掃呢頁CODE去手機

2013年12月5日 星期四

[壹週刊 1239 ] TB汪 月賜 20萬家用 狐狸馬賽新加坡豪賭 馬賽,M1,




爛賭樣

潛水日子,馬賽同汪子琦(黃衫)到新加坡的金沙賭場豪賭。有賭客指她每次落注十萬,賭得狼,最後仲輸到面黑黑!

探熱針

TB汪 月賜 20萬家用 狐狸馬賽新加坡豪賭

「純情」馬賽上月初被踢爆做小三,介入內地有米 TB汪子琦的攣情。有纏綿相為證,一度死撐的她大話精無所遁形,形象插水,馬賽採取鴕鳥政策,唔肯硬食。

唔蒲得,但日子其實過得相當風騷快活!獨霸水喉後,有指馬賽每月獲發家用二十萬,在新加坡遊山玩水期間,更被發現在當地賭場豪賭外,她還處心積慮,圖謀千萬半山豪宅。

批中馬賽貪得無厭的正印 Laura,對於狐狸豪收廿萬家用,啜核反擊:「食 turkey(火雞)都唔使咁貴!」

發現有賭客偷影佢,手風唔順又無化妝的馬賽即揮手叫停!攣情踢爆前,愛穿黃色的汪子琦曾把二人合照放上微博。

兩個月燒二百萬

爆出攣情後,即時潛水的馬賽發放「慈悲論」試水溫圖翻身,卻被 TB汪子琦正印、富婆 Laura數爆惡行,令馬賽繼續龜縮。避世近一個月,馬賽雖因攣情被擲入雪櫃斷米路,但有水喉在手,馬賽於是在 TB汪身上盡情閹割。

據了解,汪子琦對馬賽極為慷慨,每月有二十萬做家用,其他購物消費又另計,加埋不斷送名牌送珠寶首飾,過去一個月繼續把臂同遊,先後到新加坡、越南等多個地方度假及豪賭,有指馬賽攣情展開僅僅兩個月,汪子琦在她身上已燒錢超過二百萬。

汪子琦中「馬瘟」,有指汪父十分不滿,被激到入醫院。

「子琦老豆一直當 Laura新抱看待,知道個女迷曬落馬賽度,激到入咗醫院。但馬賽仲咬住唔放,纏住子琦出埠玩,玩咗半個月!子琦一向好孝順,但今次好似俾鬼迷咁,完全唔理家人反對。」知情者爆。

正印 Laura:食火雞都唔使咁貴(真實對白)

上週六( 30/11) Laura離港返上海,聞言汪子琦給馬賽廿萬家用,她即寸對方唔值呢個價。

上月初,馬賽飛到上海跟汪子琦啜爆,攣情斷正即潛水避世。

辣媽聯手擸豪宅

上月中,唔使做每月起碼有廿萬零用的馬賽,被人發現孖住汪子琦出現新加坡的金沙賭場,豪玩上限十萬坡幣(約六十多萬港幣)一注的百家樂,埋賭枱現真身,馬賽賭相專業,嗌牌面不改容。

「佢好似忘記自己係藝人身份,鋪鋪嗌牌,賭得好投入。十萬十萬(港幣)咁落注,好搏。但佢哋手氣唔好,兩個人都輸錢,馬賽仲輸到黑曬面!」一名目擊者說。

處心積慮搶碼頭,馬賽得手後火速現形。據悉,馬賽的母親見汪子琦正沉溺在女兒溫柔香,於是獻計擸嘢!要求汪子琦將在港投資、市值二千多萬的半山豪宅轉到馬賽名下。

馬賽辣媽

廿萬家用嫌未夠!有指早前馬賽聯同辣母,出招向汪子琦苛索千萬豪宅。而保養得宜的馬母,同愛女拼埋似兩姊妹多啲!

上週秘密返港

擸豪宅事敗後,返港匿了多日的馬賽,終在上週二( 26/11)戴住眼鏡,笠埋 cap帽,載住辣媽出動,往邵氏片場跟樂易玲密會,為本週復出商討對策。

驚動汪家插手

「子琦原本打算半年後等感情穩定,就買層樓俾馬賽揸手。點知佢哋好心急,拍拖未過三個月,就想擸層樓,兩母女又氹又鬧,軟硬兼施。馬賽個阿媽一日到黑向汪子琦洗腦:『我個女為你犧牲事業,你要補償呀!家用唔夠㗎,有樓先有安全感。』起初子琦嘅屋企人都唔知佢為馬賽係咁燒銀紙,直至佢打電話搵香港經紀問市價同埋轉名手續點搞,先驚動到佢啲親人。」

