掃呢頁CODE去手機

2013年10月3日 星期四

發哥有傷 唔敢學阿澤




發哥發嫂注重健康飲食,對杜汶澤減肥,十分支持,但身邊嘅王晶就……

同你吟一吟

發哥有傷 唔敢學阿澤

上星期五(九月二十七日),王晶執導嘅賀歲片《賭城風雲》喺澳門補拍之前因為落雨拍唔成嘅泳池戲。負責露肉落水嘅杜汶澤,經半年時間減食操弗,肥肉走得八八九九,不過,腰腩位置仲有貨賣,未完全變成肌男。

雖然唔夠完美,但同場嘅發哥發嫂依然大讚阿澤瘦咗之後靚仔曬。尤其係發哥,佢話自己要靠行路行山做運動,因為身上仲有好多以前拍戲積落嘅舊傷未搞掂,學似阿澤日日舉重一粒鐘嘅力量型運動,暫時都唔可以做。

阿澤話齋,變瘦係「 3成運動舉重, 7成靠食」。開工放飯,阿澤自備白烚雞肉同雞蛋(每日廿隻唔食蛋黃),其他幾乎戒絕,咁辛苦,都係為咗嚟緊要喺新戲《豪情 2》入面剝衫。

講到呢度,我又聯想起一發不可收拾嘅苟芸慧,佢點解會咁嘅呢呵!

造型搞笑嘅杜汶澤經半年運動舉重減肥,手瓜已經出現線條,但個腩就仲未得。

同監製劉偉強吹緊水嘅發哥攞住雪茄,純粹劇情道具。

上星期二(二十四日),杜汶澤同周秀娜出席新片《爛滾夫鬥爛滾妻》首映,娜姐露胸,阿澤亦忍唔住剝衫,挺胸收腹演大隻。



鍾意就快D Share啦!