掃呢頁CODE去手機

2014年6月27日 星期五

[忽然1周 987] 金泰希 登「陸」搶人仔 金泰希,MW,




金泰希上星期已赴杭州開工,大約逗留到 8月先返韓國。話說佢啟程當日,身穿清爽白衫、手挽價值約港幣 3萬多 CELINE手袋出現機場時,除有百多名 fans送機外,亦吸引 30多個傳媒拍攝離境情況。果然係女神呀!

亞熱帶

金泰希 登「陸」搶人仔

近幾年強國人仔好搵,搞到啲韓星大舉進軍強國𢱑銀。唔好講咁遠啦,就講李敏鎬同金秀賢兩個偶巴,單係今年 3月到 6月,齋拍廣告已賺過億人仔,其他韓星點會唔流口水!

登「陸」掘金成風,除早前喺北京拍《太平輪》嘅宋慧喬及跟劉亦菲拍緊電影《露水紅顏》嘅 Rain外,另一個頂級藝人金泰希亦跟隨男友 Rain腳步,接拍古裝劇《書聖王羲之》,飾演王羲之元配夫人郗璿,正式登「陸」強國。

泰希接拍《書聖王羲之》,有人認為佢係想跟隨進軍強國嘅男友 Rain,雖然呢個可能係原因之一,不過相信最大主因都係金錢誘惑。據悉金泰希拍《書》嘅片酬好和味,每集港幣 50多萬,全劇 40集,即係 2千幾萬就袋袋平安。

金泰希自《張玉貞》後,已有年幾冇拍過劇,今次拍《書聖》係大膽之舉,事關佢要飾演同樣擅長琴棋書畫嘅王羲之夫人郗璿,加上佢對呢個歷史人物事蹟唔太了解,所以除咗要惡補琴棋,仲要學會揸筆同練書法,至於煲冬瓜佢則無能為力,要靠配音囉﹗

男友 Rain喺上海跟劉亦菲拍緊電影《露水紅顏》。兩人齊齊喺強國開工,要私會話都冇咁易

金泰希擅演古裝劇,喺《張玉貞》入面,以全新面貌為被稱為「朝鮮三大妖女」之一嘅張玉貞平反。

造型煞食

金泰希飾演王羲之元配郗璿嘅造型首次曝光,金泰希扮相清麗,好有氣質。

《書聖王羲之》得到書法家沈鵬親筆題片名外,更任藝術總指導。金泰希及飾演王羲之嘅王仁君(右)現亦跟沈大師學書法。

劇集導演周祥林對金泰希讚譽有加,令金尷尬。

金泰希現喺杭州開工,而 Rain目前亦喺上海同劉亦菲拍電影《露水紅顏》,兩人飛內地前,喺烤肉店被影到甜蜜撐枱腳。依家兩個喺強國開工𢱑人仔,邊個夠佢哋撈?

金泰希同 Rain嘅戀情可以用愈愛愈高調嚟形容,事關兩人除早前被影到去 Hip Hop組合「高耀太」成員白佳開嘅酒吧蒲到天光(下圖)外,上星期又被影到去烤肉店撐枱腳(上圖)。

無敵阿豬媽侵「華」

強國市場日益擴大,連一線藝人宋慧喬及金泰希都要去強國搵銀。其實呢班靚靚阿豬媽星侵「華」早已喺 04年開始,當年張娜拉、金喜善等已係先頭部隊,近期連《星星》嘅千頌伊(全智賢)都要搶灘。

「 Daphne」女裝鞋

全智賢( 14年)

以往甚少涉足內地嘅全智賢,因《來自星星的你》成為強國人氣女星。雖然目前仍未聽聞佢有否接拍內地劇或電影,但單接廣告,短短兩個月已賺半億人仔。認真犀利。

攻陷指數:★★★★★

《太平輪》

宋慧喬( 12年)

12年時,宋慧喬已喺王家衞電影《一代宗師》客串,飾演梁朝偉(葉問)老婆張永成。今年佢拍攝吳宇森電影《太平輪》,稍後則會拍攝伊能靜自編自導自演電影《我的女王》。可惜佢出師不利,主角變大茄,而《太》片則被吳宇森超支拖累。

攻陷指數:★★★

《愛的蜜方》

李多海( 12年)

韓國劇集《 Hotel King》女主角李多海,幾年前曾喺中國發展,惜未如理想,僅於 12年演出湖南衞視愛情劇《愛的蜜方》。

攻陷指數:★★

《李家大院》

蔡琳( 04年)

蔡琳 04年開始已喺內地搵食,先後拍攝《楊門女將》、《新醉打金枝》、《康熙秘史》及《情定愛琴海》等。 06年跟歌手李承煥離婚,結束 3年夫妻關係後,蔡琳就長駐內地。近日 35歲嘅佢更宣布跟內地男星、 33歲嘅高梓淇結婚。蔡琳喺強國最好成績,搵到兩仔——人仔同老公仔。

攻陷指數:★★★★

公開道歉

張娜拉( 04年)

張娜拉其實同蔡琳一樣 04年已進軍大陸,拍戲、拍劇、廣告瓣瓣掂,可惜近幾年喺內地人氣大跌。事緣 09年時,佢喺韓國一個綜藝節目自爆﹕「中國賺錢好容易,所以我喺韓國沒錢嘅話,就會去中國。」此話一出,即辣㷫中國網民及製作單位,認為佢將中國粉絲當羊牯,要求佢道歉。

攻陷指數:★★



鍾意就快D Share啦!