網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年4月3日 星期四

[壹週刊 1256] 劉浩龍枕頭狀 容祖兒教訓杜汶澤 祖兒,劉浩龍,浩龍,杜汶澤,熱門,容祖兒,M1,




外界以為祖兒介意「做唔到影後」大動肝火,實情她為撐男友才怒轟杜汶澤。

探熱針

劉浩龍枕頭狀 容祖兒教訓杜汶澤

一連兩場伍樂城作品展,竟然引爆容祖兒鋪文鬧爆同是嘉賓的杜汶澤。「你是我在娛樂圈唯一一個討厭的人!」英皇一姐爆火,阿澤都驚驚,即時在 fb兩度道歉,但祖兒怒火未消:「唔係一次嘞!我教訓嚇佢!」

向來口不擇言的阿澤,自○九年加盟英皇後已經得罪不少身邊人,最唔識死,是在英皇人面前奚落劉浩龍:「識搵女朋友就得,唔使做」是非傳到祖兒耳中,即時嬲爆,講明:「唔會再忍佢!」

語無倫次

世界女容祖兒,入行十五年極少開聲鬧人,週日卻在 Instagram鋪文,鬧爆在伍樂城作品展任嘉賓的杜汶澤:「你這麼一個成年人,又能什麼時候學識不撩事鬥非,不踩低人去抬高自己……係自恃口才了得不止一次傷害人為樂……」祖兒爆鑊,即時哄動娛圈。

表面上,大家以為容祖兒因被阿澤指「做唔到影後」而發難,但導火線其實另有內情。

「阿澤把口一向唔收,經常語無倫次,喺英皇咁多年,唔少人都俾佢窒過,話人唔帶腦出街, Mani個躉大,但呢啲都係雞毛蒜皮,最弊係佢背後唱師兄(劉浩龍),有次仲喺成班英皇人面前話師兄:『識搵女朋友就得,唔使做』咁多人喺度,好易俾當事人知!」知情者說。

一早埋下炸彈,近月,祖兒就算碰到阿澤,已經無兩句;演唱會當晚,英皇歌手被安排在後台同一間房化妝休息,祖兒亦只與 Twins及霆鋒傾偈,至於阿澤就滿場飛,一時搵同學伍樂城傾偈,又同拉姑傾到眉飛色舞,根本無察覺祖兒有異樣。

完騷後隔咗 13粒鐘,祖兒才鋪文鬧爆杜汶澤。

得罪英皇一姐,杜汶澤火速認衰,兩度發文道歉。

拒絕妥協

伍樂城安排杜汶澤在第一場唱祖兒的《逃避你》,恃熟賣熟的阿澤,卻在台上公開揶揄祖兒。

「兩年前我氹掂佢老闆楊受成出錢拍戲,我講明呢套戲一定會捧祖兒做影後,點知佢做唔到影後,反而係我做到影帝!」全場爆笑,杜汶澤還未意識到已經觸怒一姐。

據在場工作人員目擊,當晚完騷後,祖兒離開紅館時表現平靜。

「到第二場騷,啲人問祖兒做乜要鋪文咁㷫,嗰晚祖兒好唔同,仲講咗幾次話要教訓佢(杜汶澤),係咁一輪嘴狂呻!」

寸人無掣的杜汶澤,知道祖兒發火後,兩度在 facebook道歉認衰,又搵埋經理人 Mani幫口,但祖兒啖火未熄,即使 Mani幫口,都無情講。「 Mani都成日俾阿澤窒,但佢係經理人,點都要出手搞番掂件事。祖兒亦真係好少會咁發火,就算 Mani搵佢,祖兒依然好決絕,話寧願反面都唔會幫阿澤補飛! Mani都無曬辦法。」

杜汶澤自泊到英皇碼頭後,工作愈多,把口愈唔收。

容祖兒大鬧杜汶澤「傷害朋友」,相反就大讚李克勤是專業搞笑高手。

由容祖兒擔正的《 Diva華麗之後》,票房僅收 500萬,令她再被封為「票房毒藥」。

杜汶澤帶埋老婆田蕊妮睇祖兒跨年演唱會,本來好哋哋,卻因為後台奚落劉浩龍出事。

師兄影響

杜汶澤原被安排在第二場騷唱謝霆鋒的《非走不可》,為怕撞到祖兒,決定縮!「阿澤下晝通知 Ronald(伍樂城)話唔到,祖兒七時到場後,亦通知大會,話完騷後要見傳媒。」當晚祖兒繼續開炮:「希望教訓嚇佢!」「君子之交淡如水,再拍戲唔好嘞!」企硬唔願息事寧人。

過去,容祖兒對公司一直言聽計從,但自兩年前與劉浩龍拍拖,祖兒開始變得有主見,今次鋪文事件,事前亦未有知會 Mani。

「祖兒喺公司出名聽話,但拍拖之後,師兄對佢影響好大,佢亦唔再乜都同公司講,之前同記者話想三十六歲生仔,後來知公司唔鍾意,先改口話四十歲生!總之而家講乜做乜,佢都未必會先經公司。」知情者說。

容祖兒高調戀師兄,拍拖兩年,性情亦大變。(《蘋果日報》圖片)

容祖兒、杜汶澤合拍《 Diva》成朋友,祖兒更曾下廚賀杜汶澤奪影帝。

演唱會拜神儀式上,特設悼念張耀榮儀式,容祖兒因有工作遲到,未有同參與的杜汶澤同場。

寸過一姐

祖兒入行多年,試過俾梁思浩醜化,又俾譚詠麟寸,但像今次開炮轟杜汶澤,則未曾試過。

梁思浩

01年,梁思浩在《歡樂今宵》藝員與港台 DJ鬥扮嘢的節目中,醜化容祖兒,用膠紙貼上唇,露出「大牙肉」,還化了閃電眼妝。

譚詠麟

「龍兒戀」曝光後,譚詠麟 12年為無綫主持《歐洲國家盃》時,笑指劉浩龍是「劉醫生,好厲害!將祖兒彎都掹番直。」

手尾長

杜汶澤連日來於網上高調撐台灣學運反服貿,引來內地網民不滿圍剿,發起「阻止杜汶澤來大陸」,但他依然企硬,繼續還擊,除公開多名九十後網友樣貌,更以一句「有本事阻止我來大陸」,隨即惹禍上身!

內地娛樂公司「北京麥特文化娛樂傳媒」公司總裁陳礪志日前在微博公開表示:「投資的電影,絕不用杜汶澤」;另一邊廂,他有份擔正的電影《黑色喜劇》,所有內地海報及宣傳活動被抽起,改由王祖藍頂上。據了解,有內地電視台原安排了杜汶澤上節目,亦突然煞停,若事件惡化下去,隨時全面封殺。



鍾意就快D Share啦!