掃呢頁CODE去手機

2014年2月14日 星期五

[忽然1周 968] 逢仔抄牌約食飯 楊崢吼鄭俊弘 鄭俊弘,楊崢,MW,




楊崢被爆與自己細九年的黃宗澤拍拖後,臭史愈揭愈多。據知楊做商台《一圈圈》節目時,除向黃攞電話外,其餘大部分男嘉賓都被她抄曬牌,更試過單獨約會部分男嘉賓,實行有殺錯冇放過。

滾熱辣

逢仔抄牌約食飯 楊崢吼鄭俊弘

日前,驚爆 33歲黃宗澤搭上 42歲楊崢後,女方負面新聞不絕,連日來遭踢爆勾人老公、搵有錢佬。臭史爆開有條路,有商台員工向本刊爆料,指楊崢去年加入商台做 881《一圈圈》節目主持後不久,即被同事冠以「抄牌女王」封號。據知,每集男星接受完她訪問,楊崢例必問人攞電話,之後約食飯直落,最終撲中 Bosco。

楊崢大小通殺,就連細她一個 round( 12年)的「星夢幫」鄭俊弘都唔放過,照樣抄牌攞電話約食燭光晚餐,搞到 TVB經理人向商台投訴。女友愛漁翁撒網,花弗 Bosco睇嚟遇到對手了。

其他影片

42歲楊崢高頭大馬,讀書時代已開始做 model。有傳無仔不歡的她,開工時經常掛住拍拖,曾一度遭人「封殺」,不少代理人講明不會找她行騷。直至 95年,她參加超級模特兒大賽,爆大冷鬥贏當年當紅的陳寶蓮(已歿),才升格成為名模。

高調啜啜

上周, 42歲楊崢和 33歲黃宗澤在西貢白沙灣餐廳高調咀嘴,遭網友放上網,姊弟戀正式曝光。

男方扯火

姊弟戀炒得㷫烚烚,女方更高姿態的表明歡迎情侶檔搵銀,相反母親遭追訪的黃宗澤,日前卻扯火說:「禍不及家人,老人家血壓高,萬一暈咗點算?」

人夫老嫩通殺

做咗名模,有傳楊崢早年與黃佩霞有米老外男友、伍詠薇老公練海棠打得火熱。近年就與楊如芯、人夫李丞責傳緋聞,男女老嫩通殺。

12年尾,她加入商台做 DJ,夥拍梁泰來及何基佑等,為 881節目《一圈圈》任主持。在商台工作年半,據知其工作態度一直遭同事詬病,除了做節目時冇準備,更試過 no show。但最令商台上下竊竊私語的,是她經常向男嘉賓「抄牌」,更因私下約會做過節目的男星出街,而遭男星經理人投訴,自此商台員工背後均稱她做「抄牌女王」。

搞喊鄭俊弘

早前,楊崢在節目中邀請上緊位的鄭俊弘做嘉賓。節目中,她多次提到鄭已去世的外公,結果鄭俊弘喊足成個節目,事後有網友鬧爆楊崢為求增加收聽率,刻意搞喊對方。

約食燭光晚餐

節目完後,楊崢即向 30歲鄭俊弘索電話,更表明要請食晚飯多謝對方。鄭赴約當晚,卻發現對方 book了中環一間出名的意大利餐廳食 candle night晚餐,其間女方多次表明自己恨拍拖。

約 Fred撐枱腳

據商台員工透露,楊崢每逢與節目的男嘉賓訪問結束後,例必啟動辣仔三式:一.問人攞電話,二.約食飯,三.飯後再約睇戲、行山等,不論對方有冇老婆女友、紅定唔紅、彼此的年紀差距。「舊年十月,阿 Fred(鄭俊弘)啱啱攞咗『星夢』冠軍,之後商台聯絡阿 Fred經理人做《一圈圈》訪問。點知做完訪問, Venessa(楊崢)就私底下問咗阿 Fred攞電話,阿 Fred禮貌上俾咗佢,點知 Venessa即晚打俾阿 Fred,約佢食飯話要多謝佢。原本 Fred諗住交多個朋友,所以應承食飯,不過去到先知係食 candle night晚餐。」事後楊崢還向商台一位傾得埋 DJ透露「戰績」,但約會消息最後傳到 Fred的經理人耳中。「 Fred個經理人好嬲。佢覺得阿 Fred今次冇經驗,哦咗佢一輪話唔准有下次。佢亦都有打去商台,投訴楊小姐越權,約星嗰陣冇知會佢,公私不分。」

