掃呢頁CODE去手機

2013年12月18日 星期三

[FACE 343] 頸傷迫住早睡早起 阿佘勁擦大家樂早餐 阿佘,佘詩曼,MF,




週一( 16日)朝早,阿佘同好姊妹周家怡孖住去灣仔瑞安中心嘅大家樂食早餐,雖然話阿佘最近因頸椎移位,搞到冇胃口暴瘦 10磅得番 93磅,但 FBI見佢揸住塊牛油多士大大啖咁食,話咁快就「 K.O.」咗一份早餐。阿佘話因為醫生開咗止痛藥畀佢,令佢瞓得好啲,所以胃口都好啲。

FBI

頸傷迫住早睡早起 阿佘勁擦大家樂早餐

近年轉戰內地賺人仔、已經 38歲嘅佘詩曼,雖然最近宣布回歸 TVB,仲會喺下年 1月拍新劇《使徒行者》,但好衰唔衰早排竟然整傷條頸搞到頸椎移位,有報道話佢嘅體重由原本 103磅暴跌至 93磅。

FBI呢排同阿佘特別有緣,繼上星期撞到阿佘逛 Ikea,星期一早上等緊「著婚紗踩場」主角活希兒返律師樓時,竟然又喺灣仔瑞安中心撞到佢,當時阿佘就孖住好姊妹周家怡喺大家樂食廿幾蚊早餐,阿佘生活真平實。阿佘話過因為頸傷所以要盡量休息,呢日 FBI朝早 10點發現阿佘, FBI見佢不知幾好胃口,成個早餐大啖大啖咁食落肚,其間仲同周家怡一輪嘴講嘢。

之後等阿佘食完個早餐, FBI走埋去同佢吹番幾嘴,原來阿佘咁早起身係因為 passport就嚟過期要去入境處續領,但當 FBI問到呢晚 TVB選視帝、視後會揀邊個時,人緣極之好嘅阿佘就好識做話:「個個都好。」但再問佢會唔會畀面出席,阿佘同周家怡即好避忌各自揸車走人。

阿佘同周家怡食完早餐,見到 FBI都冇左閃右避,但問阿佘會唔會出席 TVB當晚舉行嘅《萬千星輝頒獎禮》,阿佘笑而不答,而好姊妹周家怡更即刻手指指同阿佘講停車場喺另一邊,叫佢快啲去攞車。兩姊妹即分頭攞車走人,唔使驚到咁誇張嘛?

阿佘喺圈中出名人緣好,上週六( 14日)晚,阮兆祥舉行入行 29年首個處女騷,阿佘亦畀面上台做嘉賓幫祥仔打氣,勁有義氣。

新劇《使徒行者》要到下年 1月先開拍,阿佘趁𠵱家養傷期間狂接騷掘金,好似除夕就拍住陳豪出席將軍澳新都城商場騷搵真銀。



鍾意就快D Share啦!