掃呢頁CODE去手機

2014年2月27日 星期四

[壹週刊 1251] 陪唱 K撩短聚 郭富城回春愛小雞 郭富城,M1,




探熱針

陪唱 K撩短聚 郭富城回春愛小雞

自從飛甩三十三歲熊黛林,城城郭富城先後被傳撻著二十九歲苟芸慧以及二十六歲大陸模葉熙祺。愈食愈嫩,四十八歲城城繼續挑戰代溝極限!睇中電影《金雞 3》裡面三隻小雞,包括屬「九十後」的魔鬼胸蔚雨芯以及高登女神吳若希,「八十後」的衞詩雅都唔放過。鍾意玩賽車的城城,溝女同樣講求速度,先利用 Instagram關注三小雞,繼而撩唱 K食飯返屋企。短途賽,最緊要快!

主動抄牌

今個香港賀歲電影檔,《金雞 SSS》票房跑出,戲中跟住吳君如搵食的王菀之,外界一致好評!其餘「三隻小雞」蔚雨芯、吳若希以及衞詩雅,同樣得到天王郭富城主動「抄牌」寵倖。

「舊年十一月,城城去咗睇 Rainky(蔚雨芯)有份做嘅《微交少女》特別場,當時已經即時抄佢牌,之後又關注佢個 Instagram,耐不耐都留言答兩句。其實城城都有關注部戲另一個新女 Kabby(許雅婷),早排又帶埋朋友睇佢套舞台劇,完場仲去咗後台同成班人影相。城城完全唔避忌,早排睇完 Rainky套《金雞 SSS》,就打電話讚佢做得好,好主動。」知情者說。

城城特登孖朋友去捧 Kabby演舞台劇,更在後台影大合照。

吳若希探城城演唱會班,之後再一齊唱 K。

城城去捧蔚雨芯有份孭飛的《微交少女》,之後即發功約食飯。

吳若希跟師姐謝安琪、欣宜曾經同一唱片公司,雖然有不少機會同台唱歌,但知名度始終唔夠。

09年, Mango被拍到在城城屋企過夜後,城城用戰車送她返跑馬地寓所。

《金雞 SSS》票房接近四千萬,吳若希(左一)、詩雅(左三)以及蔚雨芯(右一)在戲中扮演小雞,跟吳君如一樣要齊齊露。

以快打慢

前輩主動關心後輩,理所當然,但城城醉翁之意,並非如此。

「城城同 Rainky食過飯,同 Jinny(吳若希)就唱過 K,仲讚佢唱歌好聽;反而詩雅就冇出過去,詩雅份人慢熱,可能城城費事嘥時間,總之佢約女仔來來去去都係咁,食完飯再唱 K跟住約對方返屋企,一晚唔得,第二晚再 call,又會話喺公眾地方見面唔方便,呢啲嘢,大家心照,願者咪上釣囉!」知情者說。

對於跟城城私下有聯絡,小雞之一的「魔鬼胸」蔚雨芯在電話回應時避重就輕:「佢(城城)同其他女仔都有傾偈,因為我哋用同一個排舞師 Sunny,所以佢會俾意見。(你哋一齊食過飯?)我冇回應。」

由朋友介紹認識,去年有幸踩入城城演唱會後台探班的高登女神吳若希,一提到跟城城唱 K,表現驚青:「我唔知呀,唔好問我。」

至於未有跟天王進一步交流的衞詩雅,就刻意淡化:「佢(城城)關注我( Instagram),我咪關注番佢。」

除了串燒三小雞,早前新宅男女神美棋 BB,亦公開表示獲天王關注微博,雖然「關心」被公開,但城城未有卻步,更私下帶年僅廿四歲的美棋 BB,出席朋友飯局,繼續漁翁撒網,覓食天下。



城城關注詩雅 Instagram,她亦即時反關注對方。

詩雅跟城城前度同樣擁有長髮長腿,難怪無端端受城城關注。

蔚雨芯初出道以賣胸曬身材出寫真集搏知名度。

蔚雨芯(左一)跟 Kabby、組合 Super Girls成員之一 Heidi(右一)以及溫碧霞,早前為《微交少女》出席香港亞洲電影節記者會。



Heidi、蔚雨心以及 Kabby屬九十後,三人拍戲之餘,不時玩自拍放微博。

美棋 BB突然自爆獲大她二十四年的城城關注,據知兩人已經孖住出席男方朋友聚會。

N年前,美棋 BB做童星時,跟城城影過合照。

葉熙祺是繼熊黛林後,一度被城城承認過的另一半,不過唔夠半年,就被叮出局。

天王的小雞

48歲城城愈食愈嫩口,獲天王「點燈」的一眾八、九十後女星,不約而同,全部在電影都做過「小雞」。

小雞一號 蔚雨芯

現年 20歲,擁有 32D魔鬼胸的蔚雨芯,入行做歌手唱極唔紅,唯有順應潮流曬胸出寫真,早前在電影《微交少女》有大膽演出。

小雞二號 吳若希

有「 A貨謝安琪」之稱的吳若希,跟熊黛林一樣擁有 42吋長腿,雖然獲封為高登女神,但未有助歌唱事業,反而在《金雞 SSS》被嫖客阿澤笑指全身 organic冇加工,令人留下印象。

小雞三號 衞詩雅

衞詩雅雖然已經 29歲,但勝在拍電影唔錫身,先後在《囡囡》、《前度》半裸上陣,騷身材騷演技,城城又點可能唔關注。

小雞四號 許雅婷

只有 19歲的 Kabby,有翻版張栢芝之稱,在處女電影《微交少女》中,不單跟 Dominic有激烈床戲,更半裸拍輪姦戲,難怪城城睇完翻尋味,親身去欣賞 Kabby孭飛的舞台劇《伊甸園》。



鍾意就快D Share啦!