掃呢頁CODE去手機

2014年3月6日 星期四

[壹週刊 1252] 死𦧲一年 向太放生  Race揼向佐狂買 M1,向太,  Race, 向佐




1/3冇換過衫的 Race,一起身就同向佐先去中環瘋狂掃貨。

探熱針

死𦧲一年 向太放生  Race揼向佐狂買

今年廿九歲向華強兒子向佐,一二年與大他兩年的 Race(黃婉佩)分手,但在過去一年,致力做「小向太」的 Race不斷𦧲復合,為捲土重來不斷出招翻兜向佐,結果打動埋口硬心軟的向太放生,成功行番埋一個月。

為了不再錯失成為「小向太」的機會,一向知道成敗其實在於「未來奶奶」的 Race,更加出盡法寶,隨傳隨到,陪玩陪食陪 shopping。

上星期五(二月二十八日)晚,向太陳嵐約理「未來親家」 Race媽及家姐 Rosanne(黃婉君),到灣仔飯聚外,又放水讓已經一年無在名店狂 fing的 Race任買。有水喉射住, Race機不可失,於短短幾個鐘,已豪掃成車名牌。

向佐出錢, Race出命狂掃名牌,向佐更做埋阿四負責攞嘢。

一身闊太行頭的 Race在 Chanel試衫期間,向佐攞了一大疊一千蚊交俾保鏢,幫他到 Saint Laurent找數。

買到中段向佐的七人車車尾箱已經擺滿多袋名牌,還未計乘客位的幾大袋,十分誇張。

復合一個月

發展姊弟戀三年,一二年因為 Race(黃婉佩)逼婚,引起向佐反感,斬纜分手。事後 Race曾當眾喊曬:「唔投資就唔會出錯,感情同賭錢一樣,冇得計回報!」

輸清光!但鬥士 Race其實唔服輸,分手之後,一直纏住向佐,死𦧲復合。

「 Jacky(向佐)同 Race分手之後,向太就送咗佢去北京讀戲劇同集訓,一心想個仔專注學習,為嚟緊部為佢度身訂造嘅新戲做好準備。點知 Race就趁 Jacky唔喺向太身邊,一直都搵住佢,成日通電話又話好掛住對方,又話要去北京搵佢; Jacky容易心軟,俾佢𦧲幾𦧲又想試嚇喺番一齊,不過佢知道媽咪(向太)唔贊成,所以要 Race搞掂媽咪先。」知情者透露。

28/2向太請了 Race一家到灣仔食飯,離開時 Race都只顧黐住向太, mark得好實。

向太同「未來親家」關係不俗,兩人繑曬手雞啄唔斷。

全程傍實

當初同向佐拍拖, Race早已知道只要搞掂向太,萬事有商量,亦掌握對方心意喜好;半年前,她開始再由向太方面埋手,經常打電話噓寒問暖,過時過節又送小禮物氹對方。

日子有功,農曆新年期間,向太一家到新加坡過年, Race趁機會約向太食飯,又陪她周圍去,各方面都照顧周到,最後用誠意打動向太,再次成功「入門」。

雖然初步成功,但 Race明白要正式做「小向太」路程尚遠,就算復合成功, Race都唔敢放軟手腳,無時無刻向太優先,陪打牌,陪食飯,陪 shopping,花在「未來奶奶」的心思時間,比對向佐更多。

上星期四(二月二十七日),下午四時半,記者在置地廣場 Gucci先見到向佐出現,十分鐘後,著住一身 Chanel的 Race傍住向太到,即使男友在場,但 Race完全沒有黐番向佐的意圖,繼續全程傍住向太在 Gucci睇衫,半小時後,向佐走先, Race也沒有跟隨。

逼婚累事

中國星太子爺向佐過去曾與應采兒、張栢芝等傳緋聞, 09年讀日文遇上 2R的 Race,但同時 Race又被踢爆與大她 15年的新加坡富商陳靖諧( Anthony)已婚,但見向家在娛樂圈有財有勢,二選一, Race速返新加坡搞離婚。

