掃呢頁CODE去手機

2014年5月28日 星期三

[FACE 366] MK夢碎 大台霸道 迫o靚版吳啟華退出天堂鳥 何廣沛 天堂鳥,何廣沛,吳啟華,MF,




21/5

冇得變天堂鳥的何廣沛,雖然做𡃁版吳啟華有人留意,但上週三( 21日)出席完商台《 1圈圈》訪問後,連貼紙都未撕走就自己一個搭港鐵,全程冇乜人認得佢。

真面目

MK夢碎 大台霸道 迫𡃁版吳啟華退出天堂鳥

一台獨大除咗觀眾冇得揀,其實班演員都唔好過,就算自己有好路數都隨時失機會。

好似喺中女劇飾演𡃁版吳啟華嘅何廣沛,原來差啲成為 MK-pop天團「天堂鳥」成員之一,可惜無綫唔想益人,一句唔得就扼殺何廣沛進軍 MK之路,連佢自己都話:「入唔到天堂鳥當然有失望但我相信公司係為我好!」侷住係咁囉!








中女劇除咗紅咗班中女同新女外,劇中飾演少年吳啟華嘅何廣沛,亦被網友讚為「新帥哥」,可惜 25歲何廣沛未係親生仔。拍完中女劇後,要由二打六捱起,連對白都冇,每月得 6千蚊底薪。

週一( 26日)問到 Lincolen會唔會覺得何廣沛冇加入可惜,他說:「佢行藝人嘅路,我哋唱歌各有各做。」好鬼官腔。

天堂鳥頭炮〈登陸太陽〉被評好 MK,但成功吸引大家注意,最近已經有新歌〈 What You Want〉放上 YouTube。

因為靚仔而被吳啟華欽點,何廣沛卻無緣唱歌,唔知是福是禍。《蘋果日報》圖片

「佢哋唔 MK!」

據知拍完中女劇後,何廣沛仲喺《廉政行動 2014》同《使徒行者》等做路人甲冇對白。諗住喺大台捱之餘,亦想搵多條後路。適逢做 model時,認識𠵱家嘅天堂鳥成員 Lincoln許俊豪,仲介紹何廣沛入隊。據知面試後天堂鳥經理人滿意,可惜大台知道後,竟叫當時只是普通藝員約的何廣沛專心拍劇,唔放生佢外闖,出碟美夢就咁粉碎。

不過天堂鳥成員 Lincoln就乜都唔肯多講,週一( 26日)出席活動時只說:「我同佢做 model時識,佢點解冇加入,呢啲我就唔知喇!」而失落唱歌機會的何廣沛,上週二、三( 20、 21日)本刊發現他生活極為慳家,出入港鐵巴士外,還乖仔陪阿媽買麵包,對於冇得進攻 MK,何廣沛難掩失望說:「入唔到天堂鳥當然有失望因為我覺得佢哋唔 MK,係好有韓風嘅組合,但我相信公司係為我好!𠵱家喺 J2《激優一族》做主持, 8月會做動漫節大使,希望 keep住有工開」捱多 10年 8年,好快輪到你做第三男主角

20/5陪阿媽買包

26歲何廣沛出身小康,上週二出席完活動後,又係衫都未換就約埋阿媽行街買麵包,好乖仔。

同劇雖然冇同場,不過鄭丹瑞為何廣沛 26期訓練班導師,當日何廣沛做完商台訪問,仲接埋佢走。

何廣沛除咗演戲,亦鍾意唱歌,平時都會同大學朋友到卡拉 OK唱兩、三個鐘,他說:「唱歌我其實麻麻哋,但跳舞就好啲嘞,因為學過 10年芭蕾舞。」網上圖片

拍完中女劇,何廣沛工作冇明顯增加,同其他訓練班同學仔一樣,由最低做起,拍《使徒行者》做林峯手下連一句對白都冇。網上圖片

中產靚仔 美國留學

何廣沛為無綫訓練班出身,中三讀赤柱聖士堤反書院,之後去咗美國 San Jose State University讀會計,又有 6呎身形,點睇都唔似 MK仔。

何廣沛跟家姐都喺美國讀大學,何廣沛主攻會計,讀咗年半左右就回港,他說:「發現自己嘅興趣唔係會計,所以返嚟香港。」網上圖片

何廣沛未入行前都做過 model,仲試過留長蔭頭扮韓仔,好有 MK-Pop潛質網上圖片

入無綫訓練班前做過網上主持,去年加入無綫 26期訓練班,踏上二打六之路。網上圖片

富貴多星 friend《 M Club》賓賓中環開 club

識咗 20年喇!(真實對白)

