掃呢頁CODE去手機

2014年1月3日 星期五

[忽然1周 962] 51歲狄美摩亞 熟女又逢春 BKD_S,MW,




索爆熟女

現年 51歲嘅狄美有胸有腰亦有籮,係個肚皮唔爭氣,洩漏咗年齡秘密。

歐洋風

51歲狄美摩亞 熟女又逢春

幸福,係要主動爭取嘅!

曾經係 90年代女神嘅狄美摩亞,早已經歷兩段婚姻,去到第三段轉行「湊細佬」,揀咗年輕 15歲嘅艾斯頓古查做老公,點知又係衰埋,上年 11月更正式辦妥離婚手續。

無老公一身輕,已經生過 3個小朋友嘅狄美密密物色新歡。早前仲皺住半個肚皮,著住比堅尼色誘死花𡃁。 51歲都咁搏命享受人生,你,仲等咩呢?

踏入 2014,你有咩新年願望先?嗱,咪話世界和平咁籠統呀,除非你有意參加咩咩維和部隊或者做警察啦。

好似 51歲嘅狄美摩亞( Demi Moore),目標好清晰,就係搵個男朋友。佢前後經歷過三段婚姻,又生咗三個女兒,講真,有咩風浪未見過?直頭 nothing to lose啦!

2005年,狄美跟年輕 15載嘅男演員艾斯頓古查拉埋天窗。 2011年醞釀婚變,擾攘一年多,男方正式入紙離婚,經過雙方律師斡旋分家產,兩人正式於上年 11月尾離婚。

艾斯頓古查入紙離婚前,已跟女星美娜古絲拍拖。近日有指女方已告懷孕,兩人將計劃結婚。未知狄美係咪大受打擊,因而高調姣仔。

老嫩通殺

就係呢股霸氣,令狄美桃花不斷。自 2012年尾入紙離婚,已經頻頻有異性埋佢身。之前傳出狄美有畫商男友 Vito Schnabel,同一時間又話佢同餐廳富二代 Harry Morton暗暗撻著,其後更有報道指狄美搭上 Harry父親 Peter Morton。正當父子通殺之際,突然又殺出瑜伽導師 Will Hanigan,幾角關係愈搞愈混亂。

不過一切仲有好大嘅討論空間,仲有第二選擇嘅。就本周一( 12月 30日),狄美去咗墨西哥度新歲,當日佢著上黑色 bikini, 51歲風韻猶存,身段均勻,只嫌肚皮皺咗少少。其間佢黐實不知名新歡,一時坐大髀一時咬耳仔。難得係大女 Rumer在場,狄美都毫無顧忌全力發姣。

都係嗰句,幸福唔係必然,為咗幸福,你可以去到幾盡先?

攬攬錫錫

狄美對住新歡不知幾癡纏,多次主動獻身姣仔。好聽啲叫積極,唔好聽嘅叫飢渴。

跳舞色誘

著住 3點式嘅狄美雙手抓住樹枝,半跪姿態搖來搖去,睇到紋身新歡掩嘴大笑。

大女陪溝仔

阿媽溝仔,大女 Rumer都好識性,自己「掟」埋一邊,同啱啱復合嘅演員男友 Jayson Blair享受日光浴。

上年中,有指狄美搭上瑜伽導師 Will Hanigan。 30歲嘅 Will來自澳洲,平日除咗教瑜伽,更會潛水收集珍珠去賣,職業夠曬特別。



鍾意就快D Share啦!