掃呢頁CODE去手機

2014年3月13日 星期四

[壹週刊 1253] 導演上身拒著戲服 陶傑寸爆麻煩 Mandy Lieu 陶傑,Mandy Lieu,M1,




我係專業演員!(設計對白)

探熱針

導演上身拒著戲服 陶傑寸爆麻煩 Mandy Lieu

陶傑處男下海執導電影《愛.尋.迷》,成功冧掂羅霖、 Mandy Lieu以及金庸契女盛朗熙( Joy)演出大膽床戲,三女戲份相若,不過陶傑對宅男女神 Mandy特別關照,安排她著泳衣落水,濕身騷 34C身材。

不過,演技未夠班的 Mandy竟然在片場橫行,導演上身做指揮,又扭計拒著戲服,搞到陶傑都忍唔住寸爆:「佢係香港安祖蓮娜。」

Mandy在戲中有濕水曬胸場面。

玫瑰梗有刺!(真實對白)

打入冷宮

陶傑的《愛.尋.迷》由三個故事串成,三個女主角,以失婚羅霖資格最老,搭細近廿年的關楚耀拍情慾場面,成功為電影帶來話題。相對觀眾並不熟悉的盛朗熙,陶傑一樣有橋,早前他刻意將對方出席金庸九十歲生日飯局照片放上微博,被指貌似李英愛的盛朗熙,隨即被網民起底,之後更獲邀上湖南衞視節目玩遊戲。

但一度被陶傑讚戲好、樣靚有條件進軍國際的 Mandy Lieu,反而無聲無氣。

「導演對 Mandy一直都好好,初初傾劇本嗰陣,導演話乜 Mandy都 OK,不過到開工埋位,就乜都有意見,仲要係好堅持嗰隻,又試過教副導演擺機位,有時搞到現場氣氛好僵。自把自為外, Mandy仲唔肯著美指安排嘅戲服,總之當正自己係阿姐,好唔合作,大家都怕咗佢。」工作人員透露。

盛朗熙人氣升,即有內地公司找她演小龍女。

被網民大起底後的盛朗熙,被邀上《天天向上》人氣遊戲節目做嘉賓。

陶傑帶盛朗熙出席金庸九十歲壽宴,被老人家大讚是近年最有氣質女星。

因為要著喱士內衣上鏡,羅霖早前被拍到孖住陶傑到葆露絲揀內衣。

羅霖首個單身生日派對,陶傑人到外,更拉埋男主角之一徐天佑一齊撐場。

四十八歲的羅霖跟細十八年的關楚耀拍床上肉搏戲,陶傑事前做足心理輔導。

句句有骨

電影未開拍前, Mandy約埋陶傑出外飲紅酒密密斟。

問到陶傑是否已將 Mandy Lieu打入冷宮,他句句有骨。

「我冇忽略佢嘅宣傳! Mandy有間 model公司,佢有時做嘢忙,未必約到佢,不過佢都好踴躍同部戲做宣傳。(佢同工作人員關係好差?)我唔知,只係知道佢喺片場同製片有強烈不同意見,以 Mandy追求完美嘅性格一啲都唔出奇。

「專業演員係應該對自己要求高,就算佢喺拍攝期間同人哋有問題,我都撐佢,因為靚女有特權,佢係香港 Angelina Jolie。至於啲人話佢擺款,我就唔覺,佢要求高,亦係個我行我素嘅人,呢啲人喺香港唔需要埋堆;佢有真正本錢,玫瑰花係有刺,摘上手,梗係會㓤㓤哋。」

大牌

三分顏色上大紅,有人撐腰,或者演出作品口碑收視票房成績標青,唔少演員都會因為少少甜頭,以為掂曬,搞到大頭症發作,隨時衰收尾。

DaDa

憑《低俗喜劇》得香港電影金像獎「最佳女配角」的 DaDa陳靜,去年八月突然公告引退繼而玩失蹤,兩個月後,又開記者會公開道歉,早前她在內地拍《唐伯虎之衝上雲霄》,又再病發,以天氣凍手腳冰硬拒拍打戲,不停玩嘢。

楊怡

唔想傳媒咬住她跟羅仲謙的姊弟戀不放的楊怡,經常擺款十問九唔應,試過有記者問她幾時收工,一個極普通問題,但她卻以「冇戴錶」回應,仲要黑住面,好不客氣。

高海寧

得公司高層點燈力捧後,高海寧被指在拍玄學節目時一姐上身,寸爆同場有份做節目的岑杏賢,加上意見多多,變成犯眾憎。



鍾意就快D Share啦!