10年,向佐拍攝電影《前度》時,有傳阿嬌介入,主動出擊冧向佐,狂 send短訊同靚相俾對方,但向佐為向 Race派定心丸,即時與阿嬌劃清界線,踢走飛來蜢。

拍拖三年,二人表現恩愛,直至心急嫁入門的 Race對男友逼婚,令未夠三張,仍想在影圈闖一番的向佐十分困擾,戀情告吹! Race多番哀求,向佐亦未有心軟,甩拖 Race在網上慨嘆:「天在哭!」

「親家」見面

Shop到接近晚上八時, Race與向太終於停手!據知,當日 Race在「未來奶奶」面前相當克制,沒有主動買嘢,只是心軟的向太買乜也預她一份。

第二日(二十八日),向太約了「未來親家」 Race媽及家姐 Rosanne到灣仔食日本菜,離開時,向太與 Race媽又繑手又攬腰, Race得到「未來奶奶」歡心同時,家人亦得到接受,邁向入門又進一大步。

之後 Race媽與家姐坐向家的七人車離開,而 Race就跟向太向佐返回九龍塘向家大宅過夜。

27/2向太同 Race到中環 shopping,不過只係向太主力買, Race在「未來奶奶」面前扮到十分忍手,當日向佐都有同場,但先行離開。

一車名牌

農曆新年 Race在新加坡過年,更在微博曬泳衣照,原來當時向佐同向太都身在新加坡。

瞓醒一覺, Race衫褲鞋都無換過,第日(三月一日)孖住男友到中環血拼,掃勻 Dior、 Dolce& Gabbana、 Saint Laurent、 Chanel各大名牌,向佐更做埋阿四,幫女友攞住購物袋。

有向太開綠燈, Race短短幾個鐘豪掃多袋名牌,戰利品擺滿了七人車車尾箱,十分誇張。超過一年時間失去大靠山, Race狂買補倉,相當盡情。

唔認新抱

○九至一二年間, Race經常跟住向家出席公開場合,以為做硬「小向太」,點知太急進,導致分手收場。

問到向太有關向佐與 Race復合,她竟然否認。

「大家識咗咁耐,嗰日咁啱撞到咪一齊飲茶囉。(之後仲見你哋兩家人一齊食飯?)咁我去新加坡人哋都有請我,兩家人係朋友嚟。(覺得 Race個人點,啱唔啱做新抱?)以普通朋友嚟講就幾好嘅,但係阿仔都係以事業為重先。」

當提到 Race用錢無節制,與向佐狂掃名牌時,向太反應愕然,但依然肯幫 Race勁補飛。

「 Race自己都有錢買。(佢買到成車都係喎?)哦!佢香港冇車,我哋車佢,佢幫朋友買嘢啫,新加坡買嘢貴過香港。(驚唔驚佢亂使向佐啲錢?)唔驚!阿仔都冇乜錢,哈哈哈……」

成敗在奶奶

嫁入豪門,最緊要係同奶奶搞好關係,女星由娛圈踩入上流圈子,不少卻因婆媳不和,最終影響夫妻感情。

陳法拉

08年,陳法拉與 Neway大少薛世恒於美國秘密結婚,據知奶奶一直催法拉為薛家繼後香燈,她亦應承婚後兩年內生 B,減少幕前演出,最終法拉卻事業行先惹來夫家不滿,「婆媳」關係一度變差。相反,二少奶諸葛梓岐就好識做,積極造人,去年為薛家誕下男孫。

張栢芝

06年,瞞住雙方父母與霆鋒去菲律賓閃婚,奶奶狄波拉扯曬火,事後栢芝回港斟杯新抱茶補飛,又經常陪奶奶行街 shopping,修補關係。 10年,栢芝復出拍《長江 7號愛地球》,因為讓 Lucas出鏡,令狄波拉非常不滿,婆媳關係再度變差。

羅霖

與劉坤銘結婚 18年,去年離婚。據知劉母一直對這位新抱有意見,不滿出身娛樂圈,又嫌她唔夠學識無家底,經常在大庭廣眾發脾氣鬧新抱,羅霖多年來受盡不少怨屈氣。



鍾意就快D Share啦!