2014年1月29日 星期三

[FACE 349] 賀歲隻揪 郵輪激戰張晉 謝霆鋒:好放心俾佢打 霆鋒,謝霆鋒,MF,




霆鋒熱愛武術,曾經表示好欣賞張晉,佢話今次終於有得合作,覺得好興奮。

真面目

賀歲隻揪 郵輪激戰張晉 謝霆鋒:好放心俾佢打

仲有幾日就過年,諗定睇邊套賀歲片未?

今年新年賀歲唔只得黃百鳴、曾志偉鬥餐死,仲有吳君如《金雞 SSS》同甄子丹《大鬧天宮》,不過最有睇頭,可能都係「賭神」周潤發回歸,拍住謝霆鋒的《賭城風雲》。賭啤部分由發哥完美演繹,至於霆鋒當然要有動作打戲先係佢風格,其中一場復仇戲,就要同堅識功夫的張晉上郵輪激戰!咁揪得,睇嚟霆鋒有潛質做「龍五」喎!

年三十晚( 30日)上映的《賭城風雲》,以 6,400萬重金邀請發哥以「賭神」姿態回歸,再加埋從未拍過賀歲片的謝霆鋒,單計新鮮感絕對冇得輸。

點都要打

雖然《賭》係賀歲賭片以搞笑為主,不過搵得霆鋒點都要佢露兩手騷下功夫,仲打得勁過當年《賭神》嘅劉華㗎!戲中飾演許紹雄兒子的霆鋒,一方面希望拜賭神周潤發為師,另一方面要為被殺的哥哥伍允龍報仇。

其中一場講霆鋒同仇家手下張晉在郵輪對打,兩人又飛腳又批踭,霆鋒仲一代宗師上身,用詠春同「馬三」船上激戰。雖然張晉係全國武術冠軍,精通多種拳法,不過有武術底子的霆鋒亦唔弱,打足成晚都捱得住冇受傷。

張晉同謝霆鋒拍足成晚打戲都冇用過替身,好在兩個拍慣動作場面,如果唔係隨時第日起唔到身!

張晉識功夫又做過武術指導,拍打戲絕對唔怕傷到霆鋒。

唔用替身

同打得之人隻揪,識英雄重英雄,霆鋒就話:「佢(張晉)嘅功夫好犀利,所以識得點用力、點就位,我都好放心俾佢打,佢亦好放心俾我打,可以同佢合作係好開心好榮幸,同埋都係緣分嚟嘅!」

而張晉亦非常欣賞霆鋒,認為佢完全冇架子,張晉說︰「有時有啲好危險嘅高難度動作,導演會叫替身試位,但霆鋒會自己試,仲同導演講『替身都係人,都有阿媽生!』我都係做替身出身,所以好欣賞佢對幕後人員嘅尊重!」既然兩個打得之人咁投契,不妨約出嚟再切磋,仲可以幫對仔女對嚇親家喎!

霆鋒同「同父異母」哥哥伍允龍切磋詠春,可惜做臥底嘅伍最後被殺。

拍《賭城風雲》前,張晉隻眼曾經受傷,好在霆鋒都識就位,否則分分鐘一傷再傷。

霆鋒同伍允龍私底下好 friend,據知霆鋒嘅詠春都係由伍允龍所教,可以叫聲「師父」!

發哥搶鏡

《賭城風雲》入面的發哥唔再係「高進」,而係識得摸啤牌點數、由賭城退休返澳門養老的高手「石一堅」,而霆鋒飾演的「曬冷」就想拜佢為師做賭神徒弟。

講到明賭神係澳門人,電影上週四( 23日)過大海首映,發哥繼續搶曬鏡!司儀車婉婉邀請發哥上台,緊張到手心出汗,發哥就超幽默回應,「好耐冇見,生意點呀?」反而霆鋒全程戴黑超唔出聲,似保鑣多過主角喎!

首映當晚,發哥不斷被集郵,影合照都影唔停!

89年的《賭神》(左)成為經典,尤其係「高進」的蛋撻頭同賭神朱古力; 2014版的「石一堅」戒咗食糖外,連頭髮都 gel高埋!



鍾意就快D Share啦!
Related Posts Plugin for WordPress, Blogger...