已婚男照抄

楊崢主持《一圈圈》年多以來,訪問過不少男星,當中不乏已婚或有固定女友的男嘉賓,如伍允龍和陳豪等,楊崢一樣照辦煮碗,抄完牌再約食飯。

主動試蠔吧

鄭俊弘冇下文,但進取楊崢依然繼續溝仔本色。據知她曾問過做過節目的嘉賓伍允龍、陳展鵬甚至人夫陳豪、吳鎮宇等攞電話,但大部分人對她都敬而遠之,直至遇到黃宗澤( Bosco),楊崢才「修成正果」。知情人透露:「早排男方接受 Venessa節目電話訪問後,佢不停打電話俾 Bosco約食飯,又自己去 Bosco間蠔吧度試菜。最初 Bosco要拍戲拍劇唔得閒理佢,到最近得閒啲,先有時間應酬楊崢。點知唔夠兩個禮拜就話撻著咗。」

楊崢:預咗有新聞

周三( 12日),楊崢做完節目後,步向停車場取男友座駕離開。記者問她向男嘉賓抄牌一事時,她即淡淡定定說:「我都預咗有新聞啦!(你約鄭俊弘食飯?)哈哈……唔係事實嘅嘢我唔會回應!」

揸男友車

自爆出戀情後,即使被大批傳媒追訪,楊崢依然駕駛男友座駕出入,以宣示主權。對此楊崢冧笑說:「哎吔,我架車壞咗嘛,咪揸住佢嗰架先囉!」

遲到 NO SHOW

溝仔成功,但楊崢工作態度依舊散漫。據知她擔任《一圈圈》節目主持期間,曾多次遲到 no show,因此被監製鄧潔明照肺。知情人續說:「其實一早同佢講咗,主持要返嚟傾嚇講乜題目嘛。不過節目朝早十點半開咪,佢就十點半先返,完全冇事前準備。有時甚至遲到半粒鐘,要其他主持講埋佢嗰份。開會嗰陣仲試過 no show,監製話再係咁換人。」

除了商台犯眾怒,楊崢貪小便宜性格亦街知巷聞。早前她出席 1881試酒會活動,完騷後,她忽然向大會搞手提出要打包食物回商台給同事分享,遭人竊笑。

周三( 12日),楊崢做完節目離開商台,被問到主動追黃宗澤一事,她淡淡定定說:「唔係事實嘅嘢,我唔會回應!(你鍾意抄男星牌喎,之後仲約鄭俊弘食飯㖭!)咁我做節目主持,聯絡佢哋都好正常,不過之後冇再搵佢哋啦。(你俾佢個經理人投訴喎?)唔……其實我預咗有新聞,希望你哋俾啲空間我哋啦!」

楊崢雖然否認曾私下向男星攞電話,但同日記者致電給《一圈圈》監製鄧潔明,她卻表示知道楊崢有抄牌習慣。「我知道佢有問藝人攞電話,但就唔知佢私下有冇約人食飯啦。(佢做節目係咪經常遲到甚至 no show?)咁可能交通擠塞所以遲,不過佢唔係商台 staff,只係嘉賓主持,唔可以作太多幹預。雙方簽嘅只係短期合約,其實隨時可以終止。」

團拜被玩

周二( 11日),商台搞團拜,眾人焦點依然放在楊崢身上,楊崢寫揮春時,林海峰即說:「今日應該叫含春團拜。」雖然被玩,但楊崢依然風騷說:「團拜最緊要開心,自己真係冇嘢!」

陳嘉桓唔過電

蜜運緊嘅黃宗澤,近日忙拍電影《男人唔可以窮》,對住再度「發育」的陳嘉桓,全程唔敢正視,唔知係咪驚楊崢姐姐鬧呢?

男女老嫩通殺

年屆 42歲的楊崢在感情路上一直多姿多彩,不論男女老嫩都通殺,甚至已有另一半的亦不放過,可說是一個甚麼都會放進口的食家!

95年 練海棠 曾拍拖

楊崢曾與練海棠(伍詠薇的老公)拍拖,有傳分手後楊崢仍用練海棠的金卡購物,沒有放伍姑娘在眼內。

00年 搶黃佩霞男友

在黃佩霞懷孕期間,搭上黃佩霞的老外男友(小圖),楊崢的介入令他們結束 10年情,分手收場。

01年 恭碩良 爆房斷正

當時楊崢正與髮型屋老闆 Plus相戀,被記者撞破與相差 6年的恭碩良現身酒店,當時恭碩良更向記者爆粗要求拆菲林。

05年 楊如芯 有攣情

有傳她跟趙式芝老婆楊如芯( Sean)關係密切,經常出入對方大宅。最後因強迫 Sean送名牌手袋而鬧翻。

10年 李丞責 溝人夫

與李丞責合作玄學節目《中華福地》時,楊崢不時以「丞丞師傅」嗲李丞責,對有家室的李丞責毫不避忌,因而傳出緋聞。

其他影片


鍾意就快D Share啦!