據知汪子琦的家人即刻出手阻止,知道汪家插手後,馬賽才收手,暫時未有採取進一步𦧲功。

鬼祟入西貢

見完樂易玲第二日,將 cap帽拉低的馬賽漏夜帶埋阿媽去西貢南圍的友人家,一傾三粒鐘。

密會樂易玲復出

被汪家上下𥄫實,狐計不得逞的馬賽,近日開始密謀復出,並氹掂樂易玲收回雪藏令,有指無綫內部已傳出馬賽將於本週現身公開活動,樂易玲更安排她先在公司節目《東張西望》接受訪問,為插水形象拆彈。

上週,馬賽再於微博發功,先後鋪了「寬恕論」和「翻身論」為蒲頭鋪路。對於被正印數爆惡行,馬賽曾向身邊人表示未驚過。

「佢話 Laura唔係圈中人,外界對佢根本冇興趣;相反佢自己係港姐,只要行出嚟解話幾句,就可以冇事。」馬賽身邊人說。

外遊返港的馬賽,一直深居簡出,直至上週二(十一月廿六日)中午,由辣媽傍住,駕車到位於將軍澳的邵氏片場,密會樂易玲商討復出對策。共商大計兩個小時,馬賽才離開。

連日來,無論秘返無綫,或漏夜到西貢探友人,馬賽每次出動,例必拉低 cap帽戴眼鏡,遮遮掩掩。

氹人有一手的馬賽,氹掂汪子琦送錢送名牌及首飾。其中手戴的 Chanel J12手錶正是 TB汪子琦送的小禮物之一。

潛水日子,馬賽同汪子琦雙雙出埠玩顯得小心低調,二人甚少放外遊相上網,唯一在越南時,二人貼出同一外景的單頭相。

正印 Laura連踩兩場

以 VIP身份來港出席 LV新店開幕派對,一身百萬行頭的她獲 LV中國總裁 Philippe招呼。之後再踩去會展睇偶像黎瑞恩演唱會。瘦了一圈的 Laura強裝笑容。

溝到手袋五十萬

馬賽擸樓失敗密謀復出,與此同時,正印富婆 Laura上週四(二十八日)來港,準備翌日以 VIP身份出席 LV新店開幕禮外,順道撐十年無開個唱的偶像黎瑞恩場。

遭馬賽「強搶」後瘦了一圈,一臉憔悴的 Laura上週六(三十日)離開下榻的君悅酒店,往機場準備飛返上海時,本刊上前訪問,對馬賽的吸水狐計,她句句啜核。

壹:馬賽同樂易玲約見面,商量復出!

L:佢唔係霸咗碼頭上咗岸咩!(有冇睇佢喺微博嘅「翻身論」?)佢搣爛咗個兔仔皮,嚟緊換番塊羊皮出嚟撈過!

壹:你係咪知佢喺汪子琦身上攞咗好多錢?

L:攞錢就梗有啦!同佢哋攤牌時,佢溝掂汪子琦只係半個月,我已經知道佢攞咗五十萬,到依家兩個幾月,應該去到七位數字。

壹:知唔知汪子琦一個月俾廿萬家用佢?

L:我唔知俾幾多,但我知係有俾錢。廿萬……(苦笑一下)食 turkey都唔使咁貴!

壹:係咪覺得佢好貪錢?

L: Absolutely(絕對係)!貪錢唔緊要,但唔好扮到唔係為錢,咁樣就好 cheap!

Laura出席 LV活動前一晚,相約陳敏之食飯,一食兩粒鐘,離開時陳敏之扶住情傷的 Laura步出。

疼錫表妹汪子琦的上海富婆毛玉萍,據悉她一直反對汪跟馬賽拍拖。日前她偕兒子 Eric及其女友出席蔡汪的世紀婚宴。

Laura直斥馬賽貪錢,爆她與汪甫一起,就先擸五十萬。



對於馬賽日前在微博發「寬恕論」及「翻身論」, Laura不屑的說:「佢有咩資格講寬恕!呢個戲子唔係連呢個字都要搶嚟講!」。

形象插水,連帶她擔正的劇集《神探高倫布》都不能入圍角逐台慶女主角,只能以《法外風雲》入圍女配角。

今年八月 Laura出錢請馬賽歐遊一個月,當時二人情同姊妹,經常孖住影相。沒想到工於心計的馬賽密謀「奪愛」做小三,前後變臉不足一個月,令 Laura難以接受。



鍾意就快D Share啦!