2014年2月14日 星期五

[忽然1周 968] 《金雞》搶閘賀歲贏晒 君如反口辣㷫黃百鳴 君如,黃百鳴,吳君如,MW,




周日( 9日),老闆黃百鳴和君如在天馬娛樂公司春茗上,除影合照外,全程欠缺交流。

娛樂喧

《金雞》搶閘賀歲贏曬 君如反口辣㷫黃百鳴

今年賀歲檔有四部港產片上映,結果由監製兼在戲內穀 38E假大胸的君如一雞獨大,截至周日( 9日)為止大收 3,200萬,問鼎票房冠軍冇難度。

《金雞 SSS》跑出,不過君如另一部擔正的《六福喜事》卻認真失威,票房只有千六萬,是《金雞》的一半。

據知《六福》老闆黃百鳴對此事耿耿於懷,事關君如之前向黃百鳴口頭承諾,話《金雞》套戲會安排在復活節檔期上映,絕對唔會自己打自己。

點知一個屈尾十,《金雞》臨時搶閘賀歲檔,君如更缺席《六福》所有內地宣傳。

黃百鳴被君如跣到攤攤腰,難怪他出席電影公司春茗時,篤爆君如:「佢(君如)上嗰時冇同我講。」

其他影片

去年 9月,吳君如拍完黃百鳴投資的《六福喜事》後,就著手籌備自己監製的《金雞 SSS》。她碌盡人情卡,請來廿位紅星客串,就連黃百鳴亦俾足面君如,在《金雞》中扮鴨仔。

陳可辛教路

《金雞》於 11月才正式開拍,拍攝加埋後期製作,四個月走唔甩,君如亦原定安排在復活節檔期上映。不過在商言商,眼見《金雞》拍得如火如荼,黃百鳴客串當日,亦有問過她《金雞》上映檔期。「君如當時同百鳴哥拍曬心口,講『我邊度趕到賀歲檔期呀,最快都要復活節啦!』點知君如同長毛(陳可辛)商量後,長毛提議將《金雞》趕新年上。長毛話新年個個都去睇戲,好大機會搶贏票房,於是君如咪即刻開行 turbo拍囉!」知情者說。

去年 12月底,《金雞》首張海報曝光,當時標題為「今個農曆新年馬上雞到」,黃百鳴見狀後立刻無名火起。不過他亦俾足面君如,好聲好氣叫君如盡量安排時間宣傳《六福》,「百鳴哥局住冇得嬲,因為佢每年賀歲片都要靠君如食糊。」知情者說。不過《金雞》系列屬君如自家出品,亦曾為她帶來首個金馬影後殊榮,計過條數後,君如決定犧牲《六福》。

3,200萬穩勝

君如賣假胸兼謝票宣傳,加送一眾紅星助陣,令《金雞》短短兩周便衝破 3,200萬票房,有望挑戰四千萬。

1,600萬包尾

《六福喜事》賣大堆頭,不過君如於戲中造型老土,加上宣傳不足,成為港產片票房最差一部,不過現時收 1,600萬算是有所交代。

缺席宣傳《六福》

1月 22日,《六福》在尖沙嘴舉行首映,身為女主角的君如竟然姍姍來遲,足足遲到半個鐘,就連曾志偉當時都忍唔住寸君如,他說:「我哋係賀歲,佢嗰套係鹹片!」句句有骨。由於《金雞》的題材未能在國內上映,君如亦唔想嘥力,缺席《六福》在廣州及北京的宣傳活動,間接跣黃百鳴一鑊。

周日( 9日),黃百鳴出席公司天馬娛樂的春茗,本刊問他,原先君如套《金雞》係咪打算復活節上?他說:「係!(會唔會覺得俾佢跣?)冇所謂啦!(佢上《金雞》前有冇通知你?)佢上嗰時冇同我講。(佢缺席《六福》內地宣傳?)佢嗰段時間忙緊,香港佢都有同我宣傳。其實兩套片喺度,佢要分開宣傳梗係會分散咗!」

當晚君如亦有被邀出席,不過君如又再遲大到,足足遲了一粒鐘才現身。記者亦就此事問過君如,她尷尬地說:「今晚《六福》吖嘛!《金雞》總之就……我哋再研究啦!(之前你講過《金雞》復活節上?)我唔方便講,我哋係拍得曬就提前出。」說罷便轉身走人。看來君如知道自己理虧,費事講多錯多。

豪派利是

君如為《金雞》再創佳績,上周六( 8日)吹雞叫演員補戲,並重新送檢再上映加長版,當日她更向現場記者豪派 500蚊利是。

君如大細超

喱士穀《金雞》

1月 19日,君如以主人家身份出席《金雞》首映,著黑色喱士裝透視三角,招呼一眾男星,落力兼搶鏡。

《六福》遲大到

相反,君如出席上月 22日的《六福》首映時,不但包到冚,更足足遲了半個鐘,令電影要押後開場。《蘋果日報》圖片

台灣風騷

上月君如主力為《金雞》進行海外宣傳。 1月 16日,她就現身台北穀戲,風騷與猛男合照。《新華社》圖片

內地冇影

同日《六福》於廣州舉行首映,君如為穀自己部《金雞》,《六福》當然冇影。

靠君如食糊

賀歲片於千禧年代沉寂過一輪,直至 09年,黃百鳴搵吳君如拍《家有囍事 2009》,結果票房大賣。於是打後賀歲檔,黃百鳴定必搵君如孭飛。

09年  2千 5百萬

吳君如於《家有囍事 2009》中扮演恨嫁女強人,其中君如的黃面婆造型相當搞笑。結果當年冇對手下,大收 2,500萬。

10年  1千 6百萬

黃百鳴隨後再翻炒舊作,搵君如拍《花田囍事 2010》。雖然劇情胡鬧,但仍收 1,600萬,票房不過不失。

12年  1千 3百萬

2012年,君如再幫黃百鳴拍《八星抱喜》,負責與甄子丹談情。雖然演員組合新鮮,但劇情冇驚喜,結果只收 1,300萬,是黃百鳴的賀歲系列票房最差一套。

13年  2千 3百萬

去年君如與毛舜筠於《百星酒店》鬥戲,雖然口碑麻麻,但票房竟然後勁淩厲,埋單收 2,300萬,成為去年賀歲片冠軍。

網友影評

今年賀歲檔期,港產片氣勢淩厲,成功壓倒西片。香港票房截至周日( 9日),《金雞 SSS》第一,《六福》包尾。而周潤發的《賭城風雲》則收 3,000萬屈居第二,《大鬧天宮》亦收 2,400萬排第三。雖然票房參差,但四部港產片都有捧場客。

其他影片


鍾意就快D Share啦!
Related Posts Plugin for WordPress, Blogger...