掃呢頁CODE去手機

2013年12月18日 星期三

[FACE 343] 難分雌英 夾男友做騷 變性美女 Poyd素顏玩 Pure




雖然 Poyd唔係天生女人,但論索程度真係好多𡃁模都拍唔住佢。難怪張家輝都話頂唔順,要睇 AV確定自己性取向。

真面目

難分雌英 夾男友做騷 變性美女 Poyd素顏玩 Pure

上映唔夠兩星期嘅《掃毒》香港票房邁向 2千萬,內地更過 2億,成近期港產片最強。《掃毒》最大賣點除了 3位影帝大鬥演技,更多人談論於片中飾演張家輝老婆的 28歲泰國變性人 Poyd。

原來今年才紅到香港的 Poyd自 04年於變性人選美會奪冠走紅後,到過台灣及日本出席綜藝節目, 11年於日本 TBS電視節目接受主持人訪問時更大曬素顏,精緻的五官、細緻的毛孔,真係索過、純過唔少真女人,難怪連鍾楚紅都忍唔住公開讚 Poyd又靚又自然。

27歲 Poyd原名 Treechada Petcharat,大部分人稱呼「她」做 Nong Poy( Npog泰文意思係小妹, Poy是寶石), 17歲通過變性手術後由男變女。 04年 19歲 Poyd於變性人選美比賽《 Miss International Queen》及《 Miss Tiffany》贏得冠軍後,正式加入娛圈。

11年接受日本 TBS電視台訪問,其間更要 Poyd即席索顏。雖然冇落曬妝,又大眼仔又畫眉,不過睇得出,皮膚好細緻「 Q彈」,相當有「 pure」味。

網上圖片

戲中同張家輝呢幕激吻戲,雖然唔夠一分鐘但夠曬激情,令唔少觀眾留下深刻印象。

天生想做女人

04年 Poyd喺變性人選美奪冠後便正式入行泰國娛樂圈,由於超靚,多年來曾多次被邀請上綜藝及清談節目,玩遊戲及接受訪問。其中包括台灣名嘴吳宗憲的《綜藝最愛憲》及日本 TBS電視台的《衝擊 file 4小時特輯》。而 11年她於《衝》中更玩坦白:「細細個已覺得自己係女仔,屋企人亦接受咗我嘅取向。喺泰國變性其實好平常,我冇受到歧視。」

喺泰國 Poyd同男友 Peerapong Kaoropthai為公認一對, 11年男友仲亮相埋日本 TBS電視台訪問,不過訪問中 Poyd只說跟男友拍拖已 3年,並冇進一步談跟男友的相處及性生活等。

網上圖片

男友除咗係哥爾夫球手外,亦係 model,更為雜誌影過性感露毛封面。

網上圖片

素顏㗎仔讚

靚過好多真女人的 Poyd,一出道即成為女神,吸納唔少男女粉絲。 Poyd在《掃毒》跟男主角張家輝激吻,從而令港人認識,但其實 Poyd早已在家鄉走紅,除了出任化妝品及手機等代言人,亦拍過唔少青春劇和搞笑劇集,當紅程度猶如香港的周秀娜。

常戴假眼睫毛及「大眼仔」的 Poyd原來唔係靠濃妝先靚,玩素顏一樣掂。 11年 Poyd接受日本電視台訪問,除了分享扮靚心得,更玩落妝曬素顏。皮膚細緻加上白裏透紅,令一眾㗎仔大讚:「 kawaii」(可愛)。

Poyd現身處泰國布吉度假中,仲同大象錫錫,本週三會再嚟香港出席《掃毒》慶功。

網上圖片

Poyd除咗喺泰國拍劇及做 model外,亦接咗唔少廣告代言工作。最近就為泰國 FureFoo化妝品牌做代言人。

網上圖片

少男變「少時」

Poyd出身於小康之家,自小被家人視為掌上明珠, 17歲決定變性,兩年後更參加變性人選美奪冠,美貌拍得住少時成員。

網上圖片

6歲

6歲 Poyd係一個可愛小男孩,絕對估唔到長大後會做變性人。

網上圖片

14歲

中學時期嘅 Poyd眉清目秀,而且仲有啲混血兒 feel,唔做女人其實都係靚仔一名。

網上圖片

17歲

Poyd決定做變性手術,手術前更服食大量女性荷爾蒙。

19歲

參加 Miss Tiffany變性人選美攞冠軍,之後再參加國際變性人選舉《 Miss Queen International》,亦奪冠軍。

夾男友出鏡

最近有傳 Poyd早年已秘密結婚,但泰國傳媒均報道 Poyd有一名拍拖多年男友,而於 11年的日本節目訪問中, Poyd更拉埋男友現身。雖然於香港面對傳媒質詢已婚傳聞時, Poyd指對方係 ex-boyfriend,但喺 Poyd的 facebook依然見到二人甜蜜合照。 Poyd男友名叫 Peerapong Kaoropthai,是泰國哥爾夫球手,亦兼任 model,條件不錯。

雖然 Poyd驚為天人,又有個靚仔男友,但身為變性人,護照永遠也會印上「 Transexual」,不免會被歧視, Poyd曾提到香港的入境處曾當她是犯人,「當時讀緊大學二年級,過境時被入境處職員叫我入房,佢哋態度好差當我犯人咁審……我去過美國、日本、歐洲甚至中國也沒有這問題。」香港要做國際都會,就要識「大愛」啦。



鍾意就快D Share啦!