掃呢頁CODE去手機

2014年5月14日 星期三

[FACE 364] 53歲再爆肌 鄧浩光:想 fit畀囡囡睇! 鄧浩光,MF,




操到咁 fit,上週四( 8日)鄧浩光在辦公室接受本刊訪問時話:「最緊要你個人貪靚,你貪靚先有動力。」

搜尋氣

53歲再爆肌 鄧浩光:想 fit畀囡囡睇!

《激戰》帶挈張家輝再奪影帝,加上班韓星個個 8嚿腹肌勢兇夾狼,港星唔操 fit好難見人!

最新肌佬有第一代飛魚王子、 53歲白花油高層鄧浩光。最近忽然跟風勁減 30磅,日日跑步加做 gym,再食自創地獄餐單,同腩肉激戰 5個月後,練出朱古力腹肌。

以為佢為咗白花油可以咁盡,原來只係為咗貪靚,同埋最想老婆同 9歲女兒,可以見到佢最 fit body。鄧浩光說:「佢哋知我以前好 fit,但我好想畀佢哋親眼見一次。」

我不嬲有幫公司(現職白花油市場部經理)拍廣告㗎,自從做咗文職,身材就開始走樣,其實想減好耐,終於喺舊年 12月開始減肥囉!初頭都唔係太認真去操,頭嗰 4個月,一星期操 5日,每日跑步 30至 45分鐘,再加做 gym兩個鐘,好快就瘦咗 20磅。後尾老闆(顏福偉)見我瘦咗咁多,話咁 fit唔好嘥,不如爆衫拍廣告我初時諗都冇做娛樂圈仲坦胸露背做咩,但我又諗老婆同個女,佢哋知我以前好 fit,但佢哋都未見過喎,我好想畀佢哋親眼見一次,咁就試下有咗目標後,跟住就真係地獄式減肥,早餐生果加藜麥(有機穀類),下午食超辣四川酸辣粉,我覺得辣嘢有助排汗,夜晚就食煎雞胸肉,成功減多咗 10磅就拍廣告。

出到嚟有人話似張家輝,其實減嗰陣都有諗,家輝都得、我冇理由唔得啩!以前同佢合作過,知佢練到身形咁 fit真係要好努力先得。以前同張家輝、甄子丹一齊喺亞視拍《洪熙官》,𠵱家佢兩個咁紅,我會唔會心酸?唔會,因為人哋一定付出過好多,我追求係安穩家庭生活。以前喺亞視,我都算高薪嗰班,但想同老豆食飯都難,根本唔知幾時收工,𠵱家我星期六、日一定陪到屋企人。個女出咗世令我更加注重家庭生活,所以我冇諗過復出。有啲報導寫我同老闆顏褔偉過分 friend,哈哈,我結咗婚咁耐,個女都 9歲其實係啲人錯覺嚟㗎啫,冇呢樣嘢㗎!

02年跟圈外女友 Mabel結婚,家陣囡囡 9歲,鄧說:「我追求安穩家庭生活!」《蘋果日報》圖片

鄧浩光屬香港第一代飛魚王子, 80年代保持香港多項遊泳紀錄,身形一向 fit爆。《蘋果日報》圖片

94年鄧浩光(右)同張家輝(左)和甄子丹一齊拍亞視《洪熙官》,眨眼廿年,如今一個影帝一個宇宙最強,鄧浩光說既不羨慕亦不用比較。

鄧浩光 05年加入顏福偉旗下的和興白花油做業務拓展經理(現職市場部),成日有報道話顏福偉好照顧鄧浩光,鄧話:「我個女都 9歲啦,冇呢樣嘢㗎!」



鍾意就快D Share啦!