掃呢頁CODE去手機

2014年4月9日 星期三

41歲譚小環堅係做魚蛋妹:過到自己嗰關就得!



相關文章:[壹週刊  1257] 無綫捱十八年 月薪萬八 譚小環銅鑼灣賣魚蛋 M1,


2014-04-09 11:52:00


堂堂港姐冠軍,竟然變成「魚蛋妹」?呢條唔係神一樣的劇情,而係真有其事喎。講緊嘅係94年港姐冠軍已為人妻嘅譚小環。41歲先嚟做「魚蛋妹」,小環話:「職業無分貴賤!」,喎。

其實小環係老老實實喺銅鑼灣藥房林立嘅渣甸坊開咗間「魚蛋檔」,魚蛋、燒賣十蚊六粒,龍蝦丸就十蚊三粒,魚蛋檔面積約百幾呎,其門如市,生意唔錯,小環亦由朝忙到黑,即使有三名員工幫手依然冇時停。

講真,就算係自由行,照計點都飲過無綫奶水,認得小環,眉精眼企嘅香港人更加一眼就認得呢個短髮四眼妹就係前港姐冠軍,大家都有少少「唔係化」嘅表情,但收錢嗰刻一聽聲,冇走雞,係小環啦!

據知呢間舖舖租要求十一萬一個月,加埋水電雜費六個人頂兩更,小環每日就企八粒鐘賣魚蛋仍面不改容,不過報道就話佢費事太多人認得,故刻意改形象,剪短頭髮之餘做埋眼鏡娘。唉,其實咪又係一眼認到你!

舖頭開業半個月左右,亦係小環第二間魚蛋檔,之前譚媽媽做過小販,所以做起呢盤生意毫無難度。小環做保險嘅老公蔡強榮亦會落舖探班,接老婆食飯。

小環喺無綫捱足18年,據知走嗰陣月薪都係得$18,000。離巢時遇啱王維基招兵買馬高薪挖角,當時無綫有加佢人工……但……只係加三百。

小環接受周刊訪問時話:「咁TVB人工唔係高係人都知,我喺度十八年,雖然人工得萬幾蚊,但可以攞到知名度。」佢又話,因為無綫人工太奀,所以做女嗰陣主力都係靠登台搵錢。試過登台嗰陣俾人用玻璃樽飛上台,依家做魚蛋妹,安全得多。佢話:「魚蛋妹都係人,如果人哋見到我,記得我係魚蛋妹,都好呀!」

但係堂堂港姐冠軍就去賣魚蛋,連粗活如擔擔抬抬送貨推車仔都要做,小環好睇得開:「靚唔可以當飯食,做乜都好,只要過到自己嗰關就得。」


之前小環已於微博幫自己呢家新店大賣廣告,不過微博俾like同回應人數有限。
















鍾意就快D Share啦!