掃呢頁CODE去手機

2014年5月30日 星期五

[忽然1周 983] 群星避走 金秀賢全智賢《百想》勁風騷 金秀賢,全智賢,MW,




頒獎禮未開始,金秀賢已知自己係首位拎兩個「人氣獎」嘅贏家,風騷樣係點?自己睇!

媽咪姐

群星避走 金秀賢全智賢《百想》勁風騷

媽咪姐周二( 27日)晚擔定櫈仔睇 JTBC直播《百想藝術大賞》,都戥「雙賢」唔抵,同視帝視後獎就咁擦身而過!

不過咁,媽咪姐都要講句公道話,《來自星星的你》喺海外的確冇得輸,但喺韓國呢,金秀賢同全智賢今年個勢係就係大好。但講到收視,其實有幾套劇都同《星星》有得揮,只係大家見《星星》個勢咁勁,有份角逐嘅紅星好似周元、李鐘碩同劉亞仁等男神怕做陪襯,棄權唔出席。都未見過《百想》咁冷清囉!但估唔到「雙賢」都要輸。所以話呢,唔怕神一樣嘅對手,只怕未係時候。

金秀賢聽到全智賢奪得「大賞」,興奮過自己攞。不過全女神個表情,似乎嫌金秀賢浮誇喎!

全智賢呢個回眸女神 look,唔只艷壓全場,仲拎埋「時尚獎」。你話吖,靚真係好重要。

女神都驚走光,全智賢一落車,唔少得抽一抽條裙。呢個不經意嘅動作,唔核突仲好誘惑㖭!

金秀賢早喺 2012年憑《擁抱太陽的月亮》已經攞過視帝,今屆又連攞電視、電影「人氣獎」及憑《 3個特攻美少年》擸埋電影「新人獎」。而全智賢就奪得電視部門最高榮譽「大賞」,大家都好有 face!

李寶英憑《聽見你的聲音》封視後,曹在顯憑《鄭道傳》稱視帝,兩個都係實力派演員,撼贏「雙賢」,實至名歸



鍾意就快D Share啦!