掃呢頁CODE去手機

2014年3月12日 星期三

[FACE 355 外地娛樂] 財神到 爆《星星》身價 36萬 1集 金秀賢南京光速賺人仔 金秀賢,星星,來追星星的你,熱門,MF,




8/3 7:10pm

因為《來自星星的你》令金秀賢紅到發紫,去到邊都勁多 fans。呢日錄影完,金秀賢無奈被保安捉實至可以順利離開南京。

真面目

財神到 爆《星星》身價 36萬 1集 金秀賢南京光速賺人仔

上月底才播畢《來自星星的你》大結局,人氣高到不得了的金秀賢 keep住個勢,一星期後以 6百萬「人仔」天價空降南京出席江蘇衞視節目《最強大腦》錄影,即使話題女王張栢芝在場都變得冇人關心。

憑住《星》劇成功俘虜萬千少女的金秀賢,出道近 7年的他,前年接拍《擁抱太陽的月亮》時開始上一線,據知上年底接拍《星》劇時,經理人裴勇俊便以約 36萬元一集酬勞,替金秀賢接拍《星》劇。辛苦 3個月先有 756萬落袋,返大陸半日卻有 6百萬「人仔」(約 758萬港元)酬勞,咁易賺,唔怪得金秀賢和全智賢今個月尾都會再度訪華吸金。

上週六( 8日)「都教授」金秀賢獲江蘇衞視邀請,以 6百萬人民幣酬勞為《最強大腦》當特別評審,當天更獲專機接送,由南韓首爾直飛南京。

有傳《星》會開續集,仲話全智賢會生外星 BB,不過韓國週刊《 HIGH CUT》就爆金秀賢收約 36萬港幣一集拍《星星》,而李敏鎬拍《繼承者們》就收約 40萬,只及內地當紅小生文章收 90萬人仔(約 114萬港幣)身價一半。

搞 high真人騷

據知金秀賢於上週六( 8日)清晨 4時便出門前往金浦機場,約 9時已抵達南京,其間一舉一動都被江蘇衞視直擊,就連過安檢、入境都要面對鏡頭。不過收得 6百萬人仔,金秀賢完全配合,無論在人群中,或是被粉絲追蹤中,金秀賢都以微笑應對,更不時揮手。

金秀賢離開機場後先坐旅遊車再轉乘 7人車,前後由 4架保母車護送下到達南京河西會議展覽會進行錄影。場內一班觀眾已坐定定等「都教授」出場,在主持人陶子陶晶瑩一場棟篤笑之後,栢芝即獻唱陳年飲歌〈星語心願〉,之後金秀賢突然入場,令全場觀眾尖叫歡呼,栢芝冇癮惟有返位就座。

2小時的《最強大腦》共花了 6小時錄影,金秀賢約 6時半離開會場直接到南京機場準備上機,離開前亦不忘向粉絲揮手,有粉絲因眼見金秀賢快要離開而當場爆喊。韓國時間晚上約 12時,金秀賢安全返到首爾,完成 10小時旋風訪(南)京之旅。

9: 30am坐大 Van

金秀賢由首爾乘江蘇衞視的包機到達南京機場,佢先被安排上 24座旅遊巴離開機場。

中途轉車

後來電視台安排金秀賢在隱蔽處轉乘 7人車。

粉絲狂追

由機場往會場,全程有工作人員錄影,以為 fans會唔知金秀賢轉咗車,但電視台部 cam出賣咗, fans即死跟金秀賢乘坐的銀色七人車。

經過 6小時錄影,金秀賢終於收得工,離開時見到大堆喺機場等佢嘅粉絲喊曬口,金秀賢第一時間同粉絲 say goodbye,安撫佢哋。

韓圜唔及人仔

據知今次金秀賢參加節目《最強大腦》錄影,經理人公司 Keyeast對江蘇衞視開出的酬勞更是一口應承。知情人透露:「江蘇衞視一開出來的酬勞已經係 6百萬, Keyeast(金秀賢所屬經理人公司)對價錢相當滿意,只要求有足夠保安及交通安排妥善就 ok。」

而金秀賢之所以對 6百萬酬金爽快答應,全因拍韓劇的酬勞遠不及出內地騷。最近韓國便有傳媒報道金秀賢拍一集《星星》,大約只得 36萬港元酬勞,花 3個月,捱凍捱眼瞓拍 21集才袋約 7百多萬港元,而今次內地電視台開出 6百萬人民幣(約 758萬港元)只需金秀賢錄影 6小時,「人仔」明顯超易賺。有傳《星星》於 6月會開拍續集,仲話 9月金秀賢便要服兵役,唔趁這幾個月搏命吸金點得?

扭骰高手

《最強大腦》係測試參加者嘅智商,「外星人」金秀賢智商有幾高就唔知,但佢在節目中快速玩扭計骰就唔係人人做到。網上圖片

兩娘教子,陶晶瑩(左)同張栢芝(右)夾住金秀賢,陶仲要問金點解沖涼要圍毛巾(下圖)?金秀賢梗係面都紅曬網上圖片

金秀賢喺《星星》首集圍住毛巾沖涼嘅戲,睇唔到佢個靚「股」,嘥曬!

機艙打機

金秀賢微博就放咗張好正經睇緊文件嘅相,但轉個頭就俾空姐偷影咗張佢打機嘅相,咁外星人都要輕鬆一下嘅!網上圖片

安檢盡力搜?

網上全程直擊金秀賢由南韓出發到南京嘅過程,就連呢個過安檢被工作人員搜身嘅無奈表情都被 po埋上網。網上圖片

各自吸金

《來自星星的你》令雙賢紅遍香港、內地,以至東南亞,雙賢亦冇放過呢個機會,雙雙出埠及拍廣告吸金,今個月尾更會先後於上海現身。

金秀賢  9個廣告揸手

上月 21日完咗《星》劇拍攝,金秀賢即連拍 2日廣告,手頭上已有 9個廣告揸手,當中包括美國品牌 CK Jeans。金秀賢早前已遠赴德國拍廣告,上週五( 7日)金秀賢亦出席 CK Jeans VIP簽名會,同 50個幸運兒近距離接觸簽名。

3.21全智賢 上海掘金

已經嫁人嘅全智賢比較錫身,上月去完日本拍新一輯 Uniqlo廣告返韓後,到本月 21日先會到上海出席代言護膚品牌「韓後」活動, 23日再無懼恐襲,到雲南出席另一化妝品牌活動,一次過唔使四圍走咁辛苦。



鍾意就快D Share啦!