掃呢頁CODE去手機

2014年1月15日 星期三

[FACE 347 專訪] 送十年給你 薛凱琪 薛凱琪,MF,




FACEweekly

送十年給你 薛凱琪

樣子甜到漏、嬌聲細氣的薛凱琪( Fiona),外表點睇都似廿來歲,但訪問前起底才發現,原來佢已踏入 32歲中女之列,'13更係佢入行的第 10年,上月推出個人第 14張專輯《 Tenacious》正正就係作為一個紀念,講緊的唔止係個碟名咁表面,而係佢第一次由 demo、作曲填詞、到造型設計、美術指導、甚至 MV道具、拍攝的製作,其間錄歌錄到一耳失聰,封面仲騷全裸背搏到盡,目的都只係想將十年的成長當作禮物回饋樂迷,各位,呢份心意你收到未?

之前《 August Girl》封面你已試過裸下半身,今次新碟《 Tenacious》

其中一個造型又騷靚背,為甚麼經常半裸上陣?

可能因為我以前讀 art出身,當時成日都好享受畫女仔的裸體,日積月累下培養到我𠵱家覺得裸體可以有好多可塑性,所以《 August Girl》的封面造型我想做出雕塑的感覺,相中戴住個好靚的 head piece,再後期製作將下身皮膚執到好假;今次露背係想表達快歌〈 Contagious〉中主角好清楚自己想要咩的性格,再加紋身去放大呢份感染力。

今次大碟你不但包辦製作,好少歌手好似你咁會為碟中每一首歌設計獨立造型,為甚麼你有這個構思?

今次呢隻碟我由造型、作曲填詞,連印刷的紙、 MV全部都自己一手包辦,好似〈宮若梅〉 MV內的人造雪景我自己都有份鋪雪,錄歌期間又試過耳仔失靈,講真真係做得好辛苦。但係我今次入行第十年唔做呢件咁瘋狂的事,真係唔知第二十年仲有冇機會做,所以我要趁呢個機會將十年來的心血送畀歌迷,希望大家鍾意啦!

你覺得自己 10年後會做甚麼?

10年太遠好難預計,只能靠幻想希望我工作上仲唱緊歌、演緊戲,不過可能冇𠵱家咁搏殺;性格本質上唔會有太大改變,生活上可以搬間更大、有花園的屋,可以養更多貓貓狗狗一齊住;至於感情就隨緣啦!哈哈。如果到時達成唔到以上預期我都可以接受,因為就好似《給十年後的我》呢首舊歌的意思咁,只要我𠵱家活得精采,知道自己做緊咩,並冇因為工作而改變自己的本質就足夠。

你啱啱喺《叱吒》頒獎禮中除自己拎「女歌手銀獎」時喊外,鄭融及陳詠謙分別攞「十大歌曲」及「填詞人大獎」時你亦爆喊,為甚麼咁感觸?

兩位都係我的朋友,我愛鄭融愛到好似係佢阿媽咁,每次見到佢的成長得到好成績都覺得好安慰、好驕傲。至於陳詠謙第一首幫我填的歌係〈字花〉,當時適逢係我抑鬱症之後,希望透過呢首歌令我唔會再害怕開放自己去創作、聽音樂、寫日記,大家一齊成長過,見到佢哋守得雲開見月明好開心。

你𠵱家不時會 post相自嘲自己的身材,為甚麼咁放得開?

經過入行呢十年,我覺得如果仲要將大眾的批評放在眼內,實在活得太辛苦喇!最緊要活得開心,人哋寫得我係覺得有娛樂價值,倒不如我再放大啲,自嘲一下,令自己開心之餘大家又開心,呢個才是最高境界。



鍾意就快D Share啦!