[壹週刊 1261] 向錢看 袋 30萬維穩 杜德偉跪低 杜德偉,M1,

（《蘋果日報》圖片）

探熱針

向錢看　袋 30萬維穩　杜德偉跪低

上週四（五月一日），由澳門政府跟新城電台合辦，被指以維穩對撼勞動節遊行的「 5． 1黑沙海灘迎夏日演唱會」，事前被澳門民主派呼籲抵制，令本來答應參與演出的張智霖、謝安琪等先後退出，大會最後改由唔做又做的杜德偉負責壓軸。

近年人氣和收入都十分麻麻的杜德偉，為爭取贊助商開喉支持他八月在紅館開騷，加上一鋪過袋三十萬，話之會惹來網民圍插，即跪！

唔認唔得

已經五十一歲的杜德偉，在台灣發展超過十年，今年三月遭前經理人姚鳳群入稟控告洩露公司機密、私自接工作等罪狀，擾攘個多月，雙方和解收場。因為官司一度被煞停工作的他，索性回歸香港，推舊歌新唱碟，並在紅館開騷搏一鋪。

再戰香港樂壇，撞正一班歌手唔想被用作政治籌碼，縮沙「 5． 1黑沙海灘迎夏日演唱會」，杜德偉坐正維穩騷做壓軸。

「第一張海報出咗之後，演唱會俾網民話係維穩騷，啲歌手驚惹是非陸續辭演；執二攤嘅 Alex（杜德偉）接咗個騷之後都有啲驚，所以最初佢同出面講話未決定，諗住唔講去澳門唱完就算，點知新嗰張海報又俾人登咗出嚟，大家都知佢落實咗做嘉賓，唔認唔得。」知情者說。

第一張維穩騷海報見光後，周柏豪跟官恩娜、連詩雅等都相繼跟大隊退出，而隨後換上的糖妹、 Hotcha執二攤，都有四至五萬落袋。

謝安琪跟張智霖本來是維穩騷的表演嘉賓，後因政治敏感，先後退出唔玩。

兩場變一場

據了解，杜德偉近年在台灣並不順利，工作量亦大減，○三年出過唱片後，要相隔十年，去年才再有機會出新碟。眼見今次對方開出優厚條件，就算被網民鬧爆，杜德偉決定向錢看，做「維穩歌手」。

「 Alex唱五首歌袋三十萬，好多騷都唔會俾呢個價佢，有錢冇理由唔賺；加上佢本來 plan咗八月喺紅館開兩場演唱會，但到而家都未搵到 title sponsor（冠名贊助），所以暫時只係開到一場。新城見其他劈炮，好驚搵唔到人做個騷，所以只要 Alex應承唱，新城嗰邊就會喺嚟緊幾個月幫佢谷歌谷人氣。」

被指收三十萬做維穩騷，杜德偉經理人 Roy回應說：「接唔同騷有唔同價，幾多就唔方便講。」

至於八月舉行的演唱會， Roy表示杜德偉十分緊張。「佢（杜德偉）等呢個期等咗好耐，對上嗰次已經係廿一年前，佢一直都有 keep住做運動，好勤力 train自己，而家仲係跳得好勁。」

跟細他二十五年的攝影師女友 Ice在前年結婚，一直表示恨生 B的他，至今未有聲氣。

杜德偉將 N年前的舊歌《影子舞》翻唱，近日在電台熱播，他更在微博大曬單曲唱碟封面，配合谷宣傳。

年過半百，杜德偉一直做運動練體能，再返香港樂壇，依然貫徹早年勁歌熱舞 style。

杜德偉在圈中有不少「大星」朋友，除梁朝偉外，他也會約周潤發行山。

台灣事業停滯不前，去年就應前度邀請，在電影《金雞》扮嫖客，爭取曝光。

蝕頭賺尾

第四屆新秀冠軍出身的杜德偉，曾經風光過，但後勁不繼，○○年更因為緋聞和涉毒令事業受到影響，事業從此沉寂。與他同屆參加新秀的，當中只有蘇永康最夠耐力，跑程最遠。

蘇永康　跌完再起

85年參加新秀，屈居亞軍的蘇永康，得獎後等足四年，才有機會推出處男碟《失眠》爆出，但紅歌唔紅人，事業上上落落。 98年，《越吻越傷心》令蘇康鹹魚翻生，可惜 02年在台灣因服食及藏有搖頭丸被勒戒，一鋪清袋。直至前年再爆佳作《那誰》，登台騷長做長有的他，收入和味。

林楚麒　神化

在第四屆新秀得銅獎的林楚麒，出道後只在劇集及電影中做串星，不曾推出個人大碟，有傳她是 Beyond主音黃家駒的女友；家駒逝世，林楚麒以「未忘人」身份到靈堂哭喪，被家駒屋企人逐離場。較早前，林楚麒曾揚言因為家駒唔嫁，行為神化。

鍾意就快D Share啦！

下一篇 》