[FACE 359 外地娛樂] 酒店風雲 MF,

《 Hotel King》已於上週六（ 5日）出街，據知今次係李東旭親自邀請李多海演出先拍得成。呢對熒幕金童玉女，事隔 8年再演情侶。

韓面

酒店風雲

Hit爆韓劇《來自星星的你》播完後，唔少「星星迷」都要四出搜羅其他劇集去填補心靈空虛。

踏入 4月，將有兩套新劇《 Hotel King》及《天使之眼》強勢推出。當中必睇首選當然係韓劇一姐李多海擔正的《 Hotel King》，講酒店家族生意出現危機，而掀起酒店風雲的《 Hotel King》，是李多海繼 8年前《大話妹》後，再與拍檔李東旭雙李合璧再出擊外，仲有靚聲男團 2AM成員瑟雍撐場。識睇，一定睇呢啲！唔通仲坐喺屋企睇強國舊劇《西遊記》咩！

除李東旭及李多海外，仲加埋 2AM成員瑟雍及實力女星王智慧及金海淑合演，韓劇迷肯定超期待。

06年，李多海與李東旭合演的《大話妹》，曾創下 24.9%最高收視紀錄，李多海及李東旭隨即被封為視壇金童玉女。事隔 8年，雙李再度合作，演出由 MBC電視台製作的新劇《 Hotel King》，俊男配美女肯定吸引韓劇迷捧場。

笑到牙骱軟

上次《大話妹》，講李東旭飾演酒店太子爺同窮家女李多海譜出戀曲的故事，但今次《 Hotel King》， 2人身份逆轉，講李多海飾演的酒店太子女，因老豆發生意外後搞到酒店陷入危機，最後要頂硬上拯救家族生意。而李東旭就飾演酒店經理，扶助李多海度過逆境同時，仲日久生情發展出一段戀愛故事。

套劇以酒店做背景， 2人於開拍前，專誠走去六星級酒店實習，除學習待客禮儀外，最重要是學習以親切笑容迎人，據知李多海更試過連續依起棚牙超過 1粒鐘，最後搞到牙骱軟曬。

8年前，李東旭於《大話妹》玩有錢仔愛上窮家女李多海橋段。今次《 Hotel King》調翻轉，由李多海扮酒店太子女，同打工仔李東旭撻著。

李多海飾演一名有公主病嘅太子女，唔只性格刁蠻，仲好貪玩，所以經常裝鬼臉，勁多表情。

李東旭配李多海嘅陣容已夠強勁，今次仲搵埋 2AM成員瑟雍扮演酒店服務員，由於為人正直成日被人搵笨，最慘係要服侍埋太子女。

李東旭擦鞋

金童玉女再度拍檔，肯定大把嘢傾，最近李東旭出席記招時大擦李多海鞋：「我哋比以前更合拍，未合作過嘅演員通常要花時間溝通，但我哋已有合作經驗，所以慳番好多時間，而我發覺李多海靚咗好多。」點知李多海就唔多領情，仲唔畀面話：「已好耐冇見佢，佢𠵱家終於識得去照顧人，呢樣嘢係我以前未見過。」一向易惹是非的李多海，咁直腸直肚，小心得罪人喎！

變曬樣

學生時期嘅李多海，單眼皮、扁鼻兼闊面，完全冇明星相。𠵱家變咗眼大，高鼻，尤其 V面最明顯，唔通真係削骨還父。

8年前李多海拍住李東旭合演《大話妹》時，曾傳出 2人戲假情真，所以演得特別投入。

勝利處男對撼

4月除《 Hotel King》外，由《花樣男子》女主角具惠善，搭實力男星李尚允主演的《天使之眼》，亦與《 Hotel King》同日（ 5日）出街正面對撼。《天》劇講具惠善飾演救護人員，她和急症室醫生李尚允曾拍拖，想不到被迫分開後再重遇。為打硬仗，《天》劇專誠邀請 BIGBANG成員勝利加入，飾演救護隊隊員，希望利用勝利吸引更多女觀眾捧場。

男女主角具惠善與李尚允，將上演一段翻兜情緣。

曾經演過日劇《金田一少年事件簿》嘅勝利，首次參演韓劇《天使之眼》。劇中，將飾演一名加入韓國救援隊嘅南韓僑胞。

鍾意就快D Share啦！

下一篇 》