掃呢頁CODE去手機

2013年12月4日 星期三

[FACE - 341 - 本地娛樂] 新手上路 騰雞 P牌 連詩雅泊車即炒 連詩雅,MF,




真面目

新手上路 騰雞 P牌 連詩雅泊車即炒

明星一向鍾意揸靚車曬命,即使冇牌都要買架貴車請司機先夠威。剛於今年 1月考到車牌的連詩雅,上週四( 28日)幫 nowTV拍新節目《 On車車 Band友》,首次由紅磡揸車入到新界科學園,沿途被其他車硬 cut險撞,經過自動收費亭又嚇到尖叫,最誇張係同主持比賽泊位時,竟然炒埋落條吹氣柱!

好在 Shiga講明每次出車都會搵朋友傍實,否則香港一班司機真係有排驚!

1月考到牌, Shiga契媽即刻送架舊款 Benz C-class畀契女代步。睇佢揸車表現,舊 Benz襟揸啱曬佢啦!網上圖片

今年 1月成功考到車牌的連詩雅,拎住 P牌(暫准駕駛執照)揸過 5次車出街咁大把,不過依然膽粗粗接手 nowTV新節目《 On車車 Band友》挑戰,先由紅磡碼頭揸入科學園,再同節目主持樂隊 Dear Jane成員鬥快泊車。

嚇到尖叫

有教車師傅同 Dear Jane主音 Tim傍住, P牌 Shiga出發前做足準備,睇鏡校位做到齊,但途中依然驚險不斷。由於 Shiga全程保持「安全車速」,唔少趕時間司機急住爬頭,爭少少同 Shiga相撞;經過隧道自動收費亭時, Shiga驚條通道太窄會撞,竟然嚇到尖叫,唔知以為玩緊過山車!

之前阿 Sa話學車時被粉絲認出,影響駕駛心情,好在 Shiga冇遇到狂迷,否則以佢新牌仔咁少路面經驗,分分鐘出事!

Take 1 撞柱

節目要佢哋鬥快泊車,眼見 Dear Jane極速泊到車, Shiga非常心急,點知愈急愈累事,車頭一嘢撞埋條柱,好在係吹氣咋!

Take 2 搞掂

工作人員醒多次機會, Shiga即醒定泊多次,終於冇掂到任何障礙物,成功泊到位!但睇真啲,個位其實闊到貨車都泊得落。

唔識分左右

Dear Jane主音 Tim以 8秒極速泊掂,跟住係 12秒 Jackal、 14秒 Howie, Shiga就用咗 55秒包尾!

路面經驗可以慢慢儲,最大鑊係 Shiga原來唔太識分左右!駕駛期間師傅叫佢「轉左」,但 Shiga竟然要諗一陣先知轉邊個方向,後來師傅索性話「轉向我嗰邊」, Shiga先識分!比賽泊車時, Shiga又論論盡盡睇錯位,左邊車頭炒埋落條吹氣柱,最後足足成分鐘先泊掂!

事後 Shiga都認自己唔夠淡定,「我好驚身邊有好多車,一有車迫埋嚟我就騰雞!雖然我嘅 dream car係 Audi A4(約 38萬),不過個個都話新牌仔唔好買咁貴,所以我都諗緊買架二手車仔算喇!」其實不如補補鐘先!

輪住玩

now芒果台新節目《 On車車 Band友》將於 Boxing Day( 26/12)首播,總共有 20集,陳嘉桓、周柏豪同官恩娜等將會陸續參加。除了集集唔同嘉賓挑戰不同關於車的任務,主持 Dear Jane 4位成員又會介紹車壇最新資訊,親自試玩新車,仲會飛去世界各地搜刮最潮玩意,車迷必睇啦!

娛樂學神

搵完 Shiga做嘉賓, Dear Jane跟住仲有邊個可以搵?唔講唔知,原來呢期圈中學車大熱,大把選擇!不過想請無綫班學神上 now節目,難度應該仲高!

蔡卓妍

唔係阿 Sa自爆,都唔知原來佢唔識揸車,啱啱過完 31歲生日至開始學。咁又係,一夠 18歲已經入行搵食,仲邊有時間學車?

梁烈唯

拍完《飛虎Ⅱ》嘅梁烈唯竟然唔係忙住籌備明年婚禮,係報咗駕駛學校學電單車。其實成家立室即係家庭成員會增多,兩個位邊夠坐?

龔嘉欣

年中龔嘉欣被踢爆約埋港男袁偉豪一齊學電單車,更因為學車日對夜對撻著。不過半年後無論新戀情定新車牌都唔覺當事人有提過。

衞蘭

學車先決條件唔係錢,而係時間。所以近年香港工作買少見少,衞蘭亦就多咗時間學油畫,亦學緊車。



鍾意就快D Share啦!