網頁

請重新LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年12月20日 星期五

[忽然1周 960] 揭視帝賽果內幕 靚靚代夫出頭:玩嘢咩 MW,




吳鎮宇當晚山長水遠搭飛機趕返港出席頒獎禮,結果「混吉」收場。事後他在微博寫上「要還的已還了,謝謝所有投票者,我在電視出現了。」據知,吳鎮宇本計劃預留檔期下年六月拍《衝上》電影版,但現時卻出現變數。

打頭陣

揭視帝賽果內幕 靚靚代夫出頭:玩嘢咩

每年必掀起熱話的無綫台慶頒獎禮曲終人散。賽前大熱的張智霖視帝夢碎,反而身在上海沒有現身的黃子華,卻憑仍未播完的《 My盛 Lady》奪視帝,真係估你唔到。

賽果反高潮,全因高層背後發功,據知有人為了令今次頒獎禮星光熠熠,事前要樂易玲出盡法寶請大星出席,更承諾出席的話必定有獎攞,最終請得「義氣仔女」 Chilam和吳鎮宇現身撐場。遭無綫玩起的 Chilam事後向本刊表示:「下次真係咪搞我!」護夫心切的靚靚則代夫出頭說:「玩嘢咩!曳嗰啲有人理,乖嗰啲冇獎攞!」

其他影片
  • 老公 Chilam失視帝 靚靚「多謝」 TVB

無綫的「萬千星輝賀台慶」頒獎禮在周一( 16日)舉行,視帝視後爆大冷,由缺席的黃子華及擸埋「我最喜愛女角色」的雙料田蕊妮奪得,賽前大熱的張智霖、吳鎮宇及鍾嘉欣全部「倒灶」。

輸視帝的張智霖,當晚和老婆袁詠儀到北角食飯,願賭服輸的他,送上六位數的鑽石鐲俾老婆,而靚靚亦即時寫微博多謝 TVB和各高層,擺明曲線寸無綫。

三度改賽制

據知,今年賽果出人意表,全因背後有高層發功。本刊收到消息,經常掛住「改革」口號的頒獎禮統籌餘詠珊,在頒獎前夕將賽制改完又改,視帝視後由最初全民投票,到頒獎禮前三星期改成一半民意一半由 60人組成的專業評審選出。可是,在頒獎禮前一星期,專業評審竟然由 60人「發水」至 807人,連助導、燈光師等幕後工作人員都有份投票。知情人透露:「 Sandy(餘詠珊)最初決定視帝視後好似舊年咁用全民投票,不過頒獎禮舉行前唔夠一個月,又話要變番一半民意一半公司決定。佢同我哋講,公司咁樣先可以掌握到最後決定權!」

賽前積極備戰

張智霖為了以最佳狀態出席頒獎禮,早前剝衫練跑,又在無綫盆菜宴當晚積極拉票,最終飲恨收場。

用獎𠱁出席

頒獎禮前兩星期,有人忽然透露已經有得獎名單在手,要樂易玲致電 Chilam和吳鎮宇等「外姓人」務必出席。「有高層同樂小姐講,話嚟得就實有獎攞,所以 Chilam同鎮宇一定要現身。其實樂小姐都覺得古怪,因為視帝獎得一個, Chilam同鎮宇都講到明一定要攞視帝先會到,不過佢最後都係收 order做嘢。頒獎禮前兩個禮拜,佢狂打電話同 Whats App俾 Chilam佢哋。點知結果竟然係兩個都冇視帝。」

有樂小姐拍心口保證, Chilam事前推了一個酬勞有 50萬的湖南衞視活動。而正在內地拍攝電視劇《慢慢地陪著你走》的吳鎮宇,亦向劇組請了兩天假出席。可是,最後視帝由冇到的黃子華冷手執個熱煎堆擸咗。據知做中間人的樂易玲,事後卻慘遭兩邊圍插,指她出爾反爾,違返過往的潛規則。

對於 Chilam得豬肉獎而鎮宇慘食白果,樂易玲事後說:「唉!佢兩個真係好唔話得,尤其係鎮宇,佢真係專登搭飛機落嚟撐場,仲要沿途不斷打俾我話就到就到。呢個人情我係欠佢,遲啲要同佢食飯補番數。」

幕後「玩」家

餘詠珊自加入無綫後,與經理人部門的樂易玲被指不和,但餘有老死殼王陳國強照住,話事權大過樂小姐。頒獎禮眾星被耍,據聞樂易玲事後不停接電話,成今次頒獎禮其中一個犧牲品。《蘋果日報》圖片

幫出面

餘最錫的愛將洪永城及黃翠如,居然在頒獎禮上打低嘟姐、志偉等老臣子,奪「最佳節目主持」。二人主持的《走過浮華大地亞洲篇》更撼贏《星夢傳奇》和《獎門人》得「最佳資訊節目」。兩愛將連贏兩獎,餘詠珊幫到出面。

Chilam:一場遊戲

賽果塵埃落定。在頒獎禮台上,寸無綫「唔鍾意自己」的 Chilam,有指事後拒絕無綫安排的後台訪問。 TVB企業傳訊部副總監曾醒明澄清大會當晚的確有通知 Chilam到後台,並對此表示無可奈何。惟 Chilam一方卻表明冇接獲通知,令事件演變成羅生門。

對於失落視帝, Chilam無奈表示只當遊戲一場。

張:張智霖 袁:袁詠儀 記:記者

記:攞唔到視帝係咪好失望?

