掃呢頁CODE去手機

2014年1月9日 星期四

[壹週刊 1244] 補番數 北海道十日遊 張家輝氹老婆湊女 家輝,張家輝,M1,




嚟緊仲有三部戲喺手,張家輝趁住元旦,放長假陪老婆囡囡去北海道旅行。

探熱針

補番數 北海道十日遊 張家輝氹老婆湊女

憑《証人》做咗「七料影帝」後,張家輝的身價由○九年唔夠二百萬,不斷上漲至去年初四百萬,但一年之間,片酬最新叫價已經要一千二百萬,加幅驚人!

搵到又捨得使!去年九月,張家輝以九百五十五萬買入跑馬地舊樓單位,寫老婆名,之後再以二百五十萬購入保時捷跑車獎勵自己;他又自爆拍《激戰》時為投入角色同關詠荷分房瞓,所以要放假一個月,一家大細出埠旅行補番數。

言出必行的張家輝平安夜下午,與老婆、囡囡齊齊出發到北海道展開十日之旅,玩到過埋元旦先返,十分盡興。

上車前食支煙

上週四(一月二日),張家輝、關詠荷同七歲囡囡張童 Brittany從北海道返港,張家輝與同行男性友人一馬當先步出閘口,關詠荷跟後, Brittany則坐在行李車上由女友人推住。一行人五喼行李,再額外加多四箱戰利品和一大袋名牌 Burton滑雪用品。

行到去停車場,張家輝先安頓老婆同女兒上車,自己則與司機及菲傭搬行李。搞了一大輪,終於將所有行李全部塞上車,再行埋一邊煲多支煙,才開車返回跑馬地逸廬寓所。

返到屋企, Brittany唔肯自己行,要老豆孭住,氹完囡囡,張家輝再行返轉頭,幫手搬行李上樓。

據公布,二○一三年的十大香港電影票房中,張家輝主演的《激戰》和《掃毒》,分別成為票房賣座冠軍及亞軍。有票房保證,片商紛紛向七料影帝招手。

老婆同囡囡上車後,張家輝同司機搬行李上車,一行人共五喼行李加四箱戰利品,塞爆車尾箱。

上車前,張家輝行埋一邊煲煙。

七歲的囡囡 Brittany,愈大愈似張家輝,餅印一樣。

出發前數天,一家三口曾到銅鑼灣利苑的一間日本餐廳午飯,一見記者影相,關詠荷即叫囡囡用圖書遮面。

返到屋企,張家輝搵埋大廈管理員,將一箱箱戰利品搬上樓。

Brittany全程唔肯用腳行,要老豆揹住落車。

初拍鄭秀文

剛踏入一四年,據知張家輝手上已有三個劇本,農曆年後他先為卓韻芝執導的新片埋位。據知,今次張家輝收順啲,收一千萬片酬,而女主角 Sammi因為與卓韻芝老友,割價袋六百萬。

「 Sammi做個離咗婚嘅女人,佢想買樓,其間遇到做經紀嘅張家輝又係想買樓同女朋友結婚,咁啱張家輝搵到筍盤唔夠錢,叫 Sammi夾份,點知買完政府就推出辣招,層樓賣唔出,兩個被迫一齊住……」一名劇組人員透露。

男女主角兩個加埋都去咗千六萬,卓韻芝一樣搵到老細落疊投資,戲橋明賣港產口味,張家輝初拍鄭秀文,隨時爆到!

過埋農曆年假,張家輝即將拍住 Sammi合演卓韻芝執導的愛情喜劇。

拍攝《掃毒》時,張家輝與泰國變性演員 Poyd濕吻,事後直言「唔敢俾老婆睇!」

財來有方

成為 2013年票房靈藥,張家輝身價十級跳,加埋廣告和內地演出,和味!



鍾意就快D Share啦!