掃呢頁CODE去手機

2014年1月30日 星期四

[忽然1周 966] 鍾漢良威過劉愷威 劉愷威,鍾漢良,MW,




春晚價 80萬

鍾漢良同近年轉戰內地嘅翁虹齊齊做深圳衞視春晚嘉賓,不過 Wallace收 80萬,身價比翁虹高得多。

媽咪姐

鍾漢良威過劉愷威

當年喺無綫撈唔掂嘅鍾漢良( Wallace),估唔到近呢幾年喺內地愈撈愈掂!媽咪姐收到風佢拍內地劇,閒閒哋每集收 60、 70萬人仔,可以講係全香港小生之冠,貴過大約收 45萬 1集嘅劉愷威同林峯一截。

今年深圳衞視嘅春晚仲指定搵 Wallace表演,仲大拿拿用 80萬人仔請佢!大會安排佢以「大俠」登場,身懷絕世武功「降龍十八掌」,仲要手持「天涯明月刀」,嚟一場「大俠 VS古惑仔」嘅表演,同浩南哥鄭伊健格劍呀! Wallace話:「今次可以同一班古惑仔同場演出好興奮呀,其實之前同伊健係同一間唱片公司,所以一早就識。不過好耐冇見面,今次難得遇上香港人同聲同氣,大家傾咗好耐。」睇嚟結咗婚、多個家嘅伊健,都想向鍾漢良取經,賺多啲人仔喎。

春晚單挑伊健

鍾漢良手持「天涯明月刀」,伊健就拎住「赤劍」出場,佢哋係咁意舞嚇,現場女 fans已經叫到拆天。

當晚除咗鍾漢良外,仲請咗一班古惑佬:鄭伊健、謝天華、錢嘉樂同林曉峰表演。成班麻甩佬喺後台猛咁吹水,個個問 Wallace內地市場情況。

當晚鍾漢良獻唱快歌〈約翰屈伏塔〉,仲特別為春晚排咗新舞。睇歌名就知 Wallace已經完全面向大中華。

跳舞出身●過江先紅

現年 39歲嘅鍾漢良, 93年畢業於 TVB舞蹈訓練班,好快被發掘去拍《少年五虎》,但反應麻麻,好彩後來俾邰正宵帶去台灣發展,一出國語碟即爆紅! 99年後,佢以陽光形象專注拍內地同台灣劇,愈拍愈有,今年就喺新浪微博選舉入面同吳奇隆、韓庚、黃渤並稱為「年度男神」,你都咪話唔傳奇!

昔日鍾漢良喺無綫拍劇,媽咪姐最有印象就係佢喺《親恩情未了》做李影個仔,扮演一個弱智少年。

94年鍾漢良拍住朱健鈞、蘇永康等人演出《少年五虎》,邰正宵睇中劇中嘅朱健鈞,點知中間人帶錯鍾漢良去見佢。最後將錯就錯帶 Wallace去台灣發展,咁就紅咗!



鍾意就快D Share啦!