張:真係冇喎,見到 Sam哥嚟咗,我就預咗自己無㗎啦,係估唔到連 Sam哥都冇!

記:你係賽前大熱喎?

張:大熱係倒灶㗎。我一直都冇乜所謂,呢啲大家講出嚟嘅啫,搞到好似好大件事咁,其實個個都有實力。

記:之前無綫係咪有高層不斷叫你出席,仲同你講攞硬(視帝)?

張:聽公司講,係有人打過幾次電話嚟,但詳細內容唔係好清楚。不過,好似阿靚話齋,遊戲嚟啫。但呢啲遊戲少玩為妙,下次咪搞我(加強語氣)!

Chilam拒絕再玩,批死老公攞唔到視帝的靚靚,當晚慶功時雖然笑笑口回應記者,但字字落地有聲,反諷 TVB,暗撐老公。

袁:真係好多謝 TVB唔俾個獎佢,嗰隻鈪我好鍾意㗎,好彩佢輸咗。

記:會點安慰老公?

袁:唔使啦,一場遊戲啫,要俾佢十年前《十月初五的月光》就俾咗啦,使乜等到依家?

記:戥老公唔抵?

袁:我覺得個賽果幾戲劇性,我都識做 TVB高層㗎,佢哋內部係點我最清楚……玩嘢咩!曳嘅先有獎,乖嘅就冇獎囉!

記:如果俾你做高層,你會點做?

袁:咪繼續唔俾獎佢( Chilam)攞,唔係我邊有禮物收呀。梗係唔俾佢啦,哈哈哈!

願賭服輸

Chilam夫婦與公司老闆蕭定一早已準備鑽石手鐲送給靚靚到北角慶功,輸家 Chilam及贏了手鐲的靚靚,事後即上微博「多謝」無綫,夠曬夭心夭肺。

失大獎謝票

當晚電視城門外大班 fans打算為 Chilam開香檳慶祝攞視帝,而只拿了「我最喜愛男角色」獎的 Chilam,在答謝 fans支持時,才稍現笑容。

電影版危危乎

《衝上 II》收得,加上在頒獎禮中擸埋《最佳劇集》,無綫食髓知味,添食拍第三集和電影版,原本 Chilam和吳鎮宇講明會度期拍攝。不過,如今辣㷫兩個男主角,電影版隨時胎死腹中。知情人透露:「無綫成日諗如意算盤,不過今次你分明耍人,仲點叫人幫你拍呀,叫佢哋咪當人傻至得㗎!」對於拒拍電影版《衝上》,吳鎮宇對記者說:「劇係娘家嘅一定要拍啦,但電影我下年未必有期,而且我唔係套套電影都接,會好審慎揀劇本、導演同對手,拍到嘅機會好微。因為電影係俾錢入場睇嘅,要有好質素,電視係食飯開嚟睇,所以我會冇咁嚴謹!」

至於 Chilam經理人公司蕭定一說:「其實 Chilam嚟緊啲期真係好密,睇鎮宇囉,當然有勁卡士梗係要拍啦,如果搵到周潤發同章子怡做機師空姐,唔通唔拍咩!( Chilam係咪為出席頒獎禮推咗 50萬 job而依家覺得唔抵?)好在大會就我哋,推遲個 job先冇損失,不過呢啲遊戲玩一年就算啦!」

答謝 Fans

身在上海卻爆冷奪視帝的黃子華,接到嘟姐電話時,得知自己攞視帝,一樣唔俾面,明褒暗寸無綫說:「咁呢啲評審真係好專業,個賽果相當有認受性。」其後他在 facebook自拍答謝 fans支持。

網民撐

Chilam在台上問無綫係咪唔鍾意自己,又話自己係義氣仔女,不少網民讚他講得好。

阿田孖老公慶祝

視帝賽果出人意表,至於同是視後大熱的鍾嘉欣,當晚同樣食白果,輸給連攞視後及「我最喜愛女角色」的田蕊妮,就連阿田也覺得不可思議。「我一直無諗過會攞視後,『我最喜愛』有諗過嚇,所以真係好激動。」出爐視後當晚在公司影完相後,便返回加多利山寓所休息。翌日( 17日)她相約老公杜汶澤及父母出外食晚餐慶祝。

對於老婆攞獎,阿澤坦言老婆「好鬼正」,更以她為榮。當問到視帝賽果時,阿澤指自己一早投了給 Chilam,「其實冇諗過係子華攞,我個人覺得 Chilam演得好好,好俾心機,個角色都好突出。」輸視帝,贏民意, Chilam咁諗,可能條氣會順番。

12月 17日 阿澤跌眼鏡

雙料視後頒獎禮翌日(周二)先到尖沙嘴拍劇,然後約埋老公阿澤和父母晚飯慶功。阿澤話老婆攞視後固然開心,但好友 Chilam失視帝令他大跌眼鏡。

廿年辛酸

入行 20年的阿田攞獎喊曬,話以前喺亞視拍劇冇人睇冇人知,依家先似番個演員,道出 20年來辛酸史!

