馮仁昭四圍超：秋生寸成龍 出𤓓事書 - 馮仁昭
黃秋生同葉童噚日喺西環出席電車公司慶祝110周年嘅記者會，秋生曾經因為選演藝人協會會長同演協秘書長陳芷菁起爭執，最後秋生宣佈棄選，噚日問秋生𠵱家由成龍做會長呢件事，佢話：「咁咪好囉，佢德高望重，不過佢早啲出聲仲正，唔使我搞到一褲都係！」
之不過成龍經常失言，最近仲認錯咗威廉王子係哈里，搞到成為國際笑話，秋生就話：「精采呀，可以出番本紀念冊，我憑乜嘢教人呀？你哋唔好玩我啦！」秋生又話收到訊息，加入演協唔使交會費喇，不過冇興趣參與會務，因為身為藝發局委員嘅佢話藝發局已經好多會要開喎。
■黃秋生噚日話成龍做演協會長應該早啲出聲，唔使搞出咁多風波。
葉童難忘禁片
葉童就爆老公陳國熹追佢時都有遊電車河，因為大把時間傾偈夠浪漫喎。葉童仲話第一部戲《烈火青春》，因為湯鎮業同夏文汐嘅大膽激情戲喺電車上拍，結果搞到被禁，好在兩個月後套戲重新剪接上到畫咋！
撰文：馮仁昭
■成龍認錯威廉王子係哈里，成為國際笑話。
資料圖片
|
鍾意就快D Share啦！
|
|
|
