話,喺中、港、台吹起熱潮嘅電視劇《半澤直樹》,冇靚人、冇靚景,靠嘅只係寫實嘅劇本。

以銀行為背景,講出職場爾虞我詐,下屬無懼不知所謂嘅上司,敢以下犯上,加上亮眼金句﹕「以牙還牙,雙倍奉還」,引起一眾打工仔共鳴。劇中飾演半澤直樹嘅堺雅人,出道廿年,終於憑此劇甩掉「萬年老二」惡名,躋身一線之位,無論劇外劇內,成為真真正正「進擊的巨人」。

《半澤直樹》上星期日播出大結局,以平均收視 42%榮登日本本世紀以來日劇收視冠軍寶座。飾演不甘孭鑊而與上司對抗、誓要討回公道嘅銀行職員半澤直樹嘅堺雅人。講真,若喺 1年前,就算標準日劇迷,對佢嘅印象都唔會好深,頂多知道佢曾演出過《篤姬》及近期嘅《律政狂人》(此劇啱啱喺 J2台播映中)而已。

人紅被翻舊帳。 2003年堺雅人喺日劇《給一個夏天的爸爸》入面,以大茄身份演綁架上戶彩嘅綁匪;估唔到十年後,堺雅人同上戶彩再度合作,喺《半澤直樹》飾演恩愛夫妻。

劇集起「瘋」潮,各類周邊物品乘時推出,不過講到最受歡迎嘅,就係 TBS同 JR車站內便利店 Newdays.Kiosk合作嘅「半澤直樹特別版麵包」,據聞每日賣幾百個,真係唔講得笑。

堺雅人實力獲得認同,源起 08年電影《超越巔峰》。佢喺電影入面飾演為追蹤報道 812空難真相而不惜跟警方人員打關係嘅資深記者。

人紅真係連個樣都靚啲。唔信?有圖為證㗎! 09年堺雅人(右)喺電視劇《放課後》個薯樣,同依家係咪差好遠呢?

中佬發威

最近演藝界興起中佬,好似 Cool魔張智霖、阿 Sam吳鎮宇、黎耀祥及歐陽震華等,佢哋唔係賣樣,而係講實力。不過,講到最巴閉嘅,都係年將四十嘅日本阿渣士堺雅人。

39歲,出道 20年嘅堺雅人,屋企希望佢成為政府官員,但醉心演藝嘅佢,喺早稻田大學讀到大三就退學,全身投入藝能界,並加入田邊事務所。老爸老媽嬲到同佢斷關係、斷經濟 8年。堺雅人雖然有決心闖一番事業,可惜由 94年到 04年,仍然無機會成名。據堺雅人自言,喺嗰幾年食白果期間,落泊到要喺路邊摘蒲公英點黑醋嚟食咁淒慘。

12年 6月, NHK電視台製作咗一個名為《不為人知的大英博物館》,節目主持就搵咗堺雅人擔任。

2012年,堺雅人同廣末涼子代表日本演藝界出席上海電影節。

今年 4月結婚嘅堺雅人同菅野美穗,係合拍《大奧續篇》時撻着,拍拖僅 3個月,即告閃婚。

故事講乜

堺雅人飾演嘅半澤直樹同銀行內外勁敵激戰,當中以香川照之(右)飾演嘅大和田常務,係半澤最大仇敵。

《半澤直樹》乃根據池井戶潤嘅漫畫《我們是泡沫入行組》及《我們是花樣泡沫組》改編。內容講半澤直樹細個時,因為銀行拒絕借貸俾爸爸嘅螺絲公司,爸爸喺走投無路下自殺。直樹大學畢業後,以報仇為目標加入該銀行。工作上,雖然食過唔少死貓,但憑佢個人智慧,以及唔怕死性格,同上司及奸人鬥智鬥力。結局當然惡人有惡報,大快人心。

綠葉超勁

《半澤直樹》可以爆紅,除主角堺雅人及劇本外,一眾配角都係實力派演員﹕飾演半澤同期嘅及川光博、瀧藤賢一都有其獨特風格,而演大魔王�香川照之,更係氣場強大、震撼力十足。而演半澤老婆嘅上戶彩,一派賢內助款,跟演情婦嘅壇蜜,都成為話題。



鍾意就快D Share啦!