網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年3月28日 星期五

[忽然1周 974] 傾掂數俾劉丹湊 劉愷威爆楊冪佗女 劉愷威,楊冪,劉丹,MW,




恩愛出巡

上周六( 22日),劉愷威揸車載楊冪到圓方行街,不過二人發現記者後,便決定唔落車。懷胎 6個月的楊冪面頰和身形也圓潤了不少。

滾熱辣

傾掂數俾劉丹湊 劉愷威爆楊冪佗女

劉愷威和楊冪奉子成婚,今年 1月在峇里擺酒時更變女家主場,強勢新抱現形。有指佗住劉家骨肉的楊冪,初時選擇在北京生 B,令一直恨孫恨到發燒的劉丹十分失望。

不過凡事有轉機,據知劉丹和劉愷威兩父子連月來費盡唇舌遊說,終於𠱁掂楊冪在香港生 B,並 book定山頂明德醫院產房。 BB出世後,更會長期定居香港,由劉丹夫婦全力照顧。

本刊收到消息,預產期為 7月的楊冪今胎是佗女。上周六( 22日),身形明顯脹了一個碼的她終於現身,不時搵手袋遮肚。











強勢嫁人

楊冪今年 1月下嫁劉愷威時恃肚橫行,男家只擸到少量酒席招呼親戚,令劉丹唔敢出聲。

佗住 6個月身孕的楊冪,本月初秘密來港待產。為方便照顧,她放棄入住自己名下,位於梅道的蔚皇居豪宅,搬到老爺劉丹的沙田半山寓所,與老爺奶奶同住。五呎五吋高的楊冪,出道以來身形一直纖瘦,唔過 100磅。不過自從她佗 B後,體重直線上升,現時已有 132磅。難怪貪靚的楊冪,終日留守在家,唔願見人。

全程緊張護肚

上周六( 22日),久未露面的楊冪與劉愷威終於出動,由沙田出發往九龍圓方。雖然劉揸住波子,不過身邊有大肚婆,車速不算太快。到達圓方後,劉在停車場繞了幾圈。記者於是上前影相,發現佗住 6個月身孕的楊冪面圓圓之餘,身形亦脹了不少,即使著住鬆身衫,仍不時搵手袋及雙手護肚。最後二人冇落車兼折返沙田寓所。

手袋遮肚

記者發現楊冪全程搵手袋和雙手遮肚,當日她更刻意著超鬆身衫。

友善揮手

楊冪全程非常避忌,但離開前仍向鏡頭揮手講再見,態度友善。

轉軚留港待產

其實去年楊冪得悉有餡後,便立即向劉愷威表明,要在北京生 BB。知情人士說:「楊冪希望自己父母可以多啲時間湊孫,加上佢同老公主力喺內地工作,所以一直都認為 BB喺北京生活,會係最好嘅選擇。」據知老爺劉丹得悉後大感無奈。知情人士續說:「劉丹當然希望見多個孫幾面啦,不過佢又唔想同新抱對著幹,驚佢動到胎氣,所以惟有靠個仔說服個老婆。」

劉愷威眼見老竇劉丹為咗快將出世嘅金叵羅冇厘心機,返去同老婆商量。知情人士說:「阿威知道老竇恨湊孫,咪諗計𠱁太太留港生仔。佢同老婆解釋,無論醫療設備抑或教育制度,香港都略勝一籌,仲話香港嘅陪月質素高,湊 B同安胎都較放心。加上北京近幾年啲空氣好差, BB喺香港生活始終好啲!」楊冪權衡輕重後,最終心軟留港待產。

節目漏口風

劉愷威早前上內地節目《超級派對》,被主持問到 BB性別時,就唔覺意爆料說:「女兒吧!」

劉愷威:喺香港生

周二( 25日),劉愷威出席影視博覽活動,提到楊冪佗女和已 book明德醫院分娩時,他支吾以對說:「好多嘢都未知,但會喺香港生。」

劉:我有外父相

BB在港出世,劉愷威馬上 book定山頂明德醫院 VIP房,讓太太在七月入住分娩,單是三日兩夜的住院費經已五萬,連埋醫生手術費等其他費用,隨時要使 20萬。

現時楊冪每個月會到診所做胎檢一次。一直對胎兒性別保密的劉愷威和楊冪,上月已得悉腹中塊肉為女兒。「阿威鍾意女仔,所以一知道呢個消息好興奮,反而楊冪就希望幫劉家繼後香燈,所以已經決定生完再生,繼續努力。」

周二( 25日),劉愷威出席影視博覽活動,對於太太佗女一事,他笑笑口說:「未知呀!我未問醫生,不過啲人話我有外父相。」暗示 BB是女,雖然承認 BB會在香港出世,但就堅拒透露醫院名字。他說:「會喺香港生,接生嘅係香港男醫生,係阿媽啲朋友介紹。陪月嗰啲就交俾阿媽搞,我好放心呀,會全力搵錢養家!」劉愷威日內便飛到橫店拍新劇,六月底煞科後便趕返香港陪太太生 B,「我會入埋醫院剪臍帶。」

買 pizza慰新抱

劉丹早前自爆新抱楊冪口味突變,一向茹素的她竟然要求食 pizza。上周三( 19日),記者便拍得劉丹特登揸車到長沙灣買外賣 pizza。

風騷打 golf

𠱁掂新抱肯留港生 B,劉丹零舍風騷,幫新抱買完 pizza後就約埋幾個老友打 golf。

六星級醫院

收費逾十萬

山頂明德醫院 1907年啟用,至今已有 107年歷史,曾在 2012年被美國專題周報《 Health Execnews》評為全球第三最美麗醫院。明德醫院設有不同的產科套餐計劃,入場費最低為$26,000,屬三晚自然分娩套餐。如孕婦要擇時辰開刀,醫院會按照不同時間收費,晚上七時半後或公眾假期開刀,收費最高可達$110,000。套餐計劃已包括房租、膳食及護理,但醫生和麻醉師費用則另計。

半年前訂房

要生得豪氣,除了要預先半年訂房,香港居民要先付$20,000元按金,內地居民就要付$40,000元按金以確認房間。

醫院豪華唔在講,房間設備亦是頂級。難怪袁詠儀、吳君如、甘比等人也選這間醫院生仔。

醫院外貌甚具歐式風情。

部分 VIP病房裝修猶如六星級豪華酒店,具備無敵海景大露台,亦有酒店大廚負責膳食,與嬰兒房設在同一層,方便照顧。

有孕躁底

懷孕除了經常感到肚痛,更令身形發福。佗了 6個月身孕的楊冪似乎還未適應,不時在微博埋怨。

片場發難

今年 2月,楊冪飛到上海趕拍《小時代 3》,她在片場發現記者,立即對鏡頭手指指,非常惡死。《 CFP》圖片

狂呻辛苦

楊冪一向十分勤力,劇接劇也毫無怨言,不過當她佗住 BB時卻要捱夜趕戲,引發她在微博狂呻。

脾氣古怪

大肚婆懷胎十月,過程非常辛苦,難怪不少孕婦懷孕期間性情大變,楊冪當然不例外。《 CFP》圖片



鍾意就快D Share啦!