掃呢頁CODE去手機

2014年1月29日 星期三

[FACE 349] 出 Chrissie牌撼 Baby 周秀娜:撈多 2年夠皮 Baby,周秀娜,Angelababy,MF,




12年入股內地內衣品牌 La Miu, Chrissie話從此激發自己的「生意血統」,「原來做生意好好玩,利潤亦龐大,呢兩年我每年都賺到 500萬。」

封面

出 Chrissie牌撼 Baby 周秀娜:撈多 2年夠皮

11年開始北上拍劇, 12年入股埋內地品牌 La Miu賣 bra,去年跟鄭嘉穎拍完套內地劇《葉問》,娜姐即劇價暴漲,由 2萬變 8萬、電影價由 50萬變 150萬人仔。

搵到錢自然想提供好生活給屋企人。上星期本刊發現娜姐入行 5年來首次放長假,更豪使 50萬請全家豪遊北海道。去年狂賺人仔,娜姐話來年要跟初入行死敵 Angelababy睇齊,進軍商界做女強人:「唔係要學人,係我盡得祖籍潮州嘅老豆遺傳,愈做生意愈有興趣,撈多兩年應該(搵)夠……畀首期。」

去年 1月 20日「港台中文金曲頒獎典禮」宣布甩拖,話咁快周秀娜已經飛起前度陳偉成( Avis)一年。往年陪仔推油賀年,今年單身娜姐轉軚陪雙親,上週四( 23日)清晨九點,本刊發現周秀娜帶隊與父母、哥哥及弟弟到達機場,啟程到北海道過一連十天豪華假期。

50萬「包」遊北海道

見慣鏡頭、晨早流流就在機場遇著傳媒,娜姐淡淡定定影相,但就緊張拜託記者手下留情,免讓父母、兄弟樣貌曝光。原來入行 5年的 Chrissie,默默耕耘全年無休,今年第一次放長假,即包食包住包玩包買,帶埋全家去北海道與家人度歲。據悉雖然正值農曆新年旺季,娜姐一樣冇手軟,豪買 5張、每張約 3萬大元商務客位機票、住溫泉酒店、買勻全副滑雪裝備再為父母請埋私人教練;另外全包飲食 shopping使費零用,全程使費約 50萬大元。

入行五年,往年有短假都係約埋男友 Avis泰國推油,今年轉口味陪家人到北海道滑雪,幾時正式搵番個男友。「有男仔追,但係未遇到啱嘅。單身仲好,好耐未試過同屋企人玩得咁開心。」

賣 bra發達

出手闊綽,因為「搵到」。去年初與鄭嘉穎合拍內地電視劇《葉問》,娜姐成功入屋,身價暴漲,劇酬、片酬、廣告及剪綵身價都狂升三、四倍, 12年入股內地內衣品牌 La Miu後兩年來保持每年 500萬傭金收入,除了原定計劃在深圳開內衣店打造中國版「 Victoria's Secret」外,北海道放完假返嚟仲有大搞作。

娜姐話:「其實入股內衣係天時地利人和,同董路( La Miu另一股東)合拍就試嚇。做落又覺得自己真係對生意好有興趣,可能阿爸都係做生意有遺傳啲血統畀我啩。除咗內衣,我已經搵咗全國最大嘅製造同供應商合作,年中就會出自己品牌嘅香水同化妝品等等,會喺淘寶開『 Chrissie Chau』專門店,做落去,梗係想再更加多『 Chrissie Chau』女性用品面市啦!」

跟內地商人董路合作經營內衣品牌 La Miu,但 Chrissie話打算再搏命啲,經營以自己名為名的女士用品王國,誓要打造港版「 Victoria's Secret」。

去年 1月宣布甩拖,一年來 Avis換女友開健身房仲有個人品牌服裝面世, Chrissie唔葡萄:「過咗去就係過咗去,我自己太多嘢做,冇同佢聯絡。」《蘋果日報》圖片