笑容牽強

賽前大熱的鍾嘉欣乜都冇,但都有同電視城門外 fans慶祝。頒獎禮坐足全晚的她,離去時笑容牽強。

過山車心情

Chilam在頒獎禮當晚,最初心情靚爆等攞視帝,誰知到頒獎禮中途,忽見對手吳鎮宇出現,以為視帝要拱手相讓俾鎮宇,點知螳螂捕蟬,黃雀在後,視帝竟然頒俾一個冇到的黃子華,可說打破一直以來的潛規則。那一刻,就算再好戲, Chilam同鎮宇個驚訝又失落嘅表情都呃唔到人囉!

黑面

在頒《最佳劇集》時,吳鎮宇忽然趕到, Chilam面色登時一沉。

驚訝

當視帝爆出是黃子華時, Chilam即時登大雙眼,露出難以置信的表情。

寸爆

最後, Chilam僅分得「我最喜愛男角色」豬肉獎。得獎時,他忍唔住發表「義氣仔女」論:「咁係咪代表 TVB唔鍾意我呢?點解我全民投票先攞到嘅?其實我想講呢,親生仔固然可愛啦,但有一種仔女,都係好可愛……呢啲就係義氣仔女。」寸爆言論就連身邊嘟嘟亦兜唔到。

頒獎禮後, Chilam和吳鎮宇接受《東張西望》訪問,其間二人繼續發功插無綫。 Chilam指自己拍《衝 II》時,根本唔知自己做乜,而吳鎮宇亦暗指《衝 II》劇本質素麻麻,兩個輸家同聲同氣。

緊張

遲大到的吳鎮宇,在整個頒獎禮中,都木起個嘴皺曬眉咁,一臉緊張。

嚇呆

當宣布子華奪得視帝時,見慣大場面的吳鎮宇都即時 O嘴,表情誇張。

無綫在頒獎禮當晚,公布三強得票,在專業評審中排第一的子華,在民意中只得第三。至於在民意中排第一的 Chilam,在專業評審中得分甚低。難怪 Chilam話無綫唔鍾意佢囉。

搞花臣

自從餘詠珊入主無綫出任綜藝科總監,由去年港姐開始,逢大騷必搞新花臣,但外間評語好壞參半。

普選港姐死機

去年港姐 40周年搞普選,決賽出動全台小生花旦撐場,邀請劉德華同劉嘉玲做評判,最後十分鐘三強全民電話投票選冠軍,結果 down機。網上大熱朱千雪僅得季軍,全城噓爆。

視帝受質疑

去年的台慶頒獎禮,餘又要玩全民投票,選出三大獎項「最佳劇集」、「視帝」、「視後」。鬥 fans多的「視帝」原本是林峯囊中物,最後卻由兩屆封帝的黎耀祥奪得,他自己亦難以置信,食白果的林峯 fans炮轟無綫假民主。

《蘋果日報》圖片

威番次

吸收去年失敗經驗,今年無綫再搞港姐穩陣啲,一半評審加一半觀眾投票,投票時間有一星期,方便計數亦唔會 down機,結果大熱陳凱琳奪冠,叫做威番次。

黑視後撻 Q

近幾年視後人選,無獨有偶是清一色黑衫奪獎,以為實食冇黐牙的鍾嘉欣當晚刻意穿上一件黑色斜膊裙現身,點知今勻都食白果!

黑白雙煞

鍾嘉欣和阿田老友鬼鬼,賽前約好黑白雙煞兼扮鬼臉出席頒獎禮,諗住輸嘅阿田著白色,嘉欣 BB就著「視後黑」晚裝。

去年視後

全黑 tube dress

去年憑《名媛望族》咬破劉松仁口唇一幕令人留下深刻印象,做四姨太的楊怡得封後,當晚亦穿全黑 tube dress。

11年視後

黑羽毛

11年憑《怒火街頭》首奪視後發表「愛澤宣言」(前男友黃宗澤),杏兒同樣是穿黑色羽毛晚裝。

10年視後

Wyman黑戰衣

鄧萃雯 10年憑《巾幗梟雄之義海豪情》九姑娘一角再得視後,好友 Wyman做了一紅一黑戰衣給她,她先穿紅衣行紅地氈,宣布得獎時換上黑色套裝,結果無往不利。

其他影片
  • 老公 Chilam失視帝 靚靚「多謝」 TVB


鍾意就快D Share啦!


Related Posts Plugin for WordPress, Blogger...