小武陪睇樓
上周二（ 5日）中午約 12時許，左手戴了多串佛珠的小武與諸葛紫岐到銅鑼灣一間樓上茶樓嘆茶，其後二人繼續有下場，去了跑馬地豪宅睇樓。
滾熱辣
嫁入豪門生仔贏法拉 揭諸葛搵北京高人發功
昔日兩個薛家新抱陳法拉與諸葛紫岐，鬥到有你冇我，不過隨住法拉與大少薛世恆婚變，諸葛紫岐為二少薛嘉麟懷有身孕，好明顯勝負已分，諸葛跑出，唔使再鬥。
據知，勝利諸葛今日之所以要風得風，全因這兩年間有北京玄學高人小武在背後發功，為她逢凶化吉擋小人兼催運。最近諸葛更在小武指點下，入住全港風水最好的地段——金鐘栢舍——安胎待產。
上周二（ 5日），諸葛紫岐佗住八個月巨肚從寓所步出，陪伴在側正是小武，兩人到酒樓嘆茶，傾到雞啄唔斷。諸葛呢個幸福樣，相比失婚婦陳法拉，真係贏成條街喎！
現年 34歲的諸葛紫岐去年 3月下嫁 Neway二少薛嘉麟，雖然不幸地經歷過一次小產，但她依然未放棄為薛家開枝散葉，年中諸葛紫岐終成功再懷蛇 B，自此母憑子貴。相比昔日鬥到你死我活，與薛世恆婚變的「前大嫂」陳法拉，諸葛幸福指數遙遙領先。現佗住八個月巨肚的諸葛紫岐早前更暗示腹中懷的是男丁，現時出入都有老公薛嘉麟及保鑣貼身護航，排場十足。
據知諸葛幸福背後，原來一直有位北京高人從旁指點，幫她催運擋小人。該名玄學家武妍彤（小武），個子嬌小，有說她 6歲大病後就擁有預知能力，能為客人預測一生。娛圈亦有不少中港台藝人篤信她，關之琳、黎姿、蔡依林都是小武的熟客。
物色風水豪宅
小武與諸葛紫岐相識多年，近兩年更頻頻會面，並為她的家居擺放風水陣。上周二（ 5日）中午 12時許，記者發現小武前往金鐘栢舍，上樓後不久便與戴黑超的諸葛紫岐一齊步出，佗住八個月巨肚的諸葛依然健步如飛，兩人乘坐薛家的七人車到銅鑼灣嘆茶。現場所見，小武與諸葛紫岐閒話家常，每當小武說話諸葛都特別留心。其間記者聽到兩人提及飯後會到跑馬地睇樓，原來諸葛事前已看了幾個樓盤，今次相約小武再過目，看看風水是否適合她居住。兩人傾足兩小時，再坐七人車到跑馬地睇樓，據知諸葛紫岐有意在港島區買豪宅，為將來 BB入讀小一作準備。
金鐘風水好
有指小武能預知未來，看來諸葛對自己的未來亦十分清楚。據知情者透露：「小武同 Marie（諸葛洋名）識咗好多年，佢預測到 Marie好多嘢，講親都中，所以 Marie都好信佢。呢兩年嚟佢教 Marie好多催運方法，仲幫佢改埋名（將梓岐改為紫岐）。之前佢咪同法拉惡鬥嘅，依家 Marie要風得風，要雨得雨。今次小武嚟香港，主要係幫 Marie個胎祈福，同埋幫佢睇樓睇風水，遲啲可能連 BB個名都會俾小武改。」
原本居住在九肚山的諸葛紫岐，近月搬到金鐘的酒店式住宅栢舍安胎，原來都是經過小武的批算。知情者續說：「小武話金鐘一帶風水係全香港最好嘅，旺財旺丁乜都旺，連小武自己都揀金鐘嘅酒店住。佢仲算過 Marie懷孕期間最適合住喺栢舍，所以薛二少即時安排租住栢舍一年。不過第日 BB出世就會有變，小武批算過到時住跑馬地或港島中半山會更好。」據知現時諸葛紫岐正忙於揀樓，早前已睇中三層樓，分別位於跑馬地、港島半山及淺水灣。今次小武來港，正好陪住諸葛紫岐睇樓俾意見。
法拉去向未明
諸葛紫岐在薛家已站穩陣腳，生活無憂，但前大嫂陳法拉前景就未明朗，與大少薛世恆離婚後，感情依然未有着落。事業方面，法拉與無綫已約滿，現在去向未明，變了無主孤魂，還要努力搵錢過新生活。上月中，法拉出席多個公開活動，不過活動後都沒有節目，每次都獨自返回昔日與大少的愛巢何文田半山壹號，感覺孤獨悽涼。
即將榮升媽媽的諸葛紫岐為迎接新生命，做足準備工夫，胎教、添置 BB用品、裝修 BB房，連入學事宜都安排好。周三（ 13日）本刊記者致電諸葛紫岐，對於小武幫她指點迷津，她說：「我同小武係好朋友，大家都係信佛。佢呢排嚟咗香港，大家咪見面敍舊囉！我搬去栢舍係因為近醫院嘛！（係咪搵小武睇風水想買樓？）最近我有同小武睇樓，主要係港島區，我鍾意嘛！不過買邊度？梗係老公話事啦，佢眼光好啲嘛！」
與女星有緣
37歲的北京玄學高人小武，其預知能力除了深受中港兩地富豪高官擁戴，做禦用顧問之外，在娛圈亦與不少女星有緣，部分女星更釣得金龜。除了諸葛紫岐外，小武亦曾預知關之琳、黎姿、張雨綺的未來。
惡鬥 5年
諸葛紫岐由模特兒變成薛家二少奶，其實都經過幾番波折，早年更與大少奶陳法拉大鬥法。惡鬥 5年，終於分勝負。
送別薛家外婆
早年薛世恆外婆去世，身在外地的諸葛紫岐即時飛返香港出席喪禮。當時她與陳法拉的爭鬥非常激烈，兩人都以薛家準新抱身份在喪禮上出現。
小產互片
12年諸葛紫岐經歷小產之痛，陳法拉率先回應事件，口快快代對方說：「冇呀，冇特別事發生！」事後諸葛暗寸法拉多嘴，表示「有事問番我！」之後諸葛出席公開活動時提及腹中 BB，忍不住淚灑當場。
|
鍾意就快D Share啦！
|
|
|