「冇諗過開餐廳仔!」

既開工作室、又成立自家品牌內衣,再出埋自家香水化妝品,有傳快 29歲的 Chrissie打算 35歲前全力向商界發展,係想學前輩狄娜定係想挑戰 Baby Café開完一間又一間嘅 Angelababy先?「咁又唔係話挑戰邊個,但係我不嬲對飲食冇太大興趣,從來冇諗過開餐廳仔喎。我想買間屋好大㗎!餐廳仔,首期都未夠我畀呀!」

賣 bra賣香水再開埋中國版 Victoria's Secret般的內衣旗艦店,咁大盤生意,有望 2年後正式接軌,所以娜姐搵錢夠搏夠盡,呢兩年真係搏殺期,忙完夠皮先等豐收。據悉, 3個星期新年長假放完,二月中開工大吉的 Chrissie,馬年頭炮就係出席記招、宣布與某電影公司簽下 2,500萬十二套戲合約的賣身契,「邊間公司就真係要等到時至公布,跟住三月開電影、五月幫中央電視台拍劇跟無綫小生合作……下次放假唔知等到幾時喇!」

多啲 job搵夠先可以全攻商界,做𡃁版狄娜嘛!

《葉問》掂咗

去年電視劇《葉問》在內地大收,成功入屋加片酬,最新價目係一集 8萬人仔,在內地仍是抵用價。

《爆 3》仆咗

Chrissie去年拍嘅港產片只得票房仆直的卓韻芝作品《爆 3俏嬌娃》, Chrissie話下月會簽約新電影公司,未來還是當拍電影為正職。

闔家滑雪度歲

上週四( 23日),晨早流流與父母及兄弟到達機場,一見有傳媒在場, Chrissie即跟家人分開行,孝順女 Chrissie仲拜託傳媒手下留情:「屋企人唔好影啦……佢哋唔慣呀!」

全包食住使再加每位約 3萬大元商務機位, Chrissie粗略計過共使 50萬:「講咗咁多年至可以放到假陪屋企人,再多啲都抵畀。」

狙擊 Angelababy

Angelababy(楊穎)同 chrissie同於 06年出道,二人當年喺香港鬥餐死,𠵱家就將戰場移去內地。不過 Baby除咗幕前演出外,更開拓埋飲食生意,開設多間 Baby Café;而 Chrissie亦唔執輸,除咗 La Miu內衣生意外,今年仲計劃推出類似 Victoria's Secret嘅女性用品、內衣及香水,兩位𡃁模始祖仲有排鬥。

掛 Angelababy名經營的 Baby Café現時擁有銅鑼灣、旺角、屯門三間分店,不過 Chrissie一樣視為「餐廳仔」,唔恨仿效。設計圖片

入行初期,二人同樣為「𡃁模」,當時同場合遇上已經面阻阻,不和上面。

2013賺到笑

周秀娜決定將吸金重心轉移內地,狂接電視劇及電影,令知名度激增,身家暴漲。埋單計數,娜姐分分鐘穩袋 3千多萬。

電視

每集 8萬人民幣

《唐朝浪漫英雄》

《 X-Girl/妙探三姐妹》

共約 376萬

電影

每套 160萬

《紙月亮》、《西遊.降魔篇》《電梯驚魂》、《爛滾夫鬥爛滾妻》、《致命閃玩》、《冷瞳.貞子再現》、《爆 3俏嬌娃》、《我的美麗王國》、《有招沒招之愛情達人》、《兜售回憶》

共約 1,600萬

剪綵活動

每個約 20萬

3月  Cleo Club Opening

4月  Hunter活動

馬場活動

5月 九龍表行開幕

6月  shu uemura新店剪綵

8月 手袋名店

9月  SaSa開幕剪綵

先施開幕剪綵

THE ONE萬聖節活動

11月 明珠小館開幕

12月  PS4活動發布會

共約 220萬

廣告

每個約 150萬

KFC、 Reduze、 Bossini

領域、生力啤

共約 750萬

其他

《周秀娜夢她處 MONTAGE》寫真集

約 30萬

《度身訂造旅行團》旅遊節目

約 30萬

La Miu分紅

約 500萬

共賺:約$3,506萬



鍾意就快D Share啦!