面對面
方太與你 鄧麗欣
還差半年就滿 30歲，鄧麗欣北漂兩年後，簽約太陽娛樂重投香港經理人黃柏高懷抱，亦拍了高登小說改編、百分百的港女港故《男人唔可以窮》，宣布正式回流。
30歲的鄧麗欣和 20歲的鄧麗欣其實沒甚差別，倒是以前和現在的我，眼光不一樣了。
十年前，對著呢九個餅女裏最沉著最安靜的一個，心裏會嘀咕：小小年紀，咁老積算係點？
十年後，她還是一樣發言不太踴躍、情緒不大上落、每個答案都不會透露太多訊息、聲線一貫的輕柔穩重，我開始學會欣賞，十年娛樂圈竟然還不足以改變她：呢個鄧麗欣，有啲嘢。
唯一變了的，是說起方力申的態度，那個從 06年《獨家試愛》撻著直到現在的一男子，以前避之則吉，現在則是任何人叫她「方太」都幸福又安然的照單全收。
眨眼相戀七年，原來鄧麗欣變的是內裏：「爹哋喺我好細個離家，丟低我同媽咪，以前細個我唔信愛情、唔信男人，𠵱家我明白，原來遇到對的人好重要，原來經營一段感情，抉擇權喺自己手上。」
有能力改變這個最不會變的餅女，方先生的力量，不容小覷。
不變應萬變
17歲參選《 YES》校花、 18歲入行做𡃁模、 19歲加入 Cookies推出第一張唱片， 12年簽約內地經理人公司北漂，今年重投 Paco懷抱再回流……兜了一個大圈，我說除了頭髮長了、 baby fat少了，她沒有變。 Stephy說她最自以為豪的，就是十二年過去還沒有變。
我記得當年決定入行，自己同自己講過，無論點都好，唔好因為呢個圈改變自己，呢條路，真係唔容易堅持。
一開始做 Cookies，佢哋 bi li吧啦好快混熟，我就短頭髮、樣 cool cool、最鍾意企埋一邊做隊長發言，成日俾人話我太寸太早熟，又深不可測；到拍戲唱歌，工作開始多、是非又開始多，我又唔鍾意解釋，慢慢就俾啲新聞寫到魔鬼一樣；兩年前去大陸發展，眼見啲女仔有幾進取，一眼就見到邊個係老闆、邊個係導演，好主動……我都懷疑過自己，係唔係要迎合嚇個環境、變咗條路會易行啲呢……好開心，到最近返嚟，連由細玩到大、圈外班朋友都話我同十幾年前都係一樣，我應承自己嘅嘢真係做得到。
最低潮嘅時候梗係覺得難行、是非最多嘅時候當然會覺得沒有盡頭一樣，但係當度過咗，原來難處可以係輕描淡寫，最珍貴嘅反而係經歷。
今年十月我就滿三十歲，好多人問我怕唔怕老、驚唔驚唔夠啲後生爭……唔係喎，你問我十幾、二十幾定𠵱家，我最鍾意係三十歲嘅自己。平地一聲雷、突然由一行到一百嘅人，有咩好羨慕呢？咁樣會錯過咗當中好多過程，冇跌過又點會知𠵱家身處嘅環境有幾咁值得感恩、幾咁舒服。我諗女人，三十歲係最漂亮最有味道嘅時候，我從來未試過咁踏實、咁了解自己、咁知道自己條路應該點行。
爸爸去哪兒
所謂最低潮， Stephy說是 07至 11年間，自己在娛樂圈最活躍最風光，亦是最多是非跟身的日子：拍戲被傳從鍾欣桐身邊奪走方力申、唱歌被譏笑成鄧走音、出書被發現連篇錯別字、最鑊鑊甘莫過於與餅女 Theresa的是非，「打毒針」「放毒箭」迫害 Theresa的新聞層出不窮，的確，對外形象，女惡魔一樣。
嗰段時期嘅新聞，其實我真係好 care，真係一個惡魔一樣……最慘係寫到好似，亦都好多人會信。係唔係要我開咪講畀全香港人知：「我唔係咁嘅人嚟㗎！」？當無能為力時，我就同自己講，認命，是非命咪就係我呢啲囉。
我都唔係第一日就識得無動於衷、由得你哋講、由得你哋寫，小學、中學喺學校遇到啲咩，我都係自己搞掂，鍛煉返嚟嘅獨立、冷靜。我試過怨媽咪，佢講得啱：「就係因為你嘅經歷唔同人哋，你今日先至會叻過人。」
睇相佬批過我父緣薄。之前屋企好哋哋，我出世無耐，爹哋真係因為第二個女人同媽咪分開，再冇理過我哋，細個我真係覺得問題出喺自己身上。人哋單親家庭，剩番嘅一邊會努力母兼父職彌補小朋友缺失，但係爹哋唔攞錢返嚟，媽咪要賺錢養家、家姐同阿哥年紀又同我爭得遠，我知我冇得怨，就開始習以為常，甚至以為自己唔記得咗。
直至上年去越南探訪，嗰啲小村落好窮，父親年紀多數大母親好多，唔係死咗就係唔知去咗邊。最後錄影片段，我對住個鏡頭講句平常不過嘅感言：「希望多啲人關心佢哋，佢哋真係自細就得唔到父愛……」唔知點解就崩潰咗，喊到全場都呆曬……嗰下我先至知，原來呢樣嘢喺我心裏面始終係一道刺，自己收埋得好深好入而已。
有啲嘢係缺失咗就係缺失咗，冇得補番個缺口。我信緣分，信我同爹哋嘅緣分就係咁薄弱。我都信佛，相信世間發生嘅所有嘢都有原因、都有循環。我都信我媽咪講嘅，唔係呢啲經歷，唔會成就到今日嘅我。
還不是方太
與緣分薄弱的父親， Stephy說現在平均一年大概會見一面，見到的時候既沒有怨恨亦沒有感情波幅，見完面說走就走。缺少父愛又惹是非，她說信命，說到感情， Stephy突然又推翻命理那一套，說抉擇在人的手上。
同小方合唱〈好心好報〉，都未有嘢，連錄音都唔係一齊（錄）；拍《獨家試愛》時都冇嘢，就算係吻戲、熱戀定嗌交，你唔好睇小演員，真係可以將現實同劇情分得一清二楚，收咗工，就擺低咗呢個人。我哋開始，係拍完戲日見夜見一齊宣傳，聽佢訪問講自己，終於開始放低劇本、開始認識方力申……冇刻意經驗過，一切就係咁自然開始。
我都唔明點解成日傳我哋結婚，偷偷結婚有咩咁好呢，到咗嗰日，我哋係一定會話畀全世界聽，唔係要大張旗鼓，但係一定唔怕畀人知……我諗一世人，遇到一個對嘅人好緊要，起碼煩少一樣嘢，可以安心工作先。以前我唔相信感情，都係因為呢個人令我相信感情、相信結局可以自己創造。所以我話，最鍾意三十歲嘅自己，起碼個心，比二十歲時踏實得多。
|
鍾意就快D Share啦！
|
|
|
