掃呢頁CODE去手機

2014年1月28日 星期二

官恩娜字討苦吃喊爆認錯 官恩娜,

被指講風涼話的官恩娜,愈說愈激動,當眾梨花帶雨。


官恩娜字討苦吃喊爆認錯

官恩娜發表「包容內地同胞論」竟惹上麻煩,連宅男女神也冇面畀,被人在facebook洗版式謾罵,她昨亮相公開活動慘成喊包,一字一淚為自己解畫,說到激動處頻「認衰」。對於被質疑國籍問題,官恩娜更揚言願意放棄法國護照,此刻她的心情如「遭家人憎恨討厭」,認真慘情。

歌手官恩娜(Ella)昨現身機場,出席慈善活動送贈愛心禮物,活動由英皇藝人洪傑擔任司儀。原本一件開心事,卻見Ella愁眉深鎖,原來她早前有感而發,重提當初於英國讀書時曾因文化背景差異而遭白眼,故呼籲港人多多包容內地人士,豈料此文一出即觸動網民神經,連夜轉發及留言謾罵,令Ella心情大受影響。

認錯未深入了解

在訪問期間,Ella急忙為自己解畫,公開求諒之餘更嚎哭變花面貓,一度中斷訪問休息回氣。她表示:「我嗰篇文係講生活好細節嘅禮儀,我明白點解班朋友同網民咁憤怒,我係冇感受到佢哋嘅痛苦同壓力,就叫佢哋去接受。其實我冇觸及嗰啲地方(指爭奶粉、爭學位等),但我自己冇盡力避免件事(即誤會)嘅發生,令佢哋唔開心,我係好唔開心,因為我原意真係唔係咁。」

洪傑與官恩娜出席活動,他表示最近接多了司儀工作。
  • 洪傑與官恩娜出席活動,他表示最近接多了司儀工作。
官恩娜一度喊到失聲。
  • 官恩娜一度喊到失聲。

對於網民洗版時質疑她的身份國籍,指她持外國護照大講「風涼話」,此時Ella更失聲痛哭說:「我係喺法屬波利尼西亞嘅大溪地出生,但我攞嘅係香港特區護照,我兩歲就返嚟香港宣誓中文名,父母都係香港人,我好鍾意香港。我知道又會有人話我做戲(指爆喊),我真係明白點解大家會咁嬲,但我只係講緊啲生活細節同禮儀,等同一個人去到其他人地方做咗啲嘢,冇諗過呢啲嘢會令人哋唔開心,但人哋又真係有所謂喎。係我唔啱,應該小心啲,我所講嘅內容完全冇商業因素。」

似被屋企人討厭

愈說愈激動的Ella最後更主動提及人格問題,指自己一向以誠待人,是「藝人」而不是「偽人」:「我做事憑良心,話我係『偽人』,咁即係包括欺騙同呃人,但我從來都冇做過,我只係喺唔了解嘅情況下寫咗一篇文章,令大家誤會。香港是我家,我好鍾意廣東話,依家等同畀屋企人討厭。」

情緒尚未平復的Ella在訪問完畢後,要工作人員護航折返休息室補妝,約10分鐘後始能步出再接受電子媒體訪問。

文:影視組



鍾意就快D Share啦!