網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年1月15日 星期三

[FACE 347 專訪] 給我一個讚 鄭融 鄭融,MF,




面對面

給我一個讚 鄭融

話說在網上搜尋資料,瀏覽到一向以刻薄見稱的網絡大典,儘管鄭融的食煙黑面講粗口事跡一單不漏,甚至人身攻擊被恥笑像菲傭,有一點,倒實事求是:「一般網民對鄭融的歌藝水準並無疑問。」所以話,網民也不只是烏合之眾和鍵盤殺手,也懂得欣賞別人好處,值得一個讚。

話說負面新聞一直被抽秤多年、身材矮小人長得黑最近又被改圖恥笑做「鄭傭」、性格竹昇出曬名直腸直肚得罪人多,鄭融這一天竟要多謝廣大市民網友:「我做咗咁多細路仔嘢,今時今日都可以出碟開演唱會、仲可以喺呢行生存到,所以我話,香港觀眾其實唔係咁刻薄,其實接受能力同包容程度都好高……」剛被人身攻擊竟然感恩和不記仇,亦值得一個讚。

出道十年、今年 29歲,鄭融剛剛舉行了入行以來的首場個人演唱會《 LiveLike18》、剛剛憑歌曲〈非凡人生〉打入《叱吒》十大和最喜愛歌曲五強。大家都說,對於 hit歌不少的鄭融來說,這個演唱會來得有些遲,鄭融卻說,時機剛剛好:「我係呢兩年先至學識感恩、感恩我嘅幸運、感激我嘅歌運、感謝人們嘅包容。當做一場演場會,為嘅係回饋而唔係榮耀,一啲都唔會覺得遲。」

攻擊插爆需要長篇大論,點讚其實很簡單,只要動一下拇指,今天的主題,是放下負能量和偏見,學會欣賞自己欣賞別人,學會「讚」。

我抵讚

上一次和鄭融做訪問是十年前,十年不見,我的鄭融印象全靠新聞報道和網絡截圖,大多都是食煙講粗口和藐嘴藐舌黑口黑面。這一天,見到久違了的鄭融,我才想起來,她十年前就是這樣,直腸直肚、嘻嘻哈哈。當面對面時,我感到的是誠意和投入,但是站在旁觀者的角度,就只會看到她表情誇張戚眉弄眼。你看一個人,黑面又臭寸,又是站在哪個角度?

元旦日剛落幕的《吒吒樂壇頒獎典禮》,鄭融憑〈非凡人生〉兩次上台,分別獲得「專業推介第十位歌曲獎」和「樂壇最熱廣播歌」。

我成日都出事,張張相都黑口黑面好似發緊脾氣,我諗,出事在少年不更事,性格太隨意。我份人好隨意、又比人遲熟,成日都覺得做人計咁多做乜?唔係隨意啲輕鬆啲,做人容易啲、易開心啲咩?喺呢行做,又成日聽到人話呢個好假、嗰個係八婆。一度,我好孩子氣咁諗,扮得咁辛苦做乜喎?再面面俱圓都總要做得唔好嘅時候、都總有露出真面目嘅一刻,咁不如做自己仲好,總好過啲人笑口噬噬背後俾人話笑裏藏刀、惡毒心腸。

入行十年,我出曬名俾人話黑面、一揭開報紙雜誌就俾人影到黑面,我算係好遲鈍,最近呢幾年至意識到,人哋點睇我、呢幾年我唔覺唔覺得罪幾多人。其實我從來唔對人發脾氣,有時嬲起上嚟淨係會嬲自己;其實好多時我唔滿意唔會話人知,過咗去就唔記得咗。前排我至知,原來我啲表情擺曬上面引人誤會,前幾日我至知,原來三年前拍 MV,個導演以為我嬲佢嬲到𠵱家……

去年尾( 12月 7、 8日),出道十年的鄭融終於在 Star Hall舉行入行首次個人演唱會:「呢個係一份禮物,送畀歌迷同對我有期待嘅人。」

一入行我就遇到間好嘅經理人公司、一唱歌我就遇到唔少好歌,今年仲開埋演唱會、第一次打入《叱吒》歌曲五強。最近,我發覺自己唔係淨係要咁樣,我需要多啲人對我嘅人、而唔係淨係歌有肯定。開工怕準備不足做得唔夠好,咪前一日執定五對鞋帶去開工囉!萬無一失個人就擔保會寬容唔會黑面;去到公開場合,我會特登捉住啲熟人傾偈,有個人對住,我咪唔會太鬆懈俾人影到黑面囉!都係做自己、都係忠於自己,有呢個改變我唔係想做一個樣出嚟討人歡心,而係我想尊重自己同自己嘅職業,我想做一個更好嘅自己。

我出走

11年 6月 4日,鄭融接受無綫娛樂主播黃曉明受訪後,疑擺出粗口嘴形被無綫封殺、被網民賜與粗口融稱號:「我少不更事但都仲可以企喺度,係香港人夠包容。」

十年前見鄭融那次,現場其實還有薛凱琪,兩人同年出道、那次出現在同一份樂壇新人介紹稿中、至今兩人還是閨蜜。十年間,經歷過父親破產雙親離異還患上情緒病,薛凱琪成熟老練得多,鄭融卻還在少不更事摸索中,成長速度,當然與個人經歷息息相關。

