[壹週刊 1245] 有餸冇飯 周柏豪 24萬投牌 冇錢換車 柏豪,周柏豪,M1,

探熱針

有餸冇飯　周柏豪 24萬投牌　冇錢換車

繼元旦日在商台叱吒頒獎禮離奇砌低方大同、王菀之攞唱作人金獎後，周柏豪於週日（一月十二日）舉行的港台中文金曲頒獎禮再奪進步獎，被網民鬧爆是最欠缺公信力得獎者，不過當事人話之你，甚至預先買定禮物，獎勵自己派三張成績表攞九個獎，慶祝豐收！

早有自訂車牌 PH1112的周柏豪，早前再以 24萬拍多個 PH車牌，不過有新車牌又未買新車，得物無所用。

屋企有事使大咗

以潮人自居的周柏豪，上月為個唱產品自創英文名 PAK HO縮寫「 ph」 LOGO，搞到被質疑是抄襲 Planet Hollywood餐廳的標誌，遭人話柄，但他卻繼續將「 PH」發揚光大，用廿四萬投多個自訂 PH車牌。

「佢驚會俾人炒高個價，所以拍賣嗰日搵咗個朋友幫手。其實柏豪都好想快啲用個新車牌，不過又未搵到啱心水嘅車。用咁多錢 bid個車牌，其實都夠買架普通車啦！早排因為屋企有事，佢又用咗一大筆錢，加上要搞網上時裝店，又冇咗一大嚿，搞到而家冇錢買車，個新車牌變咗冇用！」周柏豪身邊人說。

因為冇錢買新車，周柏豪而家揸住的仍是 Audi舊車，車牌依然係 PH1112。（設計圖片）

早前在廣州開演唱會，賣潮嘅周柏豪的場館布置以黑 tone為主，更見到 ph標誌的大旗放場內。

女友幫拖擦商台

成功包裝變潮人後，周柏豪與同一經理人公司出身的餘文樂同聲同氣，組籃球隊「橫洲工業」做隊友再掹車邊黐埋郭富城、沈嘉偉等一班有米人，不過自從發生「食」隊友細妹跟餘文樂反面後，周柏豪唯有靠自己，改埋商台堆。

「柏豪近年都擺好多時間同商台友打關係，佢女友喺 IT做高層，為咗幫柏豪搞好關係，好多時公司有乜著數都會先俾曬啲 DJ；柏豪明知大家 like佢女友，所以專登喺頒獎禮公開多謝對方，仲講到隨時結婚咁款。

搞咁多嘢都係為咗九月紅館演唱會製造話題，以前唔提女友係方便出去溝女，之前先背住女友同 Super Girls個 Heidi一齊，不過佢唔會黐身，玩幾個月就撇，個正印咁幫佢，柏豪識分輕重。」知情者說。

連日來為首個紅館騷做宣傳的周柏豪，自言過去一年收入有七位數字，不過依然未達標。又係喎，買完個牌已經冇錢買車，周柏豪真係要諗諗辦法跑數。

周柏豪早前在泰國拍電影《四非》，扮爛面人，為搵錢，他亦不介意醜樣出鏡。

跟餘文樂曾經一度是好兄弟，其後因溝籃球隊友細妹而疏遠。

去年大豐收的他，跟同經理人公司的連詩雅不時孖住出活動賺錢。

在叱吒攞到「唱作人」金獎，被網民圍剿兼指最欠公信力。

有指他早前力追 Super Girls的 Heidi（右二），不過幾個月貨仔玩完。

圈中靚牌

娛圈潮人講求包裝，身上著乜用乜，全部噏得出；至於出入用嘅四個轆，就算唔係個個有彈藥買幾百萬超跑，都起碼整個靚牌攞個彩！

（《蘋果日報》圖片）

餘文樂 666

被周柏豪視為假想敵的餘文樂，人生第一個靚牌 666據稱係有米前度黃伊汶贈送，而 666跟「樂」諧音，三個樂好快樂。

「 JY」容祖兒

09年，楊受成以 120萬投得「 JY」車牌送給祖兒，作為她加入英皇十周年的紀念禮物。之後再分別以八千及六萬九為她投得代表名字及六月十六日生日的「 JY616」及「 JY6」。

郭富城做「 SKY」「 K1NG」

郭富城愛辣車，對 887車牌亦特別鍾情，理由是「呠呠車」讀起來似 887。此外，他先後以 77萬投得英文名「 AAR0N」、「 K1NG」車牌與「 SKY」，盡顯天王身份。

樂基兒「 GIA」配瑪莎拉蒂

前天王嫂樂基兒的「 GIA」車牌，是 08年生日時黎明以 20萬投得，之後再豪擲 170萬購入瑪莎拉蒂，車連牌一同送給她做生日禮物。

鍾意就快D Share啦！

下一篇 》