港視走投無路 艾威：賣車賣樓
【電視風雲】政府再度出招力阻香港電視網絡（HKTV）開台，不但令老闆王維基走投無路，更令不獲港視續約的艾威淪為失業大軍，前路茫茫。艾威昨形容今次事件是個災難，為了生活，他計劃變賣家當：「先賣錶，跟住賣車，最後係賣樓，賣得幾多得幾多！」他甚至考慮退出娛樂圈，並撤出香港移居台灣。
港視開台無期，除現時正在拍攝的兩部劇集《惡毒老人同盟》、《大眾情性》及綜藝節目《HKTV"Working"Holiday》繼續拍攝外，其他製作被迫一律叫停，而約滿的港視藝人即使願意減薪、減騷也於事無補，齊齊不獲港視續約，令不少藝人頓感前路茫茫，淪為失業大軍，本月初已約滿港視的艾威便是其中之一。
■淪為失業大軍的艾威，昨重臨港視位於將軍澳工業邨的地盤，自然百感交集。攝影：陳順禎
「嬲到跳起」
艾威昨重臨港視位於將軍澳工業邨的地盤，見到地盤「一潭死水」時倍覺感慨，他說：「𠵱家真係嬲到跳起！今次感覺同上次好唔同，個殺傷力係好大，更加震撼！但有咗第一次經驗，話畀我哋聽，呢個世界乜嘢事都可能發生。咁變咗可能有咗心理預備去迎接呢個災難，會更加積極去計劃一下應該點做。」
對前路感到徬徨？艾威說：「會㗎，咁大個仔未試過回復自由身，因為35年嚟電視台份合約從未中斷過，嗰邊（無綫）33年，加埋呢邊（港視）兩年就35年，假如係後生仔、初初出嚟，冇俾一份電視台合約綁死，未必唔係一件好事，可以有好多新嘗試，因為大把時間，但我𠵱家好似剩番啲時間有限，真係要諗清諗楚到底下一步要點做，係咪真係要退出娛樂圈呢？」
失去電視台合約變成失業大軍，為了生活，艾威不諱言要變賣家當：「假如一路冇收入嘅話，真係要變賣家當。先賣錶，跟住賣車，最後係賣樓。因為使曬啲錢嘅時候，有好多生活上必須開支要繼續，雖然我冇仔女，但都有阿媽、有老婆，仲有啲小朋友助養嘅，有12個小朋友，一個月幾千蚊啦。我有隻勞力士古董錶，下次喺九龍城再撞到發哥（周潤發）嘅話，會問佢有冇興趣。另外有一隻錶都賣得嚇錢，賣得幾多得幾多，跟住就賣車啦，兩架賣咁一架，最後就會賣樓。」對於養自己及家人都成問題，會否中止助養計劃？艾威說：「盡量唔好中止啦，咁幾千蚊應該都解決到嘅。」
■艾威見港視地盤重門深鎖，唉聲嘆氣。
拒叩無綫門
艾威月前曾經考慮移民台灣，現時會否重新考慮？艾威說：「係呀，嗰個計劃都可以繼續諗，實行性都幾大，但當我同啲朋友講起，啲朋友就提出反對，話唔需要做到咁悲觀，撤離香港，可能朋友唔捨得我。台灣生活指數低啲。我退可守，但係冇得進攻。我層樓𠵱家都賣到幾百萬。睇嚇將嗰幾百萬點分配，投資又好，慢慢搣又好。有好多同事佢哋生活開支唔可以停，例如小朋友教育費，我相信唔係咁多同事好似我咁好彩，有個機會可以買到層樓，作為最後堡壘。」有否考慮過叩其他電視台門？如亞視或無綫？艾威擰一擰頭說：「完全冇諗過。我感覺到唔會死嘅，點都生存到，中國人嗰句，馬死落地行啦。」
採訪：戴彩煥
■張可頤、林文龍及艾威等藝人去年出席撐港視的活動。資料圖片
■艾威（中）除了為港視拍劇，亦曾拍攝紀錄片《挑戰》。資料圖片
|
鍾意就快D Share啦！
|
|
|