我諗我太遲熟係因為我太幸福。我係屋企獨女,由細就讀國際學校、出世屋企就有工人姐姐幫媽咪湊、想去邊度玩想學啲乜,爹哋媽咪無限量支持永遠唔使擔心。十七歲陪朋友去讀形象課程,咁就遇到經理人公司 Starz People,俾佢哋當係屋企個妹一樣湊到𠵱家。十幾歲就入行,但係我其實到廿幾歲都冇接觸過社會、冇行出去過屋企同公司,我從來唔知原來好多人冇得食、好多同齡人要做暑期工同兼職幫補、唔知原來國際學校嘅學費唔係平,唔知呢個世界發生緊咩事……

03年出道已經有冠軍歌、已經首登《叱吒》舞台獲得新人金獎,鄭融說近年才懂得感恩:「攞獎係有歌運,唔係我功勞,但係咁多年闖咁多禍,就真係自己孩子氣唔夠專業。」

三年前我開始搬出嚟自己住,又轉咗唱片公司(星娛樂),老闆轉完又轉、同事換完又換,真正係我遇到第一個人生低潮。我開始要自己負責交水電煤單、明白原來唔交會俾人 cut電,開始醒覺原來屋企傢俬電器用用嚇係會壞,要自己搵人整,唔係大大聲嗌媽咪同工人搞掂就得。返唱片公司、不停換合作對象,我開始經歷原來唔係去到邊都似屋企一樣自由自在,有人睇住有人照顧,原來我都要學識喺辦公室生存、學識嗰套溝通方法……

遲過人,但點都好過一世唔面對,唔嘗試獨立,我唔知自己原來未試過靠自己、唔知自己其實溝通能力真係差、講嘢好唔叻。本來係一個井底之蛙,淨係見到自己不足、淨係捉自己錯處,三年前我開始搬出嚟住、開始唔坐保母車,學嚇去搭巴士去搭馬鐵,我先至發覺出邊個世界好大、呢個社會發生緊嘅事唔係離我好遠、原來市區真係多咗好多大陸人……哈哈……

當眼界放大,真係可以對一個人改變好多,與其成日鑽牛角尖、捉自己錯處,不如睇嚇自己擁有幾多嘢好過。當我識感恩嘅時候,唱歌、做人同工作嘅視野變得完全唔同。所以我話呢次演唱會、呢次攞獎,對我意義好唔同,因為我唔係為咗自己去做,我係想用呢個表演同個獎,去回饋每一個愛錫我、包容我、對我有期待嘅人。

我易湊

工作和做人處事,鄭融說自己不計算、不記仇最抵讚。我問她做女朋友,又有甚麼值得讚,她傻笑著給我一個很傻氣的答案:「我好易湊囉!」與劉浩龍拍過四年拖、與監製莊冬昕試過共賦同居、現在與同齡老外舊同學拍拖三年,上月的演唱會卻難得新舊男友都來捧場、莊冬昕身兼演唱會音樂總監。再一次證明,鄭融是個好女友,並不是大多數網民心目中的港女人辦。

我係一個好識遷就人嘅女朋友,男朋友舊年開始被公司調咗去大陸長駐,我哋一樣好穩定。我唔係嗰種佗手 lung腳嘅女朋友、從來唔會 check佢行蹤迫佢交人,我阿媽都話我, BB嗰陣已經好易湊,我諗做女朋友都係一樣,係易湊嗰種。

我仲有一個優點,係夠阿 Q精神。被人飛、被人呃、分手再慘,我都唔會覺得絕望,話畀自己聽,今次唔得咪下次做好啲囉、今次信錯人咪下次醒目啲囉。同工作一樣,衰咗唔好停,迫自己向前行。根本想停都冇得停,呢個世界唔會為你一個人停止轉動。我可能轉數慢、可能做人唔夠面面俱圓,但係我都蠢唔曬㗎,同一個錯誤我唔會犯第二次、信錯一個人下一次就唔會再俾佢呃,呢樣都係一個優點啩?

現時新歡是同齡的中學同學,三年前撻著:「佢做酒店,顧客千奇百怪,一定唔會輕鬆得過我做呢行,我最佩服佢嘅 EQ。」圖片

外形西化,鄭融其實好傳統:「媽咪成日話老咗就去住老人院,屋企得我一粒女,我一定唔會咁做,一定會陪喺佢哋身邊。」《蘋果日報》圖片

與劉浩龍拍過四年拖,分手後互相支持開騷互撐,鄭融演唱會,更連劉浩龍新歡容祖兒都送上花籃以示支持。

誰欠了誰

〈成人對待〉、〈終生學習〉、〈紅綠燈〉、〈東京百貨〉、〈一事無成〉;還有去年大熱、熱到打進《叱吒》五強的〈非凡人生〉, 29歲的鄭融其實已經唱了十年歌、擁有不少代表作。

形象不完美不過會唱能打動人,亦或純如小白兔,不過歌喉千篇一律沒有生命,作為聽歌的人,我寧願選擇有血有肉的藝人,而不想要一個沒有個性和脾氣的偽人。

會唱的香港歌手買少見少,他們沒有欠了誰,鬧少句,讚嚇啦!



鍾意就快D Share啦!