花名叫 Babe Tree,因為鄧鎧汶係家中孻女,所以叫 Babe,而 Tree則係她做英航地勤時的花名, Babe在中環開嘅高級紅酒 club,嘉玲都係座上客,她說:「嘉玲上嚟好少飲,佢鍾意聽 live music同聽我唱歌!」網上圖片

中女劇除咗班少女搶鏡,喺劇中飾演李若彤嘅賓賓 Daisy(鄧鎧汶),成日同奶奶苗金鳳串爆李若彤,亦睇到巴打好過癮。劇中做賓賓,現實中 Daisy原來係女強人,喺中環開高級紅酒吧,劉嘉玲、任達華,甚至球星亨利、朗拿甸奴都係座上客,拍劇?為興趣囉!

中女劇嘅搶戲賓賓 Daisy,現實中係中環 The Central Wine Club嘅老闆,週日( 25日)仲喺主場接受本刊訪問。她表示當日因為有相熟助導搵佢先拍,「我識嗰 PA林肯,佢話有嗰角色好啱我,咪試囉,但我話唔好多戲呀,多戲唔做。」

真名鄧鎧汶( Babe Tree)是中菲混血兒,香港土生土長但唔識睇中文,爸爸係菲籍律師更熱愛音樂,富家女嘅 Babe除咗喺中環開酒吧,喺國內亦有飲食生意,劉嘉玲、任達華等都係佢老友兼客仔,「我識咗劉嘉玲 20幾年喇,係朋友囉,唔想講太多。唔好話我串,我真係好忙㗎!」據知拍《 M Club》其間,由於鄧鎧汶表現入型入格,另外有兩套劇想搵佢做,但由於角色都係做賓賓,鄧鎧汶唔想重複所以推咗,「 TVB我覺得太工廠喇,舞台劇挑戰大好多。」

鄧鎧汶唔只識做戲,唱歌亦耍家,後生時跟肥媽登台搵食。她說:「嗰陣時喺 Canton Disco( 80年代大場,已結業)識佢,大家一齊玩,我做佢 back up singer,當時幾好搵㗎!我最少都搵 3萬蚊一個月, 80年代呢個數唔少㗎!」好多人對菲律賓人有歧視,不過鄧鎧汶一於少理,她說:「嗰啲人 narrow mind使咩理,冇人因我國籍笑我!每個人都應該 proud of自己。」打扮中性化嘅鄧鎧汶,問到佢性取向時,她說:「呢個問題太個人喇,我有好多女性朋友,亦有好多男性朋友。」咁口密,唔怪得多巨星朋友

搶鏡賓賓

劇中鄧鎧汶飾演工人 Daisy,同奶奶苗金鳳一人一句窒爆李若彤,表情動作又到位,令網友睇得過癮,她說:「劇本寫得好啫!我照稿做咋!」

鄧鎧汶係 The Central Wine Club老闆,走高檔 classic路線,佔地 3千呎,佢得閒仲會上台唱幾首。網上圖片

跟肥媽搵食

鄧鎧汶十幾歲就跟肥媽登台搵食,問佢跟邊個學唱歌。她說:「邊使學㗎!天生㗎嘛,哈哈!」網上圖片

鄧鎧汶最愛舞台劇,'10年參與《裔不可擋》舞台劇,從不介意演醜角,她說:「演員要做好每個角色,但最怕就係重複。」網上圖片

集郵賓賓

現實中鄧鎧汶絕對唔係賓賓咁簡單,唔肯透露年齡嘅佢,私下唔少明星朋友,經常喺佢個場玩,就連世界級球星都嚟幫襯,認真犀利。

苟芸慧有份

鄧鎧汶喺圈中食得開,不過亦相當口密,問到佢同明星朋友嘅關係,她都不願多談,她說:「大家認識啦,都係朋友囉。」網上圖片

讚苗金鳳

鄧鎧汶大讚苗金鳳,她說佢係一個好專業又值得敬佩嘅前輩。網上圖片

胸襲甸奴

當日世界級球員朗拿甸奴同亨利隨巴塞隆拿訪港。冇人追訪到,原來係走咗去鄧鎧汶嘅場消遣。網上圖片

亨利都撐(網上圖片)



鍾意就快D Share啦!