掃呢頁CODE去手機

2014年2月7日 星期五

[忽然1周 967] 馮小剛竟不識李敏鎬 馮小剛,李敏鎬,MW,




李敏鎬喺劇集《繼承者們》入面,不時大賣「肌」情,令粉絲瘋狂,人氣同劇集喺強國紅到癲!

出外埠

馮小剛竟不識李敏鎬

強國近幾年搞「跨年晚會」同「春節晚會」(簡稱「春晚」)都興起搵韓國藝人參與,今年央視「春晚」就搵咗李敏鎬做嘉賓。唔講唔知,李敏鎬參加央視「春晚」,原來背後有段古㗎。

話說日前馮小剛接受 CCTV訪問,自爆本來唔想有「外國人」參與,自己亦唔識邊個係李敏鎬,但有部分人向佢一力推薦(言下之意,出聲嘅當然係有牙力人士啦!),話李敏鎬好有人氣,堅持要搵佢參演。既然有咁多人說話,佢惟有抱住多個唔多、少個唔少,用就用啦嘅心態,安排李敏鎬同庾澄慶合唱〈情非得已〉(李敏鎬當然唱韓文啦!)。

最搞笑係馮小剛話節目當晚,現場幾乎所有觀眾都一窩蜂追捧李敏鎬,佢話到依家仍然唔明白為乜李敏鎬會咁受歡迎?嗱,馮大導今次終於見識到韓國偶像喺強國嘅威力囉!

負責「春晚」嘅總導演馮小剛接受訪問時,坦言完全唔識李敏鎬係乜水?

李敏鎬演出「春晚」,因待遇問題惹起爭議,有傳其酬勞比另一嘉賓同 Celine Dion仲要高外,又要入住離央視較近嘅五星級酒店,而其他演出者只入住「影視之家」。唉,鬼叫佢紅咩!

金鐘國母子名牌發燒友

憑《 Running Man》而人氣飆升嘅「能力者」金鐘國,早前嚟香港出席一個品牌活動後,跟住又去咗台灣開粉絲見面會兼拜年。

今次係佢相隔 15年後再踏足台灣,仲帶埋阿媽一齊,事關佢話阿媽睇咗綜藝節目《花樣爺爺》嘅台灣篇後,成日話風景好靚,好想去睇睇。碰啱今次喺台灣開見面會,於是帶埋阿媽一齊去行嚇。當日佢哋一出現,最吸睛嘅係阿媽手挽嘅 LV手袋同金鐘國嘅同牌子護照夾。

金鐘國外表粗豪,而且別號又叫「老虎」,但睇佢對阿媽嗰種孝順同對粉絲嘅溫柔法,媽咪姐又明白到:人,真係不可以貌相㗎!

金鐘國同阿媽人手一個 LV,足證兩母子都係名牌發燒友。

喺台灣機場受到女粉絲包圍攞簽名,佢開心到話估唔到自己原來有咁多 fans喎!

原來金鐘國係美棋 BB心中男神,可惜金鐘國心中女神原來係周秀娜。美棋 BB唔知有冇失望呢?

金鐘國好識做,喺記招上面,特登著住唐裝衫向粉絲及傳媒拜年。



鍾意就快D Share啦!