掃呢頁CODE去手機

2014年4月11日 星期五

[忽然1周 976] 影后是這樣煉成的! 鄭秀文 章子怡 湯唯 顏卓靈 子怡,顏卓靈,湯唯,湯唯,鄭秀文,章子怡,MW,




Sammi認真刨

Sammi嗰份劇本都有啲厚度,見佢一得閒就低頭猛刨,無話自恃係天後就打天才波。家輝亦專心培養情緒,專業!

媽咪姐

影後是這樣煉成的!

嚟緊星期日就係香港電影金像獎頒獎禮,今年個個獎項都競爭激烈,單係影後呢個獎,已經有國際級嘅章子怡同湯唯,鬥我哋本土影後鮑起靜。不過咁,俾媽咪姐揀,梗係揀努力不懈嘅鄭秀文( Sammi)



其他影片: >>Baby戲屎玩殘 Sammi










就早前啫,媽咪姐喺北角見到 Sammi同張家輝、 Angelababy(楊穎)等拍緊卓韻芝執導嘅《失戀急讓》,見佢一有時間就好認真咁拎住份劇本猛咁咪,一 roll機就全情投入,上身一樣。相反,同場嘅「林寶 Baby」唔知係咪掛住同「海綿蛋糕」談情,搞到唔夠瞓,全程烏眉瞌睡,猛累大家 NG。點知以往出名躁底嘅 Sammi,依家真係好脾氣曬,無省 Baby不特止,見張七帝張家輝有啲黑面,仲主動同佢講笑,緩和嚇氣氛。

你話嘞, Sammi好戲、專業,仲識顧全大局,完全具備金像影後條件講起嚟, 92年 Sammi同學友拍第一部戲《飛虎精英之人間有情》已經獲提名金像獎「最佳新人獎」,去到今時今日呢個地位,唔易㗎。我媽咪姐唔 buy乜嘢「必要的沉默」,只相信要成功,努力就真係必要嘞。撐硬你呀, Sammi!

做開運動嘅 Sammi喺公園都不忘 fing手 fing腳拉下筋。

Baby瞓住拍

Baby啱啱收咗男友黃曉明送嘅三手林寶做生日禮物。 25歲啫,但拍戲嗰時成個眼瞓樣出曬嚟,狂捽眼。

臨 roll機前,張家輝同 Sammi都拎住劇本,七情上面咁試戲,而對白唔太多嘅 Baby就掛住咬手指,人哋攞七次影帝係有原因㗎!

拍咗兩、三個 take後,卓韻芝都唔收貨,走到魂遊 Baby面前吟咗幾句。當時阿芝塊面真係黑過包公。唉!鬼咩,呢場唔夠 4分鐘嘅戲足足拍咗個幾鐘呀。

𠱁張家輝

Baby狂 NG,搞到演佢繼父嘅張七帝有啲唔耐煩,惟有叫梳頭阿姐執嚇個妝唞一唞。 Sammi反而好有耐性,仲同張家輝講笑減壓。安仔有咁嘅老婆,真係有福氣。

Sammi同張家輝第一次合作,就好鬼合拍,早前仲喺郊野公園跳韓國至 hit嘅夾夾舞,超搞笑!

中港爭後

今年影後之爭表面睇冇乜懸念,內地女星加入係一定嘅。難得嘅係,今年港產片都幾多樣化,有前輩鮑姐鬥新人顏卓靈, good!不過都係嗰句,媽咪姐偏心 Sammi㗎。

章子怡 熱到爆

章子怡憑《一代宗師》已經攞咗 8個影後獎,包括金馬獎同電影評論學會大獎,絕對係大熱中嘅大熱。宮二小姐,氣勢如虹。

鄭秀文 有機爆冷

憑《盲探》爭影後嘅 Sammi講明:「金像獎得唔得到冇關係,我只在乎演好角色。」但千嬅上年都攞影後喎。神啊,如果會爆冷的話,請記得永不停步的 Sammi!

湯唯 輕鬆陪跑

無可否認,對比一班內地女演員,湯唯自有一股獨特氣質。《北京遇上西雅圖》輕鬆好睇,但要憑此封後嘛?就有啲難度。

鮑起靜 淡然自若

09年,鮑姐憑《天水圍的日與夜》榮登金像影後寶座。佢老早就話今年憑《殭屍》獲提名,都係用平常心面對。啱嘅,知足常樂,呢啲咪積累番嚟嘅人生智慧囉!

顏卓靈 初次登場

今年先 20歲,喺浸大讀緊英國語文及文學嘅顏卓靈,前年憑《大追捕》得到香港導演會新人獎,今年仲堅!憑《狂舞派》入圍金馬、金像獎同一班前輩爭影後。壓力?梗係無佢話金像獎當晚要同《狂舞派》一班演員表演,要綵排又要返學,驚唔夠時間瞓啫。



鍾意就快D Share啦!