2014年2月12日 星期三

[FACE 351] 一哥一姐唔願堅跑 港姐唯唯渣馬頂硬上 港姐,MF,




今年渣馬,唯唯同何傲兒(下圖)將任導跑員,各帶領一位視障學生參與 10公里賽事。唯唯咁忙都抽時間陪視障同學子朗一齊跑, FBI真係好佩服佢。今個星期日,大家記得支持佢哋喇。網上圖片

FBI

一哥一姐唔願堅跑 港姐唯唯渣馬頂硬上

一年一度嘅渣打馬拉松今個星期日舉行,每年除咗吸引唔少市民拉隊參加, TVB都會派出大班小生姐仔撐場。

網上圖片

好似上年咁, TVB臨門吹雞近 40名藝人落場,派出徐子珊、陳展鵬,仲有黃翠如等一班阿哥阿姐上陣,誓要打贏 HKTV的 30人大軍。點知被 FBI發現部分藝員無帶大會指定嘅選手號碼布,只掛住大會嘅工作證喺跑道亂襯兼作狀開跑,影完相攞完彩,幾分鐘就鬆人。

FBI收到風, TVB為免再俾人鬧是是旦旦,今年想搵班阿哥阿姐,好似徐子珊等落場堅跑。點知 TVB要人跑,但又唔肯讓步俾呢班阿哥阿姐拍少啲戲練跑,最後一個二個就以無時間練習為由推咗。

臨急搵唔到人, TVB暫定搵今屆港姐冠軍陳凱琳、亞軍蔡思貝同友誼小姐歐陽巧瑩等上陣;就連孭緊兩套劇嘅梁烈唯都要落場,今次佢仲係同何傲兒( Lily)擔任「馬拉松 101《伴你同行》計劃」導跑員,喺渣馬中各帶領一位視障學生參與 10公里賽事,責任重大。

比賽前, FBI打過畀唯唯,問嚇佢練成點,唯唯都承認掛住拍劇,根本唔夠時間練習,「喺比賽前一、兩個星期已經完成訓練,𠵱家開緊兩套劇,講真,好難抽時間出嚟練,加上我帶嗰位係視障學生,佢要返學,所以練習都要就番佢時間。」

既要捱夜拍劇,又要跑馬拉松, FBI希望唯唯唔好好似之前喺北極跑馬拉松咁,跑到第 8圈體力透支抽筋跌低,祝佢好運。

網上圖片

唯唯最近拍緊《牛頭愛搭馬嘴》同《使徒行者》,唔好話練馬拉松,根本連休息都唔夠時間。好彩佢都仲識玩,趁埋位前影張被打到變豬頭嘅造型相上 Instagram。

'13 hea跑

上年一班 TVB藝員 hea跑馬拉松,留意子珊係著皮褲,而著住牛仔褲嘅煎 Pang仲掛住㩒電話,完全唔尊重馬拉松精神。

港姐冠軍陳凱琳被 TVB臨時吹雞叫跑, FBI真係擔心瘦到 100磅都無嘅佢會跑跑嚇暈低。

將軍澳狂操

渣馬臨近,最近 FBI就發現 TVB一班藝員好似胡蓓蔚同港男黃建東等等喺將軍澳運動場日練夜練,絕對唔似得煎 Pang同子珊上年咁 hea。

群星出戰

雖然 TVB班阿哥阿姐 hea爆,但演藝圈其他參賽者就好認真,日練夜練,體育精神值得尊敬。

徐濠縈 鄭融  60分衝線

A餐徐之前已喺世界各地參加過馬拉松賽,仲成日 po跑步相上 facebook。今年同跑友鄭融、周子駒繼續代表 nike跑 10公里賽。鄭融話信心十足,因曾在美國參加半馬,事後亦經專業人士,改善跑姿及強化肌肉,希望今次能夠喺 1小時內完成 10公里。

陳山聰 挑戰全馬

回歸 TVB嘅陳山聰今年挑戰「全馬」 42公里,經常駕車上半山寶雲道操跑。而山聰今次仲好認真,明知要為添哥嘅新劇《官場浮世繪》開工,所以預先請假,拍劇期間也隨身帶齊跑步裝備,有空檔就去將軍澳環保大道練跑。

鍾舒漫 病住跑

Sherman今年繼續參加 10公里賽,佢話:「自己先前病咗 10日都未好,希望渣馬比賽日唔好病。」

李綺雯 認真跑

上年大部分藝員喺起步亮嚇相就收工,得𡃁妹最認真,全副武裝完成 10公里賽,𡃁妹今年再接再厲挑戰 10公里。



鍾意就快D Share啦!
Related Posts Plugin for WordPress